ក្រុមអាជីវកម្មជីករណ្តៅដីយកអាចម៍ដីលក់ ជីករណ្តៅជ្រៅដល់ក្បាលប្រែតជម្រៅជិត១០ម៉ែត្រ បង្កឲ្យប្រជាពលរដ្ឋដែលមានដីក្បែររណ្តៅដីនោះ មានការព្រួយបារម្ភយ៉ាងខ្លាំង ព្រោះខ្លាចបាក់ដីលំនៅដ្ឋាន និងដីស្រែរបស់ពួកគាត់ចំនួន០៨គ្រួសារ នៅក្នុង
ខេត្តស្វាយរៀង ៖ ក្រុមអាជីវកម្មជីករណ្តៅដីយកអាចម៍ដីលក់ ជីករណ្តៅជ្រៅដល់ក្បាលប្រែតជម្រៅជិត១០ម៉ែត្រ បង្កឲ្យប្រជាពលរដ្ឋដែលមានដីក្បែររណ្តៅដីនោះ មានការព្រួយបារម្ភយ៉ាងខ្លាំង ព្រោះខ្លាចបាក់ដីលំនៅដ្ឋាន និងដីស្រែរបស់ពួកគាត់ចំនួន០៨គ្រួសារ នៅក្នុងភូមិតារាងបាល់ សង្កាត់គយត្របែក ក្រុងស្វាយរៀង។
ហើយរថយន្តដឹកដីទាំងនេះ គឺដឹកដីលើសទ្រុងកម្ពស់ជិត១ម៉ែត្រ បង្កឲ្យធ្លាក់អាចម៍ដីពេញថ្នល់ឆ្លងកាត់ចំនួន៩ភូមិ ក្នុង៣សង្កាត់ គឺចាប់ពីភូមិតារាងបាល់ ភូមិគយត្របែក សង្កាត់គយត្របែក រួចកាត់តាមភូមិរោងបន្លែ ភូមិមេភ្លើង និងភូមិស្រះវង់ សង្កាត់ស្វាយរៀង ហើយនឹងឆ្លងកាត់ភូមិសាលាស្រុកចាស់ ភូមិព្រៃឆ្លាក់ ភូមិសួនថ្មី និងភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង ជាពិសេសនៅចំណុចភូមិអណ្តូងតាសី គឺបង្កឲ្យស្រុតខូចផ្លូវលំ និងហុយដីលើផ្ទះរបស់ប្រជាពលរដ្ឋធ្វើឲ្យប៉ះពាល់ដល់សុខភាពយ៉ាងខ្លាំង។
ប្រជាពលរដ្ឋបានសំណូមពរសូមឲ្យអាជ្ញាធរក្រុងស្វាយរៀង មេត្តាចុះពិនិត្យដោះស្រាយដល់ប្រជាពលរដ្ឋដែលរងការប៉ះពាល់ផង ៖
ទី១- ដោយចោទក្រុមអាជីវកម្មជីករណ្តៅដីយកអាចម៍ដីលក់ ជីកជ្រៅជម្រៅជិត១០ម៉ែត្រ បង្កឲ្យបាក់ដីលំនៅដ្ឋាន និងដីស្រែរបស់ពួកគាត់ចំនួន០៨គ្រួសារ។
ទី២- សូមឲ្យម្ចាស់រថយន្តដឹកដី ផ្ទុកតាមបច្ចេកទេស និងគ្រប កុំឲ្យអាចម៍ដីធ្លាក់តាមដងផ្លូវក្នុងក្រុង។
ទី៣- សូមឲ្យស្រោចទឹកលើផ្លូវលំ កុំឲ្យហុយធូលីដីលើផ្ទះប្រជាពលរដ្ឋ។
ការសំណូមពរខាងលើនេះ កើតឡើងនៅរសៀលថ្ងៃទី២៩ ខែមេសា ឆ្នាំ២០២៣ ស្ថិតនៅភូមិតារាងបាល់ សង្កាត់គយត្របែក ក្រុងស្វាយរៀង និងនៅភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង។
បើតាមក្រុមប្រឹក្សាសង្កាត់គយត្របែក បានឲ្យដឹងថា ម្ចាស់អាជីវកម្មជីករណ្តៅដី យកអាចម៍ដីលក់នេះ មានឈ្មោះ នួន តុលា ភេទប្រុស អាយុ៣៥ឆ្នាំ (ជាម្ចាស់ដីឡូតិ៍នៅភូមិតារាងបាល់) មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង។ ហើយនៅក្នុងកិច្ចសន្យា នៃច្បាប់ធ្វើអាជីវកម្ម គឺជីករណ្តៅជម្រៅ០៥ម៉ែត្រ និងទុកចំណីរណ្តៅទំហំ០៥ម៉ែត្រ បើមានផលប៉ះពាល់ ត្រូវសងសំណងជូនប្រជាពលរដ្ឋ។ ក៏ប៉ុន្តែជាក់ស្តែង ម្ចាស់អាជីវកម្ម អនុវត្តខុសកិច្ចសន្យា ដោយជីករណ្តៅដីជ្រៅ ជម្រៅជិត១០ម៉ែត្រ ហើយទុកចិញ្ចើមចំណីរណ្តៅដីតែ២ម៉ែត្រ បង្កឲ្យបាក់ដីលំនៅដ្ឋាន និងដីស្រែរបស់ប្រជាពលរដ្ឋ និងដឹកដីលើសទ្រុងបង្កឲ្យធ្លាក់អាចម៍ដីលើផ្លូវក្រាលកៅស៊ូ បង្កឲ្យហុយ និងរអិលពិបាកក្នុងការធ្វើដំណើររបស់ប្រជាពលរដ្ឋទៀតផង។
ទាក់ទិនករណីខាងលើនេះដែរ លោក បាត់ សាក់ ប្រធានការិយាល័យធនធានរ៉ែ នៃមន្ទីររ៉ែ និងថាមពលខេត្ត បានឲ្យដឹងថា ច្បាប់អនុញ្ញាត គឺឲ្យជីកជម្រៅ៥ម៉ែត្រ និងទុកចំណីរណ្តៅ០៥ម៉ែត្រ បើម្ចាស់អាជីវកម្មណាអនុវត្តខុសច្បាប់អនុញ្ញាត ជីកជម្រៅជ្រៅដល់១០ម៉ែត្រ លោកនឹងចុះទៅពិនិត្យមើលនៅថ្ងៃស្អែក គឺថ្ងៃទី៣០ ខែមេសា ឆ្នាំ២០២៣នេះ។ ហើយបើមានផលប៉ះពាល់ដីស្រែរបស់ប្រជាពលរដ្ឋ លោកនឹងសុំគោលការណ៍កោះហៅដោះស្រាយឲ្យគ្រប និងស្រោចទឹកកុំឲ្យហុយធូលីដីទៅលើផ្ទះប្រជាពលរដ្ឋ។
ចំណែកលោក នួន តុលា ម្ចាស់អាជីវកម្មជីករណ្តៅដីយកអាចម៍ដីលក់វិញ ក៏បានបំភ្លឺនៅរសៀលថ្ងៃទី២៩ ខែមេសា ឆ្នាំ២០២៣ នេះដែរថា លោកគ្រាន់តែជាម្ចាស់រណ្តៅដី លោកបានលក់ដីឲ្យម្ចាស់គ្រឿងចក្រឈ្មោះជំខាន់ ជាអ្នកជីកយកអាចម៌ដីលក់បន្ត។ ហើយកន្លងមក កន្លែងស្រុតផ្លូវ លោកចៅសង្កាត់ព្រៃឆ្លាក់ បានឲ្យឈ្មោះជំខាន់ ដឹកក្រួសថ្មមកលុប និងឈូសបង្ក្រាបវិញហើយ។ មិនត្រឹមតែប៉ុណ្ណោះ អាជ្ញាធរក៏បានឲ្យក្រុមគ្រឿងចក្រ ស្រោចទឹកដីកុំឲ្យហុយលើផ្ទះប្រជាពលរដ្ឋជាប្រចាំ ក៏ប៉ុន្តែម្ចាស់គ្រឿងចក្រមិនអនុវត្តតាមកិច្ចសន្យាឡើយ។
លោក នួន តុលា ម្ចាស់អាជីវកម្មជីករណ្តៅដីយកអាចម៍ដីលក់ បានបំភ្លឺបន្តថា ហើយច្បាប់ឲ្យជីកជម្រៅ៥ម៉ែត្រ ខ្លួនបានបង់សួយសារ.ក រីឯជីកថែមជម្រៅ៥ម៉ែត្រទៀត (១០ម៉ែត្រ) គឺបង់សួយសា.ករឲ្យមន្ទីររ៉ែ និងថាមពលខេត្តស្វាយរៀងបន្ថែម គឺមិនខុសច្បាប់ទេ មន្ទីរអនុញ្ញាត និងបង់សួយសា.កររួចហើយ បើមិនបង់ប្រាក់ឲ្យសាកមើល មិនអាចជីករណ្តៅដីបាននោះទេ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ