តារាចម្រៀង និងសម្តែងនាង ឌី សូនីតា ចេញមុខប្រតិកម្មតបភ្លាមៗទៅកាន់តារាស្រីមួយរូប ដែលធ្វើការវែកញែកពាក់ព័ន្ធទៅនឹងជីវិតឯកជនរបស់នាង ដោយលើកឡើងថា
រាជធានីភ្នំពេញ ៖ តារាចម្រៀង និងសម្តែងនាង ឌី សូនីតា ចេញមុខប្រតិកម្មតបភ្លាមៗទៅកាន់តារាស្រីមួយរូប ដែលធ្វើការវែកញែកពាក់ព័ន្ធទៅនឹងជីវិតឯកជនរបស់នាង ដោយលើកឡើងថា «អតីតស្វាមីលោក អេឡិច ហ្សូរ៉ា មិនមែនជាឪពុកពិតប្រាកដរបស់កូននាងនាពេលបច្ចុប្បន្ននេះឡើយ»។
តារាសម្តែង និងបង្ហាញម៉ូដមួយរូប បានធ្វើការចែកចាយនូវព័ត៌មានក្នុងស្រុកមួយ ដែលចុះផ្សាយអំពីជីវិតឯកជនរបស់អ្នកនាង ឌី សូនីតា ដែលរស់មានឈ្មោះជាស្ត្រីមេម៉ាយយ៉ាងរឹងមាំ ក្រោយពីចែកផ្លូវគ្នាជាមួយនឹងលោក អេឡិច ហ្សូរ៉ា អស់រយៈពេលប៉ុន្មានឆ្នាំមកនេះ។ ទំនងជាបានដឹងអំពីរឿងរ៉ាវនៃទំនាក់ទំនងក្លែងក្លាយរវាង ឌី សូនីតា និង អេឡិច ហ្សូរ៉ា តារាស្រីរូបនោះក៏លើកឡើងដោយចង់ឲ្យមានការបកស្រាយឲ្យបានច្បាស់ពីរឿងរ៉ាវមួយនេះ ដើម្បីបញ្ចប់ការយល់ច្រឡំពីមហាជន ខណៈពេលដែលមានអ្នកខ្លះលើកឡើងចំៗថា «លោក អេឡិច ហ្សូរ៉ា មិនមែនជាឪពុករបស់កូន ឌី សូនីតា នោះឡើយ»។
ការវែកញែកខាងលើនេះ បានធ្វើឲ្យអ្នកនាង ឌី សូនីតា ហាក់នៅមិនសុខ ក្នុងពេលដែលមានមិត្តភក្តិ និងគ្រួសាររបស់នាងឆាតមកសាកសួរអំពីបញ្ហានេះ ស្ទើរតែផ្ទុះទូរស័ព្ទទៅហើយ ទើបនាងសម្រេចចិត្តចេញមុខបកស្រាយឲ្យមហាជនបានដឹងតែម្តង។
តារាចម្រៀង និងសម្តែងអ្នកនាង ឌី សូនីតា បានបកស្រាយតាមរយៈសារបង្ហោះនៅលើបណ្តាញសង្គមថា «ថ្ងៃនេះ ទូរស័ព្ទខ្ញុំជិតផ្ទុះដោយសារមានសារជាច្រើនផ្ញើមក មើលហើយក៏ស្លុតចិត្ត ជាពិសេសលឺម្តាយទាំងសងខាងរបស់ពួកខ្ញុំឆាតមក ខ្ញុំមានអារម្មណ៍ថា ខុសធ្ងន់ទៀតហើយ ដែលធ្វើអោយពួកគាត់ពិបាកចិត្តដោយសារទង្វើរបស់ពួកខ្ញុំ»។
អ្នកនាងបញ្ជាក់ថា «មានមនុស្សជាច្រើនដែលចង់ដឹងរឿងរបស់ពួកខ្ញុំ ហើយពួកខ្ញុំមិនទម្លាប់យករឿងដែលអវិជ្ជមានបង្ហាញនៅលើបណ្តាញសង្គមទេ។ ពួកខ្ញុំខំស្ងាត់កន្លងមក ក៏ដោយសារតែគិតថា រឿងរបស់ពួកខ្ញុំ អ្នកណាខុស ឬត្រូវក៏ជារឿងរបស់ពួកខ្ញុំ ជីវិតរបស់ពួកខ្ញុំ ការពិតបែបណា ទោះបីជាបង្ហាញ ឬមិនបង្ហាញអោយគេដឹង ក៏នៅតែជារឿងរបស់ពួកខ្ញុំ ពួកខ្ញុំអ្នកជួប ពួកខ្ញុំអ្នកដោះស្រាយ។ ចម្លែកអី តែបងស្រីនោះយករឿងរបស់ពួកខ្ញុំមកវែកញ៉ែករកហេតុផល»។
អ្នកនាង ឌី សូនីតា បញ្ជាក់បន្តថា «បងស្រី ខ្ញុំនិយាយត្រង់ ខ្ញុំមិនដែលមានរឿងជាមួយបងសូម្បីតែម្តង ទោះបីជាកន្លងមក បងបានធ្វើអ្វីខ្លះ និងនិយាយអ្វីខ្លះដាក់ខ្ញុំ ក៏ខ្ញុំនៅតែមិនមាត់។ ហើយបងដឹងថា ខ្ញុំដឹងរឿងមកពីណាទេ គឺបងប្រុសជាអ្នកប្រាប់ខ្ញុំ ហើយអោយខ្ញុំស្ងាត់ រហូតមកដល់ពេលនេះ។ ពេលដែលពួកខ្ញុំបញ្ចប់ទំនាក់ទំនងជាង១ឆ្នាំមកហើយ បងក៏វ៉ៃប្រ.ហារខ្ញុំចំមុខតែម្តង។ បងស្រី និយាយមកហាក់ដឹងច្បាស់ថា ជីវិតពួកខ្ញុំពីរនាក់បានជួបរឿងអីខ្លះចឹង នៅមកភ្ជាប់ប្រធានបទកូនស្រីខ្ញុំចូលទៀត»។
នាងបន្តថា «ខ្ញុំបញ្ជាក់ប្រាប់បងដោយបើកចំហដែរចុះថា ទោះកូនខ្ញុំ ឪពុកជាអ្នកណាក៏ជារឿងរបស់ពួកខ្ញុំ សំខាន់ពួកខ្ញុំទទួលនឹងប្រឈមមុខទៅថ្ងៃមុខជាមួយគ្នាបែបណា? ពួកខ្ញុំបានដើរតួនាទីធ្វើឪពុកម្តាយគេបានដោយល្អកំរឹតណា? ដោយមានទំនួលខុសត្រូវបែបណា? បន្ទាប់ពីការដែលខ្វែងគំនិតគ្នា មានរឿងជាច្រើនដែលកើតឡើងក្នុងជីវិតពួកខ្ញុំ ពួកខ្ញុំក៏សម្រេចចិត្តបញ្ចប់ បញ្ចប់ដោយស្ងប់ស្ងាត់ ដោយអភ័យ ដោយសន្តិវិធី ដោយអស់ចិត្ត ហើយមិនព្យាយាមលាតត្រដាងទេ ព្រោះគិតដល់កូន។ ហេតុអីពេលនេះបងទើបមកបើកកកាយវែកញែក? ខ្ញុំគិតថា បងជាម្តាយគេមួយរូប បងគួរតែយល់ក្នុងនាមជាម្តាយ តែមើលទៅបងហាក់ដូចជាចង់បានអ្វីម្យ៉ាងទាំងដែលមិនមែនរឿងរបស់បង»។
អ្នកនាង ឌី សូនីតា បន្តទៀតថា «បងនិយាយមកហាក់ទាមទារយុត្តិធម៌អោយបងសូរ៉ា ទាំងដែលបងមិនបានដឹងហេតុផលពួកយើងទាំងពីរអោយច្បាស់នៅឡើយ។ បងគិតតែប៉ុននេះចុះ ជីវិតមួយនេះវាមិនស្រស់បំព្រងដូចអ្វីដែលយើងគិត និងប៉ងទេ គ្មានអ្នកណាម្នាក់ចង់មានរឿងអោយឈឺក្បាលទេ ពួកខ្ញុំក៏មិនទម្លាប់ចង់ល្បីដោយសាររឿងមិនល្អដែរ»។
នាងបន្ថែមថា «ពួកខ្ញុំបានមកដល់ដំណាក់កាលនេះ មិនមែនតិចដងទេ ដែលពួកយើងព្យាយាមផ្សះផ្សារគ្នារកចំណុចកណ្តាលដើម្បីបន្ត ប៉ុន្តែជីវិតពួកខ្ញុំក៏វាមិនដូចអ្វីដែលមហាជន ក៏ដូចជាបងស្រីគិត រឿងពួកខ្ញុំវានៅតែជារឿងពួកខ្ញុំដដែល ទោះបីបងគិតថា ដឹងច្បាស់ក៏នៅតែមិនច្បាស់។ មនុស្សពីរនាក់បើសុទ្ធតែជាអ្នកត្រូវ ក៏មិនបែកបាក់គ្នាដែរ វាមានហេតុនិងផល ហើយហេតុផលអស់ទាំងនោះ គឺនៅតែជារឿងផ្ទៃក្នុងរបស់ពួកខ្ញុំ សំខាន់ថា តើយើងរើសផ្លូវមួយណាដែលជាជម្រើសល្អសម្រាប់រវាងគ្នានិងគ្នា?។ មកដល់ពេលនេះ ខ្ញុំមិនដែលនិយាយថា អ្នកណាត្រូវ អ្នកណាខុស ដឹងតែម្យ៉ាងគឺបញ្ចប់ទំនាក់ទំនងរួចហើយ។ បងសូរ៉ា ជាមនុស្សតែម្នាក់ដែលមិនទម្លាប់និយាយរឿងអវិជ្ជមានរបស់ខ្លួនទៅកាន់ក្រុមគ្រួសារទេ ព្រោះគាត់ស្រលាញ់ម្តាយគាត់ណាស់ ហើយដោយសារតែបែបនេះ ទើបពួកខ្ញុំក៏មិនចង់បង្ហាញពីរឿងអវិជ្ជមានមួយចំនួនទៅកាន់ពួកគាត់ដែរ រឿងរបស់ពួកខ្ញុំមួយចំនួន សូម្បីតែអ្នកម្តាយពួកយើងក៏មិនដឹងផង»។
នាងបន្ថែមទៀតថា «ពួកគាត់ចាស់ៗហើយ មិនគួរមកពិបាកចិត្តខ្លាំងដោយសារពួកខ្ញុំ តែទីបញ្ចប់បងស្រីក៏លើកយករឿងហ្នឹងមកវែកញ៉ែកអោយគ្រួសារខ្ញុំទាំងពីរពិបាកចិត្ត រហូតដល់ប៉ះពាល់អារម្មណ៍ពួកគាត់។ បងស្រីមិនខ្លាចបាបកម្មដោយមិនដឹងខ្លួន ដោយសារតែទង្វើដែលឈឺឆ្អាលរឿងរបស់អ្នកដទៃហួសហេតុចឹងទេ?»។
យ៉ាងណាបើតាម ឌី សូនីតា ថា «ខ្ញុំពិតជាសោកស្តាយនៅកំហុសរបស់ខ្ញុំដែលធ្វើជាម្តាយគេមិនបានល្អ ហើយអោយគេលើកយកកូនមកធ្វើជាប្រធានបទបែបពេបជ្រាយគាត់ទាំងដែលគាត់មិនទាន់ដឹងអី ឈឺណាស់ឈឺពិតមែន ។ ជាចុងក្រោយ ខ្ញុំសូមផ្តាំទៅបងស្រីវិញថា ទោះបីជាកូនស្រីខ្ញុំ ជាកូន ឬមិនមែនកូនរបស់បងសូរ៉ា ក៏គាត់នៅតែជាកូនរបស់ខ្ញុំ មិនមែនជាកូនស្រីរបស់ប្តីបងទៅបានហើយ ហើយរឿងបងបំផ្លើសការពិតដែលថា ឪពុកកូនខ្ញុំជាអ្នកណា និយាយដូចការពិតនោះ បងចាំត្រៀមខ្លួនផង។ បញ្ជាក់ ៖ ចាប់ពីពេលនេះ ម៉ោងនេះ កូនខ្ញុំ ជាកូនរបស់ ឌី សូនីតា តែម្នាក់ មិនមានឪពុកទេ បងសូរ៉ាក៏មិនត្រូវជាអ្វីនឹងកូនខ្ញុំ ហើយនឹងខ្ញុំដែរ។ កូនខ្ញុំគ្មានឪពុកតាំងពីដើម សូមបញ្ចប់ប្រធានបទ ម៉ែកូនខ្ញុំទៅ កុំធ្វើអោយពួកខ្ញុំក្លាយទៅជាជនជាប់ចោទទៅវិញ ខ្ញុំឈឺកន្លងមក គ្រប់គ្រាន់ពេកហើយបញ្ចប់ទៅ»៕
ចែករំលែកព័តមាននេះ