ឥណ្ឌាក្លាយជាប្រទេសមានប្រជាជនច្រើនជាងគេបំផុតលើពិភពលោក
ប្រទេសឥណ្ឌា ៖ តាមរបាយការណ៍មួយរបស់មូលនិធិអ.ស.បសម្រាប់ប្រជាជនUNFPA ចេញផ្សាយ
ប្រទេសឥណ្ឌា ៖ តាមរបាយការណ៍មួយរបស់មូលនិធិអ.ស.បសម្រាប់ប្រជាជនUNFPA ចេញផ្សាយកាលពីថ្ងៃទី១៩មេសាថា ចំនួនប្រជាជនឥណ្ឌា មកដល់ដំណាច់ខែមិថុនានឹងមានដល់ទៅ១,៤២៨៦ពាន់លាននាក់។ នេះជាតួលេខមួយដែលចំនួនប្រជាជនឥណ្ឌានឹងមានលើសពីនេះដល់ដំណាច់ខែឧសភានោះ។ ដូច្នេះឥណ្ឌាក្លាយជាប្រទេសមានប្រជាជនច្រើនជាងគេបំផុតលើពិភពលោកវ៉ាដាច់ចិន។
គេដឹងថាចំនួនប្រជាជនចិនមានការចុះថយបន្តិចកាលពីឆ្នាំទៅមិញ គឺពី១,៤១២ពាន់លាននាក់មកនៅត្រឹម១,៤១១ ពាន់លាននាក់ មានន័យថាចុះថយចំនួន៨៥០.០០០នាក់។ បែបនេះមានជាលើកដំបូង ចាប់តាំងពីជាង៦០ឆ្នាំមកហើយ។
ទោះបីជាការិយាល័យស្ថិតិជាតិចិនតែងបញ្ចេញជាទៀងទាត់ បណ្ដាទិន្នន័យស្ដីពីស្ថិតិទាក់ទិននឹងប្រជាសាស្ត្ររបស់ប្រទេសក្ដី ឥណ្ឌាទើបចេញផ្សាយពីទិន្នន័យនោះ។ តាមពិតទៅរដ្ឋាភិបាលឥណ្ឌាពុំបានធ្វើការជំរឿនប្រជាជនចាប់តាំងពីឆ្នាំ២០១១មក ក៏ទោះបីមានការប៉ុនប៉ងមិនសម្រេចក្នុងឆ្នាំ២០២១ ដោយសារការឆ្លងរាលដាលនៃកូវីដ។ ម្យ៉ាងវិញទៀតបញ្ហាប្រជាសាស្ត្រ ក្លាយជាបញ្ហានយោបាយដ៏រសើបមួយ សម្រាប់រដ្ឋាភិបាលឥណ្ឌា។
នាយករដ្ឋមន្ត្រីឥណ្ឌាលោកណារេនដ្រាម៉ូឌី រងការចោទប្រកាន់ពីពួកប្រឆាំងថា មានបំណងអូសបន្លាយការធ្វើជំរឿនពីចំនួនប្រជាជន ក្នុងគោលបំណងមិនចេញផ្សាយបណ្ដាទិន្នន័យដែលចាត់ទុកថារសើប ដូចជាទិន្នន័យពីចំនួនអ្នកឥតការងារធ្វើជាដើម ព្រោះគិតថាអាចប៉ះពាល់ដល់ការបោះឆ្នោតជាតិដែលត្រូវធ្វើនាឆ្នាំខាងមុខ។
តាមរបាយការណ៍មួយរបស់ អ.ស.ប ចេញផ្សាយកាលពីឆ្នាំ២០២២ថា ចំនួនប្រជាជនលើពិភពលោកកើនដល់លើសពី៨ពាន់លាននាក់ ក្នុងខែវិច្ឆិកាឆ្នាំ២០២២ ហើយចំនួនប្រជាជនពិភពលោកនឹងមានដល់ជិត១០ពាន់លាននាក់រហូតដល់ឆ្នាំ២០៥០។ ចំនួនប្រជាជនពិភពលោកមកដល់ឆ្នាំ១៩៧៥មានត្រឹមតែ៤ពាន់លាននាក់៕
ចែករំលែកព័តមាននេះ