ក្បាច់គុនល្បុក្កតោខ្មែរ ត្រូវបានចុះបញ្ជីជាសម្បត្ដិបេតិកភណ្ឌអរូបីនៃមនុស្សជាតិរបស់អង្គការយូណេស្កូហើយ។ ក្បាច់គុនល្បុក្កតោខ្មែរនេះ ក៏បានផ្តល់អត្ថប្រយោជន៍ជាច្រើនសម្រាប់រាងកាយ និងស្មារតី ព្រមទាំង
ខេត្តសៀមរាប ៖ ក្បាច់គុនល្បុក្កតោខ្មែរ ត្រូវបានចុះបញ្ជីជាសម្បត្ដិបេតិកភណ្ឌអរូបីនៃមនុស្សជាតិរបស់អង្គការយូណេស្កូហើយ។ ក្បាច់គុនល្បុក្កតោខ្មែរនេះ ក៏បានផ្តល់អត្ថប្រយោជន៍ជាច្រើនសម្រាប់រាងកាយ និងស្មារតី ព្រមទាំងធ្វើឱ្យរាងកាយអាចបត់បែន ដោយមានភាពរហ័សរហូន និងជាសិល្បៈតស៊ូមួយដែលអាចយកមកប្រើប្រាស់ការពារខ្លួនជាដើម។
កម្មវិធីនេះ នឹងមានការសម្ដែងហាត់សមក្បាច់គុន ការនិទានរឿងអំពីគុនល្បុក្កតោ និងពិព័រណ៍គ្រឿងសព្វាវុធ ព្រមទាំងមានល្បែ.ងកម្សាន្តជាច្រើនទៀតទាក់ទងនឹងក្បាច់គុនល្បុក្កតោផងដែរ។ ក្រៅពីការសម្តែង «ទ្វារមេគុន» យើងក៏នឹងរៀបចំការប្រកួតជាលក្ខណៈមិត្តភាពមួយក្នុងចំណោមកីឡាករ កីឡាការិនីក្បាច់គុនល្បុក្កតោអាជីពផងដែរ។
តាមរយៈក្រុមការងាររៀបចំ បានឱ្យដឹងថា ដោយមានការស្នើសុំពីបណ្តាសមាគមគុនល្បុក្កតោ ក៏ដូចជាកីឡាករអាជីពជាច្រើនដែលចង់ឱ្យមានការរៀបចំ ការប្រកួតគុនល្បុក្កតោនៅក្នុងព្រឹត្តិការណ៍អង្គរសង្ក្រាន្តឆ្នាំ២០២៣នេះ។ ហើយក្រុមការងារក៏បានរៀបចំការប្រកួតជាលក្ខណៈមិត្តភាព ដើម្បីបង្កើនបរិយាកាសសប្បាយរីករាយមួយកម្រិតថែមទៀត។ ម្យ៉ាងវិញទៀត តាមរយៈការសិក្សាស្រាវជ្រាវ ដែលមានភស្តុតាងនៅលើចម្លាក់ថ្មតាមជញ្ជាំងប្រាសាទក្នុងតំបន់អង្គរ និងរូបភាព ការរៀបចំការប្រកួតគុនល្បុក្កតោ នៅមុខប្រាសាទអង្គរវត្ត នាដើមសតវត្សទី១៩ ការប្រកួតគុនល្បុក្កតោ គឺជាប្រពៃណីទំនៀមទម្លាប់ដែលបុព្វបុរសខ្មែរយើង តែងតែរៀបចំធ្វើនៅក្នុងឱកាសមានបុណ្យជាតិធំៗ ដូចជាបុណ្យចូលឆ្នាំជាដើម។
ចំពោះការប្រកួតគុនល្បុក្កតោ នៅក្នុងព្រឹត្តិការណ៍អង្គរសង្ក្រាន្តនេះ គណៈកម្មការរៀបចំ និង សហព័ន្ធកីឡា គុនល្បុក្កតោកម្ពុជា បានដាក់លក្ខខណ្ឌយ៉ាងល្អិតល្អន់ក្នុងការប្រកួត ដោយមានការត្រួតពិនិត្យ និងការដាក់ឧបករណ៍ការពារ ដើម្បីចៀសវាងគ្រោះថ្នាក់ជាយថាហេតុ ៕
ចែករំលែកព័តមាននេះ