ថ្ងៃទី០១ ឬថ្ងៃដំបូង នៃពីធីបុណ្យចូលឆ្នាំថ្មីប្រពៃណីខ្មែរ គឺថ្ងៃទី១៤ ខែមេសា ឆ្នាំ២០២៣នេះ ខេត្តបាត់ដំបង ទទួលស្វាគមន៍ភ្ញៀវជាតិ និងអន្តរជាតិធ្វើដំណើរមកកម្សាន្តយ៉ាងតិចជាង៣០ម៉ឺននាក់
ខេត្តបាត់ដំបង ៖ ថ្ងៃទី០១ ឬថ្ងៃដំបូង នៃពីធីបុណ្យចូលឆ្នាំថ្មីប្រពៃណីខ្មែរ គឺថ្ងៃទី១៤ ខែមេសា ឆ្នាំ២០២៣នេះ ខេត្តបាត់ដំបង ទទួលស្វាគមន៍ភ្ញៀវជាតិ និងអន្តរជាតិធ្វើដំណើរមកកម្សាន្តយ៉ាងតិចជាង៣០ម៉ឺននាក់។ នេះបើតាមប្រសាសន៍លោក សុខ លូ អភិបាលខេត្តបាត់ដំបង ដែលបានថ្លែងប្រាប់កោះសន្តិភាព នៅព្រឹកថ្ងៃទី១៥ ខែមេសា ដោយនេះគឺជាមោទនភាពក្រៃលែងជាមួយនឹងកំណើននៃភ្ញៀវទេសចរកើតឡើងយ៉ាងភ្លូកទឹកភ្លូកដី។
លោក សុខ លូ មានប្រសាសន៍ឱ្យដឹងថា លោកបានទទួលរបាយការណ៍ស្ដីពីដំណើរកម្សាន្តរបស់ភ្ញៀវទេសចរ ដែលធ្វើដំណើរចូលមកកម្សាន្តក្នុងទឹកដីខេត្តបាត់ដំបង សម្រាប់ថ្ងៃដំបូង (ថ្ងៃទី១៤ ខែមេសា ឆ្នាំ២០២៣) នៃពិធីបុណ្យចូលឆ្នាំថ្មីប្រពៃណីខ្មែរក្នុងឆ្នាំនេះ គឺមានភ្ញៀវជាតិនិងអន្តរជាតិ រហូតដល់ទៅជាង៣០ម៉ឺននាក់ឯណោះ។
លោកបញ្ជាក់ថា របាយការណ៍នេះ ខាងមន្ទីរទេសចរណ៍ខេត្តបានរាយការណ៍ជូនលោក ដោយគិតត្រឹមល្ងាចថ្ងៃទី១៤ ខែមេសា ដែលជាថ្ងៃទី០១ ឬថ្ងៃដំបូង នៃពិធីបុណ្យឆ្នាំខ្មែរ។
ហើយនៅក្នុងរបាយការណ៍បឋម ដែលរៀបចំដោយមន្ទីរទេសចរណ៍ខេត្ត បានឲ្យដឹងថា សម្រាប់ថ្ងៃទី០១ នៃពិធីចូលឆ្នាំថ្មីប្រពៃណីខ្មែរ គឺថ្ងៃទី១៤ ខែមេសា ឆ្នាំ២០២៣ ខេត្តបាត់ដំបង ទទួលបានភ្ញៀវទេសចរចូលមកកម្សាន្តសរុបជាង៣០ម៉ឺននាក់ ក្នុងនោះមានភ្ញៀវទេសចរអន្តរជាតិជាង៦៨០នាក់។ មន្ទីរទេសចរណ៍ បានផ្ដោតលើគោលដៅទេសចរណ៍សំខាន់ៗជាច្រើននៅក្នុងខេត្ត ដែលទាក់ទាញភ្ញៀវទេសចរឲ្យធ្វើដំណើរទៅកម្សាន្តក្នុងឱកាសបុណ្យចូលឆ្នាំថ្មីប្រពៃណីខ្មែរនាឆ្នាំនេះ។ ប៉ុន្តែគោលដៅដែលគេចាត់ទុកថា ល្អនិងសំខាន់ ហើយទាក់ទាញចំណាប់អារម្មណ៍ភ្ញៀវខ្លាំងបំផុត គឺកន្លែង «សង្ក្រាន្ត» ដ៏ធំនៅក្នុងវិទ្យាល័យនេតយ៉ង់ និង «តំបន់ត្រជាក់» នៅជិតរង្វង់មូលលោកតាដំបងគ្រញូង ក្នុងក្រុងបាត់ដំបង។ ហើយកន្លែង «សង្ក្រាន្ត» មានរៀបចំលេងល្បែ.ងប្រជាប្រិយផ្សេងៗ រីឯ «តំបន់ត្រជាត់» វិញ មានរថយន្តបាញ់ពពុះទឹក និងការប្រគំតន្ត្រីកម្សាន្តផងដែរ។
របាយការណ៍បានបញ្ជាក់ថា សម្រាប់ថ្ងៃដំបូង នៃពិធីបុណ្យចូលឆ្នាំថ្មីប្រពៃណីខ្មែរនេះ គ្រាន់តែគោលដៅ «តំបន់ត្រជាក់» នៅក្បែររង្វង់មូលលោកតាដំបងគ្រញូងមួយនេះ ទទួលស្វាគមន៍ភ្ញៀវជាតិ និងអន្តរជាតិ រហូតដល់ទៅជាង៩ម៉ឺននាក់ឯណោះ។
ជាមួយនឹងមោទនភាព នៃកំណើនភ្ញៀវទេសចរច្រើនភ្លូកទឹកភ្លូកដីបែបនេះ អភិបាលខេត្តបាត់ដំបង លោក សុខ លូ មានប្រសាសន៍យ៉ាងដូច្នេះថា «ខេត្តបាត់ដំបង ទទួលបានភ្ញៀវចូលមកកម្សាន្តច្រើនអនេកបែបនេះ ក៏ដោយសារតែឆ្នាំនេះ យើងរៀបចំកន្លែងកម្សាន្តបានល្អ ខេត្តយើងមានរមណីយ៍ដ្ឋានច្រើន ហើយផ្លូវធ្វើដំណើរឆ្លងកាត់ខេត្ត និងផ្លូវធ្វើដំណើរទៅកាន់រមណីយ៍ដ្ឋាននានា ក៏ល្អប្រសើរទៀត។ ដូច្នេះហើយ ទើបភ្ញៀវទេសចរកាន់តែច្រើនចាប់អារម្មណ៍ចូលមកលេងខេត្តបាត់ដំបង»។
លោកអភិបាលខេត្ត បញ្ជាក់ផងដែរថា «សម្រាប់ពិធីបុណ្យឆ្នាំថ្មីប្រពៃណីខ្មែរឆ្នាំនេះ យើងបានរៀបចំទីកន្លែងដើរលេងកម្សាន្តនានា បានល្អ និងធំដុំជាងឆ្នាំមុនៗ ស្ទើរគ្រប់កន្លែង នៅតាមវត្តអារ៉ាម និងនៅតាមសាលារៀនផងដែរ ហើយអាជ្ញាធរបានរៀបចំធ្វើ ដើម្បីឲ្យពលរដ្ឋនៅក្នុងមូលដ្ឋាន រួមទាំងភ្ញៀវទេសចរក្រៅស្រុកផង ចូលរួមកម្សាន្ត»។
លោក សុខ លូ បានកត់សម្គាល់ផងដែរ អំពីកំណើនភ្ញៀវទេសចរសម្រាប់ពិធីបុណ្យចូលឆ្នាំថ្មីនេះ ដោយលោកលើកឡើងថា «ការរៀបចំសង្ក្រាន្តដ៏ធំសម្បើមនៅក្នុងវិទ្យាល័យ «នេតយ៉ង់» និង «តំបន់ត្រជាក់» នៅជិតរង្វង់មូលលោកតាដំបងគ្រញូង ក្នុងក្រុងបាត់ដំបង ឬនៅតាមរមណីយ៍ដ្ឋាននានា និងតាមបណ្ដាស្រុក ព្រមទាំងតាមតំបន់ព្រៃភ្នំ ដែលមានទឹកធ្លាក់ គឺជាមូលហេតុដ៏សំខាន់បំផុតក្នុងការទាក់ទាញចំណាប់អារម្មណ៍ភ្ញៀវទេសចរ ទាំងភ្ញៀវជាតិ និងភ្ញៀវអន្តរជាតិ ឲ្យធ្វើដំណើរចូលមកកម្សាន្តនៅក្នុងខេត្តបាត់ដំបង។
ប៉ុន្តែលោកអភិបាលខេត្តក៏បានលើកយកមកនិយាយផងដែរ អំពីកិច្ចការងារ ការពារសន្តិសុខ និងសណ្ដាប់ធ្នាប់ជូនប្រជាពលរដ្ឋ និងភ្ញៀវទេសចរជាតិ និងអន្តរជាតិ ដែលធ្វើដំណើរមកលេងខេត្តបាត់ដំបង។ លោកអភិបាលខេត្ត ថ្លែងថា ចាប់តាំងពីថ្ងៃចាប់ផ្ដើមដំបូង នៃការរៀបចំដំណើរការសង្ក្រាន្តឆ្នាំថ្មីនេះ គិតត្រឹមល្ងាចថ្ងៃទី១៤ ខែមេសានេះ បញ្ហាសន្តិសុខហាក់កើតមានឡើងតិចតូចបំផុត តែពុំមានអ្វីធំដុំគួរឲ្យកត់សម្គាល់នៅឡើយទេ។
លោកបញ្ជាក់ថា យើងបានរៀបចំកម្លាំងសមត្ថកិច្ច ការពារសន្តិសុខ និងរៀបចំសណ្ដាប់ធ្នាប់ទាំងនៅក្នុងកន្លែងប្រារព្ធពិធីកម្សាន្ត តាមបណ្ដារមណីយ៍ដ្ឋាននានា និងនៅតាមដងផ្លូវសាធារណៈគ្រប់ច្រកល្ហកទាំងអស់ សុទ្ធតែដាក់កម្លាំងសមត្ថកិច្ចប្រចាំការ ការពារនៅទីនោះគ្រប់ពេលវេលា។ ដោយយោងលើទិដ្ឋភាពជាក់ស្ដែងបែបនេះ លោករំពឹងថា រយៈពេល២ថ្ងៃចុងក្រោយ នៃពិធីបុណ្យចូលឆ្នាំថ្មីប្រពៃណីខ្មែរយើងនេះ ខេត្តបាត់ដំបង នឹងទទួលបានភ្ញៀវទេសចរជាតិ និងអន្តរជាតិចូលមកកម្សាន្តកាន់តែច្រើនទ្វេដងជាក់ជាមិនខានឡើយ៕
ចែករំលែកព័តមាននេះ