រមណីយដ្ឋានទឹកឆា ត្រៀមខ្លួនប្រកួតពានរង្វាន់សម្តេចតេជោ
ខេត្តកំពង់ចាម ៖ ក្រោយពីមានការយកចិត្តទុកដាក់របស់អាជ្ញាធរ ក៏ដូចជាអង្គភាព
ខេត្តកំពង់ចាម ៖ ក្រោយពីមានការយកចិត្តទុកដាក់របស់អាជ្ញាធរ ក៏ដូចជាអង្គភាព
ខេត្តកំពង់ចាម ៖ ក្រោយពីមានការយកចិត្តទុកដាក់របស់អាជ្ញាធរ ក៏ដូចជាអង្គភាពពាក់ព័ន្ធបានធ្វើការអភិវឌ្ឈន៍រមណីយដ្ឋានទឹកឆា មានទីតាំងស្ថិតនៅឃុំបឹងណាយ ស្រុកព្រៃឈរ។ ពីមួយឆ្នាំទៅមួយឆ្នាំត្រង់ចំណុចក្បាលហុង ដែលមានទឹកផុសចេញពីក្នុងដី រហូតត្រូវបានគេចាត់ទុកជារមណីយដ្ឋានគំរូស្អាតជាង គេក្នុងចំណោមជាច្រើនកន្លែងនៅក្នុងខេត្ត។ ហើយនៅព្រឹកថ្ងៃទី១៨ តុលា ២០១៧ ប្រតិភូក្រសួងទេសចរណ៍បានចុះធ្វើការវាយតម្លៃ ដើម្បីឈានទៅទទួលពានរង្វាន់ពីសម្តេចតេជោ ហ៊ុន សែន ផងដែរ។ អាជីវករលក់ដូរម្នាក់នៅតំបន់ក្បាលហុង ក្នុងរមណីយដ្ឋានទឹកឆា ឈ្មោះ អួន ផាន់នី អាយុ២២ឆ្នាំ ប្រាប់ឲ្យដឹងថា ចាប់តាំងពីពេលដែលបានរៀបចំការលក់ដូរនៅទីនេះ គឺបានជាង២ឆ្នាំហើយក្នុងនោះមានម្ហូបគ្រប់ប្រភេទ រួមទាំងមានគ្រែសម្រាប់ឲ្យភ្ញៀវអង្គុយលេង លំហែកាយនៅតាមមាត់អូរដែលមានទឹកហូរធ្លាក់មកពីប្រភទក្បាលហុងមានមិនចេះដាច់។
ថែមទាំងមានពោងសម្រាប់ជួលជិះលេងទឹករាក់ល្មមមិនឲ្យក្មេងលង់ទឹកនោះទេ របរលក់ដូរនេះមានរាល់ថ្ងៃ ហើយការលក់ដូរលើមុខម្ហូបនីមួយៗមិនថ្លៃទេ គឺតំលៃសមរម្យ។ ចំពោះកម្រៃដែលបានមកគឺបានជួយដោះស្រាយជីវភាពគ្រួសារ ក្នុងនោះមានឪពុកម្តាយ ព្រមទាំងក្រុមសាច់ញាតិមានគ្នាដល់ទៅ៦នាក់។ អ្នកលក់ផ្លែអាយឈ្មោះ វង់ គង់ ភេទស្រី អាយុ៣២ឆ្នាំ នៅភូមិតាអុក ឃុំបឹងណាយ ប្រាប់ថា រាល់ថ្ងៃគាត់ និងអ្នកផ្សេងទៀតបានធ្វើនំយកមកពីផ្ទះដើរលក់ត្រង់ចំណុចក្បាលហុង ដែលជាកន្លែងស្រស់ស្អាតជាងនៅទឹកឆានេះ សម្រាប់ថ្ងៃណាលក់ដាក់អាចទទួលបានចំណូលរហូតដល់ទៅ១០ម៉ឺនរៀលក៏មានដែរ ក្នុងនោះដោយបានចិញ្ចឹមកូន និងម្តាយ របរនេះលក់មិនធ្វើអ្នកមាននោះទេ តែគ្រាន់បានដោះស្រាយជីវភាពសមរម្យផងដែរ។
លោក ហេង សេងហួរ ម្ចាស់អាជីវកម្មរមណីយដ្ឋានទឹកឆា ប្រាប់ឲ្យដឹងថា កន្លងមករមណីយដ្ឋានទឹកឆា ដែលមានទីតាំងស្ថិតនៅឃុំបឹងណាយ ស្រុកព្រៃឈរ នេះមិនសូវមានអ្នកណាគេចាប់អារម្មណ៍នោះទេ តែដោយសារមានការយកចិត្តទុកដាក់ពីសំណាក់លោក លន់ លឹមថៃ អតីតអភិបាលខេត្តរួម និងលោក គួច ចំរើន អភិបាលខេត្តថ្មី ក៏ដូចជាស្ថាប័នពាក់ព័ន្ធបានជំរុញការលើកទឹកចិត្តដល់រូបលោកដែលជាអ្នកជួលរមណីយដ្ឋានទឹកឆា ដោយពីមួយឆ្នាំទៅមួយឆ្នាំខិតខំប្រឹងប្រែងធ្វើការអភិវឌ្ឈន៍សួនច្បារ ការដាំកូនឈើនៅតាមដងផ្លូវ និងដាំផ្កាដើម្បីឲ្យមានសោភ័ណភាពកាន់ស្អាត។ លោក ហេង សេងហួរ អ្នកគ្រប់គ្រងរមណីយដ្ឋានទឹកឆា ប្រាប់បន្តថា ដំបូងមានអ្នកលក់ដូរតិចនាក់ទេតែដោយសារគេឃើញរូបលោកមានផែនការអភិវឌ្ឈន៍ច្បាស់លាស់ ហើយនៅព្រឹកថ្ងៃទី១៨ តុលា ២០១៧ ក្រុមមន្ត្រីរបស់ក្រសួងទេសចរណ៍ បានចុះមកលើកទឹកចិត្តដោយបានខិតខំធ្វើយ៉ាងណាឲ្យមានអនាម័យ និងបរិស្ថានល្អ ក្នុងការទាក់ទាញភ្ញៀវទេសចរណ៍ឲ្យមកកម្សាន្តលេងកាន់តែច្រើន។
ក្នុងពេលខាងមុខអាជ្ញាធរខេត្តក៏បានប្តេជ្ញាចិត្តថា នឹងជួយតបណ្តាញចរន្តអគ្គីសនីឲ្យបានចូលមកដល់ ហើយសម្រាប់សេវាទូរស័ព្ទដែលខ្សោយ សូមខាងអង្គភាពពាក់ព័ន្ធជួយសម្រួលផង។ចំពោះទុនរបស់លោកមានទឹកប្រាក់ទំហំ១លានដុល្លារ រួមមានទាំងការធ្វើផ្ទះទឹកផងដែរ។ លោក ស៊ាន សុគុណ ប្រធានមន្ទីរទេសចរណ៍ខេត្ត មានប្រសាសន៍ឲ្យដឹងដែរថា តំបន់រមណីយដ្ឋានទឹកឆាត្រូវបានចាត់ទុកជារមណីយដ្ឋានគំរូស្អាតជាងគេនៅក្នុងខេត្ត ដើម្បីត្រៀមប្រលងប្រណាំងទូទាំងប្រទេស ហើយក៏មានប្រតិភូក្រសួងទេសចរណ៍បានចុះវាយតម្លៃផងដែរ។ ដើម្បីទទួលពាន់រង្វាន់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ជាមួយនោះរូបលោកបានចាត់ឲ្យអ្នកគ្រប់គ្រងរមណីយដ្ឋានទឹកឆា ត្រូវប្រឹងសម្អាតបរិស្ថានឲ្យបានស្អាត មិនត្រូវចោលសំរាមក្នុងទឹកនោះទេ៕
ចែករំលែកព័តមាននេះ