កាសត្រចៀកថ្មីរបស់ Google នឹងបកប្រែភ្លាមៗក្រោយការសន្ទនា
កាសត្រចៀកនេះអាចប្រើប្រាស់បានជាមួយស្មាតហ្វូន
កាសត្រចៀកនេះអាចប្រើប្រាស់បានជាមួយស្មាតហ្វូន
ទីក្រុង SAN FRANCISCO ៖ កាលពីថ្ងៃពុធកន្លងទៅ ក្រុមហ៊ុន Google បានបង្ហាញនូវកាស Bluetooth ថ្មីមួយឈ្មោះថា Pixel Buds ដែលវាមានសមត្ថភាពបកប្រែភ្លាមៗជាច្រើនភាសាក្រោយការសន្ទនា ។
កាសត្រចៀកនេះអាចប្រើប្រាស់បានជាមួយស្មាតហ្វូន Pixel ជំនាន់ទី២ ដែលមានសមត្ថភាពបកប្រែភ្លាមៗក្រោយការសន្ទនាចំនួន៤០ភាសា ។
ទោះជាយ៉ាងណា យើងក៏អាចប្រើប្រាស់វាជាមួយទូរស័ព្ទ Android ផងដែរ ប៉ុន្តែបច្ចុប្បន្ន វាមានសមត្ថភាពបកប្រែត្រឹមតែ៥ភាសាប៉ុណ្ណោះ គឺភាសាអង់គ្លេស បារាំង អាល្លឺម៉ង់ ជប៉ុន និងព័រទុយហ្គាល់ ។ ក្រុមហ៊ុន Google ឲ្យដឹងថា នឹងអាចបន្ថែមភាសាជាច្រើនទៀតដូចជា ចិន ហូឡង់ អុីតាលី កូរ៉េ ន័រវែស និងប៉ូឡូញ ។
ការបង្ហាញនៅលើវេទិការបស់ Google រួមមាន ការសន្ទនាទៅវិញទៅមករវាងមនុស្ស២នាក់ ដែលម្នាក់និយាយភាសាអង់គ្លេស និងម្នាក់ទៀតនិយាយភាសាស៊ុយអែត ដោយប្រើប្រាស់កាសត្រចៀកថ្មីនេះ ។
លោក Avi Greengart នាយកស្រាវជ្រាវផ្នែកឧបករណ៍ប្រើប្រាស់របស់ក្រុមហ៊ុន Current Analysis បាននិយាយថា ៖« នេះគឺជាការបង្ហាញពីបច្ចេកវិទ្យាដ៏ល្អបំផុតមួយ ដែលខ្ញុំមិនបានឃើញក្នុងរយៈពេលជាយូរមកហើយ » ។
កាស Pixel Buds ត្រូវបានលក់ក្នុងតម្លៃ១៥៩ដុល្លារ ហើយវានឹងមានវត្តមាននៅសហរដ្ឋអាមេរិក ចាប់ពីខែវិច្ឆិកា ។
កាសត្រចៀកនេះអាចគ្រប់គ្រងដោយការប៉ះ អូស ឬបញ្ជាដោយការនិយាយ ។ វាអនុញ្ញាតឱ្យអ្នកប្រើប្រាស់អនុវត្តនូវមុខងារដូចជា ជ្រើសរើសបទចម្រៀង ផ្ញើសារ និងរកទិសដៅនៅលើផ្លូវ ៕
ចែករំលែកព័តមាននេះ