កាលពីពេលថ្មីៗកន្លងទៅនេះ ផ្ទុះការចាប់អារម្មណ៍ទៅលើពលបាលត្រី ដែលជាយុវជនអ្នកការពារព្រំដែនចំនួន៣រូប បានបកស្រាយបទចម្រៀងមួយបទ ក្រោមចំណងជើងថា «គន់មើលទៅមេឃ» បានយ៉ាងពីរោះរណ្តំ ស្រូបយក
ខេត្តកំពង់ស្ពឺ ៖ កាលពីពេលថ្មីៗកន្លងទៅនេះ ផ្ទុះការចាប់អារម្មណ៍ទៅលើពលបាលត្រី ដែលជាយុវជនអ្នកការពារព្រំដែនចំនួន៣រូប បានបកស្រាយបទចម្រៀងមួយបទ ក្រោមចំណងជើងថា «គន់មើលទៅមេឃ» បានយ៉ាងពីរោះរណ្តំ ស្រូបយកបេះដូងអ្នកស្តាប់គ្រប់ៗគ្នា រហូតបងប្អូនអ្នកប្រើប្រាស់បណ្តាញសង្គមពោលសរសើរមិនដាច់ពីមាត់។
អ្នកប្រើប្រាស់បណ្តាញសង្គម មិនត្រឹមតែបង្ហាញការចាប់អារម្មណ៍ទៅលើអត្ថន័យរបស់បទចម្រៀងប៉ុណ្ណោះទេ តែថែមទាំងពោលសរសើរថា ពលបាលត្រី ដែលជាទាហានការពារព្រំដែនទាំង៣រូប បកស្រាយបានពីរោះ ពិសេសគឺមានសមត្ថភាពលេងហ្គីតាបានយ៉ាងល្អថែមទៀតផង។
បើតាមប្រភពព័ត៌មានទទួលបាន បទចម្រៀងដែលពលបាលត្រី ទាហានការពារព្រំដែនទាំង ៣រូប បកស្រាយនោះ គឺត្រូវបានធ្វើឡើងនៅពេលយុវជនជាយោធាទំនេរពីការងារ និងការហ្វឹកហ្វឺន យកមកបកស្រាយកម្សាន្តអារម្មណ៍។ តាមរយៈបទ «គន់មើលទៅមេឃ» នេះ ដូចមានការពេញនិយមជាខ្លាំងចំពោះនាយទាហានគ្រប់ជាន់ថ្នាក់ ដោយស្តាប់យូរពុំចេះជិនណាយនោះឡើយ ជាពិសេសតាមរយៈបទមួយនេះ បើលើកយកមកច្រៀងពេលហ្វឹកហ្វឺនអាចអោយនាយទាហានរំសាយទុក្ខ ក៏ដូចជាបំបាត់ភាពហត់នឿយផ្សេងៗផងដែរ។
ជាកត់សម្គាល់ ក្រោយនាយទាហានរូបនេះ បានធ្វើការបកស្រាយបទចម្រៀងខាងលើ និងបង្ហោះក្នុងបណ្តាញសង្គម Tik Tok រួច ឃើញថា បងប្អូនមហាជនបានកើតសរសើរថា «ពីរោះហើយមានអត្ថន័យល្អបង ស្តាប់ហើយចង់ស្តាប់ទៀត»។ ក្នុងនោះ បងប្អូនអ្នកប្រើប្រាស់បណ្តាញសង្គមដែលបានស្តាប់ និងចែកចាយនូវឃ្លីបចម្រៀងរបស់ ពលបាលត្រីទាហានការពារព្រំដែនទាំង៣រូប បានបញ្ចេញទស្សនៈរបៀបកំប្លែងលេងថា ពលបាលត្រីទាហានការពារព្រំដែនទាំង៣រូប «ស្រឡាញ់សិល្បៈ តែម្តាយឱ្យធ្វើទាហាន» និងអ្នកគាំទ្រខ្លះទៀត បានលើកឡើងថា «អារម្មណ៍ខ្ញុំស្តាប់ហើយ កម្សត់តែមានកម្លាំងខ្លាំងក្លា»។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោកពលបាលត្រី សុង វិសាល ជាអ្នកបកស្រាយបទចម្រៀងខាងលើ បានរៀបរាប់ថា លោកពិតជាស្រឡាញ់ចូលចិត្តបទមួយនេះខ្លាំងណាស់។ លោកបន្តថា នៅពេលទំនេរ លោកជាមួយមិត្តភក្តិតែងតែនាំគ្នាបកស្រាយបទមួយនេះ និងបទផ្សេងជាច្រើនទៀត ដូចជាបទ «វិន័យជាច្បាប់» «កូនខ្មែរអើយ» «ផែនដីខ្មែរ» និងបទ «កងកាំភ្លើ.ងធំ» ជាដើម។
ទាក់ទងនឹងបទចម្រៀងមានចំណងជើងថា «គន់មើលទៅមេឃ» ដែលផ្ទុះខ្លាំង និងល្បីពាសពេញបណ្តាញសង្គមនេះ លោកបានរម្លឹកឱ្យដឹងថា ថ្ងៃមួយនោះ មិត្តភក្តិរបស់លោកបានយកហ្គីតា មកលេង រួចក៏នាំគ្នាឆ្លៀតដាក់មួយបទពេលទំនេរ ហើយចែករំលែកបទមួយនេះឱ្យបងប្អូនមហាជនបានស្តាប់កម្សាន្តផងដែរ។
នាយទាហាន សុង វិសាល បានបន្តថា ការច្រៀងជាសិល្បៈមួយដែលឱ្យលោកសប្បាយរីករាយ ហើយលោកក៏ស្រឡាញ់សិល្បៈតាំងពីដើមមក ព្រោះសិល្បៈជាចំណែកមួយដ៏ល្អចំពោះជីវិតរបស់មនុស្សយើងម្នាក់ៗ ដូច្នេះចូររីករាយ និងធ្វើអ្វីដែលយើងពេញចិត្ត។
ពលបាលត្រី សុង វិសាល ដែលមានវ័យទើបតែ២១ឆ្នាំ បានបន្តថា មុនលោកក្លាយជា ពលបាលត្រី លោកធ្លាប់ធ្វើជាអ្នកចម្រៀងតាមរោងការ និងពិធីផ្សេងៗ។ លុះក្រោយមក លោកស្រឡាញ់ផ្នែកនាយទាហាន លោកក៏បានសម្រេចចិត្តថា ចូលហ្វឹកហាត់ ហ្វឹកហ្វឺននៅផ្នែកនេះតែម្តង ដោយសព្វថ្ងៃនេះលោកស្ថិតក្នុងកងអនុសេនាធំ នៃខេត្តកំពង់ស្ពឺ។
សម្រាប់បទ «គន់មើលទៅមេឃ» លោកបានទម្លាយអារម្មណ៍ថា បទមួយនេះ ពិតមានអត្ថន័យជ្រៅចំពោះលោកដែលជានាយទាហានម្នាក់ និងនាយទាហានដទៃទៀត ពោលគឺបទចម្រៀងមួយនេះ សូម្បីតែមហាជនក៏តែងតែសរសើរមិនដាច់ពីមាត់ទេថា មានអត្ថន័យល្អ។ ពលបាលត្រីរូបស្រស់សង្ហា សុង វិសាល បានបន្តថា រាល់ថ្ងៃនេះ សម្រាប់ការហ្វឹកហាត់លោកពុំហត់នឿយនោះទេ ដោយនេះជាការងារមួយដែលលោកស្រឡាញ់ពេញចិត្ត ទោះលំបាកយ៉ាងណា ក៏លោកស៊ូលះបង់ពលី សាច់ស្រស់ ឈា.មស្រស់ ដើម្បីជាតិកម្ពុជា ក្នុងបូរណភាពទឹកដី។
ជាចុងក្រោយ ក្នុងនាមលោកពលបាលត្រី ហើយក៏ជាកូនខ្មែរមួយរូប លោកពិតមានមោទនភាពណាស់នៅអ្វីដែលខ្មែរមាន ហើយលោកសន្យាយ៉ាងមុតមាំថា ខំខិតបម្រើជាតិកម្ពុជា និងលះបង់កម្លាំងកាយចិត្ត ដើម្បីជាតិមាតុភូមិ៕ ដោយ៖ លីហួ គីមឆាយ
ចែករំលែកព័តមាននេះ