កូនស្រីរបស់មេដឹកនាំកូរ៉េខាងជើង Kim Jong-un គឺ Kim Ju-ae ត្រូវបានគេឃើញពាក់អាវក្រៅម៉ាក Dior ស្របពេលប្រទេសកូរ៉េខាងជើងនេះពោរពេញដោយពាក្យចចាមអារ៉ាមថាប្រជាជនកំពុងទទួលរងនូវភាពក្រីក្រ និងរងការអត់ឃ្លានក៏ដោយ។

នៅក្នុងរូបថតដែលបានចេញផ្សាយនៅថ្ងៃទី១៦ ខែមីនា Kim Ju Ae – កូនស្រីរបស់ Kim Jong Un ត្រូវបានគេឃើញពាក់អាវប្រណីត Dior អំឡុងទស្សនាការបាញ់មីស៊ីលឆ្លងទ្វីប Hwasongpho-17 របស់កូរ៉េខាងជើង។

យោងតាម ​​Telegraph អាវក្រៅប្រណីតម៉ាក Dior នេះគឺស្ថិតនៅក្នុងប្រភេទរបស់កុមារ Kid’s Hooded Down Jacket ដែលមានតម្លៃ ១,៩០០ដុល្លារ ។

នាពេលកន្លងមក មេដឹកនាំកូរ៉េខាងជើង Kim Jong-un ត្រូវបានគេមើលឃើញថារីករាយនឹងរបស់ប្រណីតផ្សេងៗ ដូចជា នាឡិកា សម្លៀកបំពាក់ គ្រឿងប្រើប្រាស់ និងរបស់របរផ្សេងៗ។ នៅថ្ងៃទី១០ ខែតុលា ឆ្នាំ២០២០ មេដឹកនាំកូរ៉េខាងជើងត្រូវបានគេថតរូបពាក់នាឡិកាស្វីស IWC Schaffhausen ដែលមានតម្លៃជាង ១០,០០០ដុល្លារ៕