ប្រពន្ធលោក យឹម ស៊ីណន អរគុណសម្តេចតេជោ ហ៊ុន សែន ក្រោយប្តីត្រូវបានដោះលែងពីពន្ធនាគារព្រៃស
- ភ្នំពេញ
ភ្នំពេញ៖ នៅយប់ថ្ងៃទី២៨ ខែមីនា ឆ្នាំ២០២៣ នេះ អ្នកស្រី សុផាន មករា ប្រពន្ធរបស់លោក យឹម…
ភ្នំពេញ៖ នៅយប់ថ្ងៃទី២៨ ខែមីនា ឆ្នាំ២០២៣ នេះ អ្នកស្រី សុផាន មករា ប្រពន្ធរបស់លោក យឹម…
ភ្នំពេញ៖ នៅយប់ថ្ងៃទី២៨ ខែមីនា ឆ្នាំ២០២៣ នេះ អ្នកស្រី សុផាន មករា ប្រពន្ធរបស់លោក យឹម ស៊ីណន បានថ្លែងអំណរគុណជូនសម្តេចតេជោ ហ៊ុន សែន ក្រោយពេលប្តីរបស់អ្នកស្រី ត្រូវបានដោះលែងចេញពីពន្ធនាគារព្រៃស ហើយបានទៅដល់ផ្ទះជួបជុំប្រពន្ធកូនឡើងវិញ។
នៅលើហ្វេសប៊ុក អ្នកស្រី សុផាន មករា បានសរសេរថា «សូមគោរពសម្តេចពុកជាទីគោរព ប្តីរបស់កូន បានមកដល់ផ្ទះវិញហើយ ហើយពេលនេះ គាត់បានជួបកូនៗគាត់វិញហើយ។ កូនសូមក្រាបថ្វាយបង្គំ ថ្លែងអំណរគុណ ដល់សម្តេចពុក ដែលលោកបានសន្តោសប្រណី អាណិតអាសូរដល់គ្រួសារដ៏កំសត់មួយនេះ។ កូនស្រី និងក្រុមគ្រួសារទាំងអស់ សូមថ្លែងអំណរគុណដល់សម្តេចពុក និងសូមជូនពរសម្តេចពុក ទទួលបានសុខភាពល្អ រឹងមាំ គង់ជាម្លប់ដ៏ត្រជាក់ដល់កូនចៅ។ ប្តីសម្លាញ់ យើងអាចទៅលេងអង្គវត្ត ម្តងទៀតហើយ»។
សូមរម្លឹកថា ប៉ុន្មាននាទី ក្រោយលោក យឹម ស៊ីណន បានសរសេរលិខិតផ្ទាល់ដៃ និងបង្ហោះខ្លីបវិដេអូ សូមព្រះរាជទានទោសព្រះមហាក្សត្រ និងសូមទោសសម្តេចតេជោ ហ៊ុន សែន រួចមក នៅយប់ថ្ងៃទី២៨ ខែមីនា ឆ្នាំ២០២៣ ចៅក្រមស៊ើបសួរសាលាដំបូង រាជធានីភ្នំពេញ បានចេញដីកាបង្គាប់ ឲ្យដោះលែងលោក យឹម ស៊ីណន ក្រោយពីលោក យឹម ស៊ីណន ត្រូវបានចាប់ឃុំខ្លួន កាលពីថ្ងៃទី២១មីនា ពាក់ព័ន្ធនឹងការប្រមាថអង្គព្រះមហាក្សត្រ។
លោក យឹម ស៊ីណន ត្រូវបានចាប់ខ្លួន នៅថ្ងៃទី២១មីនា ឆ្នាំ២០២៣ ជាមួយនឹងលោក ហ៊ុន កុសល ដោយសារតែបង្ហោះហ្វេសប៊ុក ពាក់ព័ន្ធនឹងរូបភាពព្រះមហាក្សត្រ ព្រះរាជទានព្រះអគ្គីជ័យកីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។ ព្រះរាជពិធីនោះ បានធ្វើឡើង នៅមុខប្រាសាទអង្គរវត្ត ក្នុងខេត្តសៀមរាប កាលពីព្រឹកថ្ងៃទី២១ ខែមីនា ឆ្នាំ២០២៣។
នៅថ្ងៃទី២២ ខែមីនា ឆ្នាំ២០២៣ ចៅក្រម បានចេញដីកា ២ ដាច់ដោយឡែកពីគ្នា ដោយសម្រេចឃុំខ្លួន លោក យឹម ស៊ីណន និងលោក ហ៊ុន កុសល នៅពន្ធនាគារព្រៃស ឬមណ្ឌលអប់រំកែប្រែទី១ ( ម១ ) ក្រោមការចោទប្រកាន់ចំនួន ២ បទល្មើស គឺបទប្រមាថចំពោះអង្គព្រះមហាក្សត្រ និងបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
ដីកាបង្គាប់ឱ្យឃុំខ្លួន បង្ហាញថា ជននេះ ត្រូវបានដាក់ឲ្យស្ថិតនៅក្រោមការពិនិត្យពីបទៈ ប្រមាថចំពោះអង្គព្រះមហាក្សត្រ និងបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅប្រទេសកម្ពុជា កាលពីថ្ងៃទី២១ ខែមីនា ឆ្នាំ២០២៣ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមមាត្រា៤៣៧(ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។
ក្រមព្រហ្មទណ្ឌ មាត្រា ៤៣៧ ( ស្ទួន ) បទ ប្រមាថចំពោះអង្គព្រះមហាក្សត្រ បានកំណត់ថា ការប្រមាថចំពោះអង្គព្រះមហាក្សត្រ ត្រូវផ្តន្ទាទោស ដាក់ពន្ធនាគារ ពី ១ឆ្នាំ ទៅ ៥ឆ្នាំ និងពិន័យជាប្រាក់ពី ២លានរៀល ទៅ ១០លានរៀល។
មាត្រា ៤៩៥ នៃក្រមព្រហ្មទណ្ឌ ចែងពីបទ ញុះញង់ឱ្យប្រព្រឹត្តបទឧក្រិដ្ឋ ជាអាទិ៍ ត្រូវផ្តន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល ប្រសិនបើការញុះញង់នេះ គ្មានប្រសិទ្ធភាពទេ៕
ចែករំលែកព័តមាននេះ