ថ្ងៃទី១-៣០មេសា កម្ពុជា នឹងធ្វើជំរឿនកសិកម្ម
- ភ្នំពេញ
ភ្នំពេញ៖ ជំរឿនកសិកម្ម នៅប្រទេសកម្ពុជាយើង នឹងត្រូវធ្វើ ចាប់ពីថ្ងៃទី១ ខែមេសា ដល់ថ្ងៃទី៣០ ខែមេសា ឆ្នាំ២០២៣។ នេះគឺជាជំរឿនកសិកម្ម…
ភ្នំពេញ៖ ជំរឿនកសិកម្ម នៅប្រទេសកម្ពុជាយើង នឹងត្រូវធ្វើ ចាប់ពីថ្ងៃទី១ ខែមេសា ដល់ថ្ងៃទី៣០ ខែមេសា ឆ្នាំ២០២៣។ នេះគឺជាជំរឿនកសិកម្ម…
ភ្នំពេញ៖ ជំរឿនកសិកម្ម នៅប្រទេសកម្ពុជាយើង នឹងត្រូវធ្វើ ចាប់ពីថ្ងៃទី១ ខែមេសា ដល់ថ្ងៃទី៣០ ខែមេសា ឆ្នាំ២០២៣។ នេះគឺជាជំរឿនកសិកម្ម លើកទី២ នៅកម្ពុជា ស្របតាមច្បាប់ ស្តីពី ស្ថិតិ ដែលបានកំណត់នូវកាតព្វកិច្ចរបស់ម្ចាស់អង្គភាពកសិកម្មទាំងអស់ មានជាអាទិ៍ សហគ្រាសកសិដ្ឋានកសិកម្ម និងគ្រួសារកាន់កាប់កសិកម្មនីមួយៗ ត្រូវចូលរួមសហការក្នុងការផ្តល់ព័ត៌មានទិន្នន័យដល់មន្ត្រីជំរឿនកសិកម្ម។
ជំរឿនកសិកម្ម ត្រូវធ្វើឡើង ដើម្បីទទួលបាននូវព័ត៌មានសំខាន់ៗ ក្នុងវិស័យកសិកម្ម ស្តីពី ស្ថានភាពកសិកម្ម ដើម្បីធ្វើជាមូលដ្ឋានទិន្នន័យគ្រឹះ សម្រាប់រៀបចំគោលនយោបាយយុទ្ធសាស្ត្រផែនការ សកម្មភាព និងគម្រោងកម្មវិធីនានា ដើម្បីជំរុញកិច្ចអភិវឌ្ឍវិស័យកសិកម្ម សេដ្ឋកិច្ច សង្គមកិច្ច និងសុខុមាលភាពប្រជាជន។
នៅមុនថ្ងៃធ្វើជំរឿនកសិកម្មនេះ សម្តេចតេជោ ហ៊ុន សែន បានចេញសារអំពាវនាវដល់ម្ចាស់សហគ្រាសកសិដ្ឋានកសិកម្ម និងគ្រួសារកាន់កាប់កសិកម្មគ្រប់ប្រភេទទាំងអស់ សូមចូលរួមគាំទ្រការងារនេះ និងសូមផ្តល់ព័ត៌មានទិន្នន័យតាមសំណួរសម្ភាសឱ្យបានពេញលេញ ត្រឹមត្រូវ និងស្មោះត្រង់ ជូនដល់មន្ត្រីជំរឿនកសិកម្ម ដើម្បីបង្កើតបាននូវស្ថិតិល្អ ពីព្រោះស្ថិតិល្អបង្កើតបាននូវគោលនយោបាយល្អ ហើយគោលនយោបាយល្អ នឹងជំរុញការអភិវឌ្ឍប្រទេសជាតិយើង បានជឿនលឿនរីកចម្រើន។
ក្រសួងផែនការ បានប្រកាសថា ការងារជំរឿនកសិកម្ម ឆ្នាំ២០២៣នេះ ទទួលបានការឧបត្ថម្ភគាំទ្រផ្នែកបច្ចេកទេសពីអង្គការស្បៀង និងកសិកម្មនៃអង្គការសហប្រជាជាតិ ( FAO) និងគាំទ្រថវិកាទាំងស្រុងពីរាជរដ្ឋាភិបាលកម្ពុជា។ ក្នុងនោះ ប្រជាជនកម្ពុជា មានកំណើនដល់ជាង ១៧ លាននាក់ ដែលមានចំនួនគ្រួសារ ប្រមាណ ៣,៩លានគ្រួសារ នៅឆ្នាំ២០២៣ និងគ្រួសារ ដែលប្រកបមុខរបរកសិកម្ម នៅទូទាំប្រទេសកម្ពុជា មានប្រមាណជាង ២,៧លានគ្រួសារ។
កាលពីឆ្នាំ២០១៣ ក្រសួងផែនការ បានធ្វើជំរឿនកសិកម្ម លើកទី១ នៅកម្ពុជា។ លទ្ធផលជំរឿនកសិកម្ម លើកទី១ ត្រូវបានប្រកាសនៅថ្ងៃទី២០ ខែសីហា ឆ្នាំ២០១៤ បានរកឃើញថា ប្រជាពលរដ្ឋខ្មែរ ១គ្រួសារ កាន់កាប់ផ្ទៃដីកសិកម្ម ១,៦៤ហិកតា។
ក៏ប៉ុន្តែលទ្ធផលអង្កេត ចន្លោះជំរឿនកសិកម្មកម្ពុជា ឆ្នាំ២០១៩ បង្ហាញថា ស្ថានភាពគ្រួសារធ្វើសកម្មភាពប្រកបមុខរបរ ក្នុងវិស័យកសិកម្ម នៅកម្ពុជា មានចំនួន ៧២ភាគរយ នៅឆ្នាំ២០១៩ ខណៈដែលគ្រួសារ ប្រកបមុខរបរកសិកម្ម មាន ៨៥ភាគរយ នៅឆ្នាំ២០១៣។ តួលេខនេះ បង្ហាញថា ចំនួនគ្រួសារប្រកបរបរ ក្នុងវិស័យកសិកម្ម នៅកម្ពុជា បានថយចុះ ១៣ភាគរយ ក្នុងរយៈពេល ៦ឆ្នាំ គិតពីឆ្នាំ២០១៣ ដល់ឆ្នាំ២០១៩៕
ចែករំលែកព័តមាននេះ