ខេត្តស្ទឹងត្រែង៖ ជនជាតិឡាវ ២នាក់ ត្រូវបានកម្លាំងនគរបាលប្រឆាំងគ្រឿងញៀន ចាប់ខ្លួនជាមួយ​វត្ថុតាងថ្នាំញៀន ១៣កញ្ចប់ធំ ស្មើជាង ១២គ.ក កាលពីវេលាម៉ោង ៧ និង០៥នាទី ថ្ងៃទី២៧ ខែមីនា ឆ្នាំ២០២៣។ យុវជនឡាវទាំង ២នាក់នោះ ត្រូវបានចាប់ខ្លួន នៅចំណុចស្ពានទី២ក្នុង​ភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ។

​ប្រភពព័ត៌មាន អោយដឹងថា កាលពីវេលា​ម៉ោងខាងលើ ជនសង្ស័យជនជាតិឡាវចំនួន ២នាក់ បានបើកបររថយន្តម៉ាកគា ពណ៌ខ្មៅ ពាក់ស្លាកលេខឡាវ ឆ្លងកាត់ច្រករបៀង ចូលមកទឹកដីខ្មែរ​​។ ដោយ​​មានការសង្ស័យកម្លាំងនគរបាលប្រចាំច្រកទ្វារអន្តរ​ជាតិត្រពាំងគ្រៀល ក៏បានឃាត់​សាកសួរត្រួតពិនិត្យ​លិខិតឆ្លងដែន និងរថយន្ត ដោយប្រទះឃើញធុងពណ៌បៃតងមួយ ច្នៃដាក់​ស្កររងូ (កាកស្ករ) មួយ​កំណាត់លើ និងបិទសន្ទះពីក្នុង។ គ្រានោះ កម្លាំងសមត្ថកិច្ច ក៏បានសម្រេច​កាត់ធុង ក៏ប្រទះឃើញកញ្ចប់ថ្នាំញៀន ដោយបង្កប់ជាមួយដីខ្សាច់ចំនួន ១៣កញ្ចប់​ធំ។

ប្រភពពីសមត្ថកិច្ច អោយដឹងថា ជនសង្ស័យ ជាជនជាតិឡាវខាងលើ ទី១-ឈ្មោះ កែវ គង់មឿង ភេទ​ប្រុស អាយុ ២៣ឆ្នាំ កើតនៅភូមិ​ចមកែវ ស្រុកកៃសន ខេត្ត​សុវណ្ណខេត្ត ទី២-ឈ្មោះ ណុក សុវណ្ណសាម ភេទប្រុស អាយុ ២០ឆ្នាំ កើតនៅភូមិណាសៃ ស្រុក​ហ្វឿង រដ្ឋធានីវៀងច័ន្ទ ប្រទេសឡាវ។

ជនសង្ស័យទាំង ២នាក់ ក្រោយការឃាត់ខ្លួនជាក់ស្តែង ជាមួយវត្ថុតាងគ្រឿងញៀន ក៏ត្រូវបាន​កម្លាំងនគរបាលប្រឆាំងគ្រឿងញៀន បញ្ជូនទៅស្នងការដ្ឋាននគរបាល​ខេត្តស្ទឹងត្រែង ដើម្បីបន្តនីតិវិធី។

បន្ទាប់ពីនាំដល់ស្នងការដ្ឋាននគរបាលខេត្ត កម្លាំងនគរបាលក្រោមការសម្របសម្រួល​ពីព្រះរាជអាជ្ញា បានហែកកញ្ចប់ថ្នាំញៀន និងធ្វើតេស្តលើវត្ថុតាងជាក់ស្តែង។ ក្រោយធ្វើតេស្ត លទ្ធផលបង្ហាញថា ជាប្រភេទថ្នាំញៀន មេតំហ្វេតាមីន មានទម្ងន់សរុបចំនួន ១២.៧៤៥,២ក្រាម។ ជនសង្ស័យខាងលើ ត្រូវបានកម្លាំងនគរបាលប្រឆាំងគ្រឿងញៀន ខេត្តស្ទឹងត្រែង កសាង​សំណុំរឿង បញ្ជូនទៅតុលាការ តាមនីតិវិធីផងដែរ៕