រាជធានីភ្នំពេញ៖ «នរណាដែលយកឈ្មោះខ្ញុំ ជាជំនួយការខ្ញុំ ស្អីក៏ដោយ ឱ្យតែយកឈ្មោះខ្ញុំទៅធ្វើខុសច្បាប់ ចាប់ទៅ មិនបាច់សួរយោបល់ទេ»។ នេះជាប្រសាសន៍របស់ នាយ​ឧត្ដមសេនីយ៍​ ហ៊ុន ម៉ា​ណែ​ត​ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក។

តាមរយៈវីដេអូខ្លីដែលមានរយៈពេលប្រមាណ ២ នាទី ដែលត្រូវបានបង្ហោះក្នុងហ្វេសប៊ុកផ្លូវការ ​ឧត្ដមសេនីយ៍​ ហ៊ុន ម៉ា​ណែ​ត​ បានថ្លែងច្បាស់ៗថា នរណាក៏ដោយ មិនថាជំនួយការរបស់លោក ឬអ្នកណាដែលបានថតរូបជាមួយលោក ហើយទៅប្រព្រឹត្តបទល្មើសក្រៅពីត្រូវបានអាជ្ញាធរចាប់ខ្លួន ក៏នឹងត្រូវប្រឈមមុខនឹងបណ្តឹងរបស់លោកផងដែរ។

នាយ​ឧត្ដមសេនីយ៍​ ហ៊ុន ម៉ា​ណែ​ត បានប្រាប់ទៅអាជ្ញាធរនានាថា «ហើយប្រាប់មកខ្ញុំ ខ្ញុំប្តឹងថែមទៀត ព្រោះទី១ អ្នកឯងធ្វើខុសច្បាប់ អាជ្ញាធរចាប់ តែខ្ញុំនឹងប្តឹង រឿងយកឈ្មោះខ្ញុំទៅ (ប្រើ)»។

នាយ​ឧត្ដមសេនីយ៍​ ហ៊ុន ម៉ា​ណែ​ត កូនប្រុសច្បងរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបន្តថា រូបលោកបានថតស៊ែលហ្វីជាមួយមនុស្សរាប់ពាន់នាក់ រាប់រយនាក់កន្លងមកនៅតាមកម្មវិធីផ្សេងៗ ហើយស្រាប់តែមានអ្នកខ្លះដែលបានរូបថតមួយប៉ុស្តិ៍ជាមួយលោកដែរ តែបែរជាដើរទៅធ្វើបាបទេ ដែលនោះជាទង្វើដែលប្រព្រឹត្តខុសច្បាប់។

«ថ្ងៃមុន គេមកសួរខ្ញុំ អំពីជំនួយការខ្ញុំ ៖ បងមានគេម្នាក់យករូបខ្ញុំថតរូបជាមួយបងឯង ទៅគៀបគេនៅកំពង់សោមថាជាជំនួយការផ្ទាល់បងឯង ហើយបងឯងឱ្យជាបេសកជនពិសេសចុះទៅចាប់ដី»។ នាយ​ឧត្ដមសេនីយ៍​ ហ៊ុន ម៉ា​ណែ​ត។

បន្ថែមពីលើនេះ បេក្ខភាពអនាគតនាយករដ្ឋមន្ត្រីកម្ពុជា នាយ​ឧត្ដមសេនីយ៍​ ហ៊ុន ម៉ា​ណែ​ត បានណែនាំទៅអាជ្ញាធរថា ជនបែបនេះចាប់ទៅ ហើយចាប់មិនបាច់សួរលោកនោះទេ។ ដោយក្នុងនោះ នាយ​ឧត្ដមសេនីយ៍​ ហ៊ុន ម៉ា​ណែ​ត បានសង្កត់ធ្ងន់ថា រាល់ជនដែលយកឈ្មោះលោក ទៅធ្វើរឿងខុសច្បាប់ មិនថា «ជាជំនួយការខ្ញុំក៏ដោយ ដើរជាមួយខ្ញុំរាល់ថ្ងៃក៏ដោយ ឱ្យតែធ្វើខុស ​ចាប់ទៅ។ និយាយឱ្យច្បាស់អ៊ីចឹងហ្មង»។

កូនប្រុសច្បងសម្តេចតេជោ មានប្រសាសន៍បន្ថែមថា «ហើយនៅមិននៅ ទៅយកឈ្មោះឯងមកទៀត។ ខ្លះសុទ្ធតែជំនួយការកៀក ជំនួយការស្អិត ជំនួយការផ្ទាល់ ជំនួយការពិសេស។ អ្នកដែលគេថា ជាជំនួយការពិសេស បេសកម្មពិសេសរបស់ខ្ញុំចុះទៅយកដីហ្នឹង។ ខ្ញុំអត់ទាំងចាំថាថតពេលណាផង។ បេសកជនចាប់ដី ! ខ្ញុំថាមិនបាច់សួរ (ខ្ញុំ) ទេ ឱ្យតែអ្នកខុសចាប់ទៅ ធ្វើតាមច្បាប់ទៅ។ ហើយបើបានប្រាប់ខ្ញុំ ស្រួលទៀត ខ្ញុំនឹងប្តឹងមួយតទៀត»។  

«អ៊ីចឹង បើថ្ងៃក្រោយអាជ្ញាធរគេដកពាក្យបណ្តឹង ក៏នៅជាប់ពាក្យបណ្តឹងរបស់ខ្ញុំដែរ ព្រោះប្តឹងធ្វើឱ្យខូចឈ្មោះ។ ខំចង់ជាប់ រកតែពេលជួបប្រពន្ធកូន ជួបមិនបាន មកសន្សំបុណ្យបានតិចៗ ស្រាប់តែគេយកមកកំពប់ចោលទាំងអស់»។ នេះជាការបញ្ជាក់របស់នាយ​ឧត្ដមសេនីយ៍​ ហ៊ុន ម៉ា​ណែ​ត។

លោកបណ្ឌិត ហ៊ុន ម៉ាណែត ក៏បានមានប្រសាសន៍ថា «បញ្ហាមួយដែលបានកើតឡើងជារឿយៗ ជាច្រើនឆ្នាំមកហើយ គឺ ការឆ្លៀតឱកាសប្រើប្រាស់ឈ្មោះរបស់ឥស្សរជនសំខាន់ៗ (រួមទាំងរូបខ្ញុំផ្ទាល់) ពីសំណាក់បុគ្គលមួយចំនួន ដើម្បីប្រព្រឹត្តិនូវអំពើមិនល្អ ដែលពេលខ្លះធ្វើអោយប៉ះពាល់យ៉ាងធ្ងន់ធ្ងរទៅលើសិទ្ធិនិងផលប្រយោជន៍របស់ប្រជាពលរដ្ឋដ៏ទៃទៀត។ យើងត្រូវព្យាយាមរួមគ្នាលុបបំបាត់ទង្វើខ្វះភាពសុចរិតបែបនេះ»៕