ឆក់កាបូបបានសម្រេច ប៉ុន្តែរត់មិនបានសម្រេច សមត្ថកិច្ចចាប់វាយខ្នោះ
រាជធានីភ្នំពេញ ៖ ជនសង្ស័យម្នាក់ក្នុងចំណោម២នាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពឆក់កាបូបពីប្តីប្រពន្ធមួយគូបានសម្រេច
រាជធានីភ្នំពេញ ៖ ជនសង្ស័យម្នាក់ក្នុងចំណោម២នាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពឆក់កាបូបពីប្តីប្រពន្ធមួយគូបានសម្រេច ហើយព្យាយាមបើកបររត់តែសំណាងមិនអាក្រក់ក៏ត្រូវបានប្រជាពលរដ្ឋចាប់បាន រួចវាយទ្រមខ្លួន បង្កឲ្យមានឲ្យមានភ្ញាក់ផ្អើលឡើង កាលពីវេលាម៉ោង០៧និង២០នាទីយប់ ថ្ងៃទី២៥ ខែតុលា ឆ្នាំ២០១៧ ត្រង់ចំណុចខាងមុខរតនៈម៉ាត តាមបណ្តោយផ្លូវលេខ២៥៧ ស្ថិតក្នុងសង្កាត់ទឹកល្អក់៣ ខណ្ឌទួលគោក ។
ជនសង្ស័យដែលឃាត់ខ្លួនបានមានឈ្មោះ ហេង មករា ភេទប្រុស អាយុ១៨ឆ្នាំ មុខរបរធ្វើការជាកម្មករលើកទឹកបរិសុទ្ធ ស្នាក់នៅក្រោយសាលាជាស៊ីមសាមគ្គី ក្នុងសង្កាត់បឹងសាឡាង ខណ្ឌទួលគោក ជាអ្នកបើកម៉ូតូ ។ ចំណែកឯបក្ខពួកម្នាក់ទៀត ដែលជាអ្នកធ្វើសកម្មភាពឆក់កាបូបបានរត់គេចខ្លួនបាត់ស្រមោល ។
ជនរងគ្រោះជាប្រពន្ធមានឈ្មោះ សឹម ស្រីនាង អាយុ២៥ឆ្នាំ មុខរបរបម្រើការនៅខារ៉ាអូខេ ស្នាក់នៅសង្កាត់បឹងប្រលិត ខណ្ឌ៧មករា ។ ឬឯបុរសជាប្តីដែលជាអ្នកបើកម៉ូតូមានឈ្មោះ ម៉ាង នូ អាយុ២៣ឆ្នាំ មុខរបរបុគ្គលិកហាងនំខេកមួយកន្លែង ស្នាក់នៅជាមួយគ្នា ។
បើតាមសម្តីពីជនរងគ្រោះបានរៀបរាប់ប្រាប់ឲ្យដឹងថា នៅមុនពេលកើតហេតុ រូបគាត់ទាំងពីនាក់បានជិះម៉ូតូមួយគ្រឿងម៉ាកស្មាក់វ៉េវ៉ូ ពណ៌ខ្មៅ ពាក់ស្លាកលេខ ភ្នំពេញ ១AM-៣៤១៣ ទើបតែចេញមកពីផ្ទះនៅម្តុំផ្សារអូឬស្សីបំណងជិះទៅលេងផ្ទះម៉ែក្មេកនៅម្តុំផ្សារសំណង់១២ ដោយធ្វើដំណើរតាមបណ្តោយផ្លូវ២៥៧ ក្នុងទិសដៅពីត្បូងទៅជើង ។ លុះមកដល់ចំណុចកើតហេតុ ស្រាប់លេចមុខជនសង្ស័យខាងលើ រួមទាំងបក្ខពួកជិះម៉ូតូមួយគ្រឿងម៉ាកស៊ុយស៊ូគីនិក ពណ៌ផ្កាឈូកលាយស ពាក់ស្លាកលេខ ភ្នំពេញ ១GD-៩៧០៧ បានជិះមកពីក្រោយបានធ្វើសកម្មភាពឆក់កាបូបពីស្ត្រីរងគ្រោះបានសម្រេច បណ្តាលឲ្យដាច់ខ្សែកាបូប ហើយបានព្យាយាមបើករត់គេចខ្លួន តែត្រូវបុរសជាប្តីស្រែកថាចោរៗ បង្កឲ្យមានការភ្ញាក់ផ្អើលដល់ប្រពលរដ្ឋដែលរស់នៅក្បែរកើតហេតុខាងលើ បានជួយដេញចាប់ឃាត់ខ្លួនបានម្នាក់ ចំណែកឯម្នាក់ទៀត បានលោតចុះពីម៉ូតូរត់គេចខ្លួនបាត់ស្រមោល ។
ជនសង្ស័យដែលឃាត់ខ្លួនបានត្រូវបានប្រជាពលរដ្ឋស្វាគមន៍យ៉ាងចាស់ដៃ ទើបប្រគល់ទៅឲ្យសមត្ថកិច្ចនាំយកទៅសាកសួរនៅប៉ុស្តិ៍នគរបាលរដ្ឋបាលទឹកល្អក់ទី៣ ។ នៅក្នុងកាបូបរបស់ជនរងគ្រោះដែលឆក់មាន ទូរស័ព្ទសាំសុងមួយគ្រឿង និងសៀវភៅសរសេរមួយក្បាល មិនមានលុយកាក់ទេ ។
បច្ចុប្បន្ន ជនសង្ស័យខាងលើរួមទាំងវត្ថុតាង ត្រូវបានសមត្ថកិច្ចប៉ុស្តិ៍នគរបាលរដ្ឋបាលសង្កាត់ទឹកល្អក់៣ កសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោក ដើម្បីរង់ចាំការចាត់ការតាមនីតិវិធី ៕
ចែករំលែកព័តមាននេះ