តារាចម្រៀងលោក សំ សុវណ្ណារ៉ាក់ បានចេញមុខបដិសេធ ចំពោះការលើកឡើងពីឪពុករបស់ខ្លួន ដែលបានប្រកាសកាត់កាលរូបលោកជាកូនចោល ហើយលើកហេតុផលថា ដោយសារភាពអកត្តញ្ញូ
រាជធានីភ្នំពេញ ៖ នៅទីបំផុត តារាចម្រៀងលោក សំ សុវណ្ណារ៉ាក់ បានចេញមុខបដិសេធ ចំពោះការលើកឡើងពីឪពុករបស់ខ្លួន ដែលបានប្រកាសកាត់កាលរូបលោកជាកូនចោល ហើយលើកហេតុផលថា ដោយសារភាពអកត្តញ្ញូ។
តារាចម្រៀងលោក សំ សុវណ្ណារ៉ាក់ បានសរសេរសារបង្ហោះនៅលើគណនីហ្វេសប៊ុករបស់ខ្លួនថា «ជម្រាបសួរបងប្អូន អ៊ុំពូមីង យាយតា ហ្វេនៗជាទីគោរពស្រលាញ់ បងប្អូនមួយចំនួនប្រហែលជាបានទទួលជ្រាបនឹងបានឃើញនូវព័ត៌មានដែលបានចុះផ្សាយថា ខ្ញុំជាកូនអកត្តញ្ញូ ជេរដៀលប្រមា.ថដល់ឪពុកម្តាយ»។
លោកបញ្ជាក់ថា «ខ្ញុំបាទ សំ សុវណ្ណារ៉ាក់ សូមបដិសេដទាំងស្រុង ចំពោះព័ត៌មានទាំងអស់ដែលបានចុះផ្សាយ គឺផ្ទុយពីការពិតទាំងស្រុង ហើយខ្ញុំបាទក៏សូមបញ្ចប់ត្រឹមនេះ ដោយមិនវែកញែករកហេតុផលបង្ហាញការខុស ឬត្រូវអ្វីទ្បើយ។ ខ្ញុំសូមរក្សាសិទ្ធិផ្ទៃក្នុងរឿងគ្រួសារ»។
លោកបន្ថែមថា «គ្រប់បញ្ហាដែលបានកើតទ្បើងនៅលើលោកនេះ បងប្អូនអើយ គឺត្រូវតែមានហេតុនិងផល មានភ្លើងមានផ្សែង ដូច្នេះសូមបងប្អូនទទួលជ្រាប។ ដោយក្តីគោរពពីខ្ញុំ សំ សុវណ្ណារ៉ាក់ និងសូមអង្វរដល់បងប្អូនមួយចំនួន មុននឹងខមិនស៊ែរបញ្ចេញមតិ សូមមានការត្រិះរិះពិចារណាអោយបានត្រូវ និងយល់ច្បាស់ពីបញ្ហា»។
លោកបញ្ជាក់ថា «ខ្ញុំអាចទ្រាំបាន ព្រោះទ្រាំនឹងបញ្ហាគ្រប់យ៉ាងបាន ជិតពាក់កណ្តាលជីវិតទៅហើយទ្រាំទៀតក៏មិនអី»។
ជាការកត់សម្គាល់ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលគេឃើញបុរសម្នាក់បានអះអាងថាជាឪពុករបស់លោក សំ សុវណ្ណារ៉ាក់ បានធ្វើការប្រកាសសាធារណៈ ដោយប្រកាសកាត់កាលតារាចម្រៀងរូបនេះលែងជាកូនបន្តទៀត។ ហ្វេសប៊ុកមួយនេះមានឈ្មោះ «Sam Samol» ដែលជាឪពុកបង្កើតរបស់តារាចម្រៀង សំ សុវណ្ណារ៉ាក់ បានបង្ហោះសារអមជាមួយនឹងរូបថតតារាចម្រៀងលោក សំ សុវណ្ណារ៉ាក់ នៅលើគណនីនេះ របស់លោកថា «ខ្ញុំបាទ សំ សំអុល សូមប្រកាសកាត់កាលជាសាធារណៈកូនម្នាក់នេះចោល ចាប់ពីពេលនេះតទៅ ហើយក៏ឈប់ទទួលស្គាល់ជាកូនផងដែរ ដោយសារកូននេះមិនស្តាប់បង្គាប់ម៉ែឪ ជេរប្រមា.ថម៉ែឪ បើថ្ងៃក្រោយកូននេះមានរឿងអី ទៅប្រព្រឹត្តខុសច្បាប់ ខ្ញុំជាអាណាព្យាលមិនទទួលខុសត្រូវចំពោះមុខច្បាប់ទ្បើយ»។
ហើយជាមួយគ្នានេះផងដែរ លោកក៏បានបញ្ជាក់តាមរយៈសារមួយផ្សេងទៀតថា «សូមអោយក្រុមគ្រួសារដែលជាសាច់ញាតិនៅខាងស្រុកឈូក ខេត្តកំពត ឈប់ទទួលស្គាល់ជាកូនចៅតទៅទៀត វាមិនមែនជាត្រកូលសំ ទៀតទ្បើយ»។
ទោះជាយ៉ាងណា រហូតមកទល់នាពេលនេះ គេនៅមិនទាន់ដឹងទេថា តើរឿងរ៉ាវពាក់ព័ន្ធឪពុកកូនរបស់អ្នកទាំងពីរបានដោះស្រាយគ្នាយ៉ាងណានៅឡើយទេ ខណៈពេលឪពុកលោក សំ សុវណ្ណារ៉ាក់ បានសម្រេចលុបសារទាំងអស់ដែលលោកបានបង្ហោះនោះចោលវិញ។ គួររំលឹកថា ៖ ភ្ញាក់ផ្អើល! បុរសម្នាក់អះអាងថាជាឪពុក ប្រកាសកាត់កាល សំ សុវណ្ណារ៉ាក់ លែងជាកូន ៕
ចែករំលែកព័តមាននេះ