មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលគេបានឃើញបុរសម្នាក់ដែលបានអះអាងថា ជាឪពុករបស់លោក សំ សុវណ្ណារ៉ាក់ បានធ្វើការប្រកាសជាសាធារណៈ ដោយប្រកាសកាត់កាលតារាចម្រៀងរូបនេះ
រាជធានីភ្នំពេញ ៖ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលគេបានឃើញបុរសម្នាក់ដែលបានអះអាងថា ជាឪពុករបស់លោក សំ សុវណ្ណារ៉ាក់ បានធ្វើការប្រកាសជាសាធារណៈ ដោយប្រកាសកាត់កាលតារាចម្រៀងរូបនេះលែងជាកូនបន្តទៀត។
ហ្វេសប៊ុកមួយដែលមានឈ្មោះថា «Sam Samol» ដែលអះអាងថា ជាឪពុកបង្កើតរបស់តារាចម្រៀង សំ សុវណ្ណារ៉ាក់ បានបង្ហោះសារអមជាមួយនឹងរូបថតតារាចម្រៀងលោក សំ សុវណ្ណារ៉ាក់ នៅលើគណនីហ្វេសប៊ុករបស់លោកថា «ខ្ញុំបាទ សំ សំអុល សូមប្រកាសកាត់កាលជាសាធារណៈកូនម្នាក់នេះចោល ចាប់ពីពេលនេះតទៅ ហើយក៏ឈប់ទទួលស្គាល់ជាកូនផងដែរ ដោយសារកូននេះ មិនស្តាប់បង្គាប់ម៉ែឪ ជេរប្រមា.ថម៉ែឪ បើថ្ងៃក្រោយ កូននេះមានរឿងអី ទៅប្រព្រឹត្តខុសច្បាប់ ខ្ញុំជាអាណាព្យាលមិនទទួលខុសត្រូវចំពោះមុខច្បាប់ទ្បើយ»។
ហើយជាមួយគ្នានេះដែរ លោកក៏បានបញ្ជាក់តាមរយៈសារមួយផ្សេងទៀតថា «សូមអោយក្រុមគ្រួសារដែលជាសាច់ញាតិនៅខាងស្រុកឈូក ខេត្តកំពត ឈប់ទទួលស្គាល់ជាកូនចៅតទៅទៀត វាមិនមែនជាត្រកូលសំ ទៀតទ្បើយ»។
យ៉ាងណាជុំវិញបញ្ហាខាងលើនេះ ឪពុកតារាចម្រៀងលោក សំ សុវណ្ណារ៉ាក់ គឺលោក សំ សំអុល មិនបានធ្វើការអធិប្បាយអ្វីច្រើនឡើយ នៅពេលមានការសាកសួរពីសារព័ត៌មានកោះសន្តិភាពទៅលើអ្វីដែលលោកបានបង្ហោះខាងលើនេះ។ លោកបានលើកឡើងដោយខ្លីថា «សូមចប់ត្រឹមនេះចុះ កុំសួរនាំ និងចុះផ្សាយបន្តទៀតអី ទុកអោយខ្ញុំដោះស្រាយជាមួយកូន ពីព្រោះវាជារឿងគ្រួសារ»។
ដោយឡែកសម្រាប់តារាចម្រៀងលោក សំ សុវណ្ណារ៉ាក់ វិញ ក៏បានអះអាងប្រាប់កោះសន្តិភាពតាមសារអេឡិចត្រូនិច ដោយក្នុងនោះលោកក៏មិនបានធ្វើការបកស្រាយលម្អិតពាក់ព័ន្ធរឿងរ៉ាវខាងលើនេះដែរ។ លោកនិយាយថា «សូមទោសផងបង ពេលនេះប្អូនកំពុងបំពេញការងារ មិនទាន់បានគិត និងមានពេលវេលាឆ្លើយតបនឹងរឿងនេះទេ ចាំពេលប្អូនទំនេរ ប្អូននឹងឆ្លើយតប»។
ទោះជាយ៉ាងណា រហូតមកទល់នាពេលនេះ គេនៅមិនទាន់ដឹងទេថា តើរឿងរ៉ាវពាក់ព័ន្ធឪពុកកូនរបស់អ្នកទាំងពីរបានដោះស្រាយគ្នាយ៉ាងណានៅឡើយទេ? ខណៈពេលឪពុកលោក សំ សុវណ្ណារ៉ាក់ បានសម្រេចលុបសារទាំងអស់ ដែលលោកបានបង្ហោះនោះចោលវិញផងដែរ៕
ចែករំលែកព័តមាននេះ