រដ្ឋបាលខណ្ឌដូនពេញ ក្រោមអធិបតីភាពលោក ជា ខេមា អភិបាល នៃគណៈអភិបាលខណ្ឌដូនពេញ បានអញ្ជើញអាជីវករលក់នំបញ្ចុកនៅតាមសួនច្បារមាត់ទន្លេ មកបំភ្លឺថា តើគាត់ពិតជាបានចាក់នំបញ្ចុករបស់ខ្លួនឯងចោលមែនឬអត់?
រាជធានីភ្នំពេញ ៖ នៅរសៀលថ្ងៃទី២១ ខែមីនា ឆ្នាំ២០២៣ នេះ រដ្ឋបាលខណ្ឌដូនពេញ ក្រោមអធិបតីភាពលោក ជា ខេមា អភិបាល នៃគណៈអភិបាលខណ្ឌដូនពេញ បានអញ្ជើញអាជីវករលក់នំបញ្ចុកនៅតាមសួនច្បារមាត់ទន្លេ មកបំភ្លឺថា តើគាត់ពិតជាបានចាក់នំបញ្ចុករបស់ខ្លួនឯងចោលមែនឬអត់?។ បន្ទាប់ពីមានមហាជនមួយចំនួនថតសកម្មភាពនេះបង្ហោះក្នុងបណ្ដាញសង្គម Tik Tok ធ្វើឲ្យមានការយល់ច្រឡំ។
ក្រោយមកអាជីករខាងលើរូបនេះ បានប្រាប់កម្លាំងអាជ្ញាធរឱ្យដឹងថា គាត់មិនបានចាក់នំបញ្ចុករបស់គាត់ចោល ដូចមហាជនមួយចំនួនតូចថតបង្ហោះនៅក្នុងបណ្ដាញសង្គមនោះឡើយ។ លុះរហូតដល់រសៀលថ្ងៃទី២១ ខែមីនា ថ្ងៃដដែលនោះ រដ្ឋបាលខណ្ឌដូនពេញ ក៏បានទិញនំបញ្ចុករបស់គាត់ទាំងអស់ ដើម្បីចែកជូនដល់មន្ត្រីសាលាខណ្ឌដូនពេញ ពិសាទាំងអស់គ្នាផងដែរ។
គួរបញ្ជាក់ផងដែរថា កាលពីរសៀលថ្ងៃទី២១ ខែមីនា ឆ្នាំ២០២៣ ម្សិលមិញ អាជីវករលក់នំបញ្ចុកម្នាក់ ដែលលក់នំមិនដាច់ ហើយត្រូវបានកម្លាំងសណ្ដាប់ធ្នាប់ខណ្ឌដូនពេញ ចុះណែនាំមិនឲ្យលក់នៅលើសួនច្បារផងនោះ អាជីវកររូបនេះក៏បានខឹងសម្បារជាមួយនឹងកម្លាំងសណ្ដាប់ធ្នាប់ខណ្ឌដូនពេញ ហើយក៏ចាក់នំបញ្ចុកខ្លួនឯងចោល បន្ទាប់មកក៏ត្រូវបានមហាជនមួយចំនួនតូចថតបង្ហោះនៅក្នុងបណ្ដាញសង្គម Tik Tok ធ្វើឲ្យមានការយល់ច្រឡំថា អាជ្ញាធរមិនមានការអាណិតអាសូរដល់អ្នកលក់ដូរបន្តិចបន្តួច ទើបអាជ្ញាធរហៅអាជីវកររូបនេះមកបំភ្លឺតែម្តង ដើម្បីកុំឱ្យមហាជនមានការយល់ច្រឡំ៕ ដោយ ៖ រដ្ឋា
ចែករំលែកព័តមាននេះ