នាយករដ្ឋមន្ត្រីជប៉ុនលោក Fumio Kishida បានធ្វើដំណើរទៅដល់ប្រទេសអ៊ុយក្រែននៅថ្ងៃទី២១ ខែមីនានេះ មួយថ្ងៃបន្ទាប់ពីប្រធានាធិបតីចិន Xi Jinping បានធ្វើទស្សនកិច្ចផ្លូវរដ្ឋទៅកាន់ប្រទេសរុស្ស៊ី។

យោងតាមប្រព័ន្ធផ្សព្វផ្សាយជប៉ុន NHK នាយករដ្ឋមន្ត្រី Fumio Kishida បានទៅដល់រដ្ឋធានី Kyiv ប្រទេសអ៊ុយក្រែន ដើម្បីពិភាក្សាជាមួយប្រធានាធិបតី Volodymyr Zelenskyy។

វា​ជា​ដំណើរ​ទស្សនកិច្ច​លើក​ដំបូង​របស់​លោក​ទៅ​កាន់​ប្រទេស​នេះ​ចាប់​តាំង​ពី​ការ​ឈ្លានពាន​របស់​រុស្ស៊ី​មក។ ជំនួសឱ្យការត្រលប់ទៅប្រទេសជប៉ុនវិញ លោកបានធ្វើដំណើរទៅប្រទេសប៉ូឡូញ ហើយជិះរថភ្លើងទៅកាន់ទីក្រុង Kyiv។

ដោយមានការទទួលស្វាគមន៍ពីសំណាក់ អ្នកស្រី Emine Dzheppa អនុរដ្ឋមន្ត្រីទី១ នៃក្រសួងការបរទេសអ៊ុយក្រែន អ្នកស្រី​បាន​សរសេរ​នៅលើ Twitter កាលពី​ថ្ងៃ​អង្គារ​អម​ជាមួយ​រូបភាព​នៃ​ការមកដល់​របស់ Kishida ថា​៖ «​ដំណើរ​ទស្សនកិច្ច​ជា​ប្រវត្តិសាស្ត្រ​នេះ​គឺជា​សញ្ញា​នៃ​សាមគ្គីភាព និង​កិច្ចសហប្រតិបត្តិការ​ដ៏​រឹងមាំ​រវាង​អ៊ុយក្រែន និង​ជប៉ុន​»​។

លោក Kishida ក៏បានធ្វើដំណើរទៅកាន់ទីក្រុង Bucha ជាកន្លែងដែលមានការលើកឡើងថា ជនស៊ីវិលជាង ៤០០នាក់ ត្រូវបានសម្លាប់កាលពីឆ្នាំមុនដោយកងកម្លាំងរុស្ស៊ី។

Kishida នឹងជួបជាមួយលោក Zelenskyy ​ក្នុង​នាម​ជា​ប្រធាន​ក្រុម G7 ឆ្នាំ​នេះ ជប៉ុន​នឹង​ស្វែង​រក​ការ​រួបរួម​ជា​អន្តរជាតិ​ដើម្បី​ដាក់​ទណ្ឌកម្ម​តឹងរ៉ឹង​លើ​រុស្ស៊ី ស្របពេល ជប៉ុនគ្រោងនឹងធ្វើជាប្រធានកិច្ចប្រជុំកំពូល G7 នៅទីក្រុងហ៊ីរ៉ូស៊ីម៉ាក្នុងខែឧសភា។

Kishida ក៏ទំនងជានិយាយផងដែរថា នឹងបន្តផ្តល់ការគាំទ្រជាអតិបរមាដល់អ៊ុយក្រែន ដោយផ្តោតលើការកសាងឡើងវិញ និងជំនួយមនុស្សធម៌។

វាជាដំណើរទស្សនកិច្ចលើកដំបូងរបស់នាយករដ្ឋមន្ត្រីជប៉ុនទៅកាន់ប្រទេស ឬតំបន់ដែលហែកហួរដោយសង្រ្គាម ចាប់តាំងពីសង្គ្រាមលោកលើកទី២ និងជាដំណើរទស្សនកិច្ចលើកដំបូងទៅកាន់អ៊ុយក្រែនដោយសមាជិកអាស៊ីនៃ G7។

Kishida កំពុងដើរតាមគន្លងរបស់មេដឹកនាំ G7 ផ្សេងទៀត រួមទាំងប្រធានាធិបតីអាមេរិក Joe Biden ដែលបានបំពេញទស្សនកិច្ចនៅអ៊ុយក្រែនកាលពីខែមុន៕