រាជធានីភ្នំពេញ ៖ កម្ពុជាបានទទួលអត្ថប្រយោជន៍ជាច្រើនពីកិច្ចសហប្រតិបត្តិការារមេគង្គ-ឡានឆាង ដើម្បីមកអភិវឌ្ឍន៍វិស័យអាទិភាព ជាក់ស្តែងអត្ថប្រយោជន៍យ៉ាងច្រើនសន្ធឹកសន្ធាប់ ពីគម្រោងចំនួន៨០ ក្រោមមូលនិធិពិសេសនេះ ដែលមានទឹកប្រាក់ប្រមាណ៣១លានដុល្លារអាមេរិក ។ យោងតាមសាលិខិតរបស់ឯកឧត្តម…
រាជធានីភ្នំពេញ ៖ កម្ពុជាបានទទួលអត្ថប្រយោជន៍ជាច្រើនពីកិច្ចសហប្រតិបត្តិការារមេគង្គ-ឡានឆាង ដើម្បីមកអភិវឌ្ឍន៍វិស័យអាទិភាព ជាក់ស្តែងអត្ថប្រយោជន៍យ៉ាងច្រើនសន្ធឹកសន្ធាប់ ពីគម្រោងចំនួន៨០ ក្រោមមូលនិធិពិសេសនេះ ដែលមានទឹកប្រាក់ប្រមាណ៣១លានដុល្លារអាមេរិក ។
យោងតាមសាលិខិតរបស់ឯកឧត្តម ប្រាក់ សុខុន ឧបកនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ“ទិវាសប្តាហ៍ នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៣” បានលើកឡើងថា ក្នុងរយៈពេលប្រាំពីរឆ្នាំកន្លងមកនេះ តាមរយៈការជំរុញកិច្ចសហការយ៉ាងជិតសិ្នទ្ធរវាងប្រទេសសមាជិកមេគង្គ-ឡានឆាង និងការសង្កត់ធ្ងន់លើបំណងប្រាថ្នារួមរបស់យើង ក្នុងការលើកកម្ពស់សន្តិភាព ស្ថិរភាព និងអនាគតរួមគ្នា ប្រកបដោយវិបុលភាព យន្តការរបស់យើងរក្សាបាននូវការរីកចម្រើនលើគ្រប់ រូបភាព នៃការអភិវឌ្ឍន៍ ជាពិសេសផ្តោតសំខាន់លើការកសាងភាពធន់របស់យើង តាមរយៈកំណើនប្រកបដោយចីរភាព ។
ក្នុងលិខិតឯកឧត្តម បានលើកឡើងថា ជាមួយនឹងការចាប់ផ្តើមអនុវត្តផែនការសកម្មភាពកិច្ចសហប្រតិបត្តិការមេគង្គ-ឡានឆាង ឆ្នាំ២០២៣-២០២៧ យើងនឹងផ្តោតសំខាន់លើវិស័យអភិវឌ្ឍន៍ជាអាទិភាព ដោយបន្ត កសាងលើសមិទ្ធិផលដ៏ធំធេង ដែលសម្រេច បានពីផែនការសកម្មភាពកន្លងមក ។
ឯកឧត្តមបញ្ជាក់ថា ៖ «ខ្ញុំមានសេចក្តីពេញចិត្តយ៉ាងខ្លាំង ចំពោះលទ្ធផល នៃកិច្ចប្រជុំរដ្ឋមន្ត្រី ការបរទេសមេគង្គ-ឡានឆាង លើកទី៧ កាលពីឆ្នាំមុន នៅទីក្រុងបាកាន ប្រទេសមីយ៉ាន់ម៉ា ដែលបានបង្ហាញឲ្យឃើញយ៉ាងច្បាស់នូវស្មារតី នៃកិច្ចសហប្រតិបត្តិការល្អ សំដៅជំរុញសមាហរណកម្មនៅ ក្នុងអនុតំបន់របស់យើង» ។
ឯកឧត្តមលើកឡើងថា បន្ថែមលើនេះ លទ្ធផលជាវិជ្ជមាន នៃការអនុវត្តគម្រោង ក្រោមមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង បានឆ្លើយតបចំពោះតម្រូវការអភិវឌ្ឍន៍ជាក់ស្តែងរបស់ប្រជាជនយើងនៅក្នុងតំបន់មេគង្គ-ឡានឆាង ។ សម្រាប់កម្ពុជា យើងបានទទួលអត្ថប្រយោជន៍យ៉ាងច្រើនសន្ធឹកសន្ធាប់ពីគម្រោងចំនួន៨០ ក្រោមមូលនិធិពិសេសនេះ ដែលមានទឹកប្រាក់ប្រមាណ៣១លានដុល្លារអាមេរិក ។
ជាមួយគ្នានោះដែរ ឯកឧត្តមក៏បានលើកឡើងថា វិសាលភាព នៃសកម្មភាពកិច្ចសហ-ប្រតិបត្តិការនេះ មានភាពចម្រុះ និងគ្របដណ្តប់លើវិស័យអាទិភាពជាច្រើនរាប់ចាប់តាំងពីវិស័យអភិវឌ្ឍន៍ជនបទ ការកាត់បន្ថយភាពក្រីក្រ ធនធានទឹក កសិកម្ម ការតភ្ជាប់ផ្លូវអាកាស សុខភាព ការអប់រំ ទេសចរណ៍ ការអភិរក្សបេតិកភណ្ឌវប្បធម៌ រហូតដល់ការពង្រឹងភាពអង់អាចដល់ស្ត្រី ក្នុងចំណោមវិស័យអាទិភាពដទៃទៀត ។
ឯកឧត្តម បានគូសបញ្ជាក់ថា ៖ «ខ្ញុំសូមឆ្លៀតយកឱកាសនេះ ថ្លែងអំណរគុណយ៉ាងជ្រោលជ្រៅ ជូនចំពោះសាធារណៈរដ្ឋប្រជាមានិតចិន សម្រាប់ការប្តេជ្ញាចិត្តដ៏មុតមាំ និងការចូលរួមយ៉ាងសកម្មរបស់ខ្លួន ក្នុងការលើកកម្ពស់ក្របខណ្ឌកិច្ចសហប្រតិបត្តិការមេគង្គ-ឡានឆាង សំដៅធានាភាពជោគជ័យ នៃគំនិតផ្តួចផ្តើមនេះរហូតមកដល់សព្វថ្ងៃ» ។
ឯកឧត្តមថា ៖ ខ្ញុំទន្ទឹងរង់ចាំនូវការវិវត្តទៅមុខ នៃក្របខណ្ឌកិច្ចសហប្រតិបត្តិការមេគង្គ-ឡានឆាង ក្នុងការប្រែក្លាយយន្តការអនុតំបន់មួយនេះ ដោយមិនត្រឹមតែបំពេញបន្ថែមដល់គំនិតផ្តួចផ្តើមខ្សែ ក្រវ៉ាត់ និងផ្លូវ និងគំនិតផ្តួចផ្តើមអភិវឌ្ឍន៍សកលប៉ុណ្ណោះទេ ប៉ុន្តែថែមទាំងគាំទ្រដល់ការអនុវត្តភាពជាដៃគូ សេដ្ឋកិច្ចគ្រប់ជ្រុងជ្រោយ តំបន់ (RCEP) និងឈានទៅសម្រេចឱ្យបាននូវខ្សែក្រវ៉ាត់អភិវឌ្ឍន៍សេដ្ឋកិច្ច មេគង្គ-ឡានឆាង នៅក្នុងសហថាមភាពជាមួយនឹងច្រករបៀងពាណិជ្ជកម្មអន្តរជាតិថ្មី តាមផ្លូវគោក-សមុទ្រ។
ក្នុងសារលិខិតដដែល ឯកឧត្តម ប្រាក់ សុខុន ក៏បានអះអាងថា នៅក្នុងបរិបទនេះ កម្ពុជានឹងបន្តជំរុញកិច្ចសហប្រតិបត្តិការមេគង្គ-ឡានឆាង ឱ្យក្លាយជាយន្តការមួយ នៃយន្តការអនុតំបន់ ដែលមានសារសំខាន់ សំដៅគាំទ្រដល់ពហុភាគីនិយម ដើម្បីសម្រេចបាននូវចក្ខុវិស័យរបស់ថ្នាក់ដឹកនាំរបស់យើង ក្នុងការកសាងសហគមន៍ដែលមានអនាគតរួមគ្នា ប្រកបដោយសន្តិភាព និងវិបុលភាព៕
ចែករំលែកព័តមាននេះ