​ខេត្តកំពង់ធំ៖ យុវជនម្នាក់ ត្រូវបាន​ប៉ូលិសចាប់ ដោយសារតែលួចម៉ូតូ​របស់គេ។ បុរសនោះ បានប្រាប់ប៉ូលិសថា រូបគេទើបចេញពីមណ្ឌលអប់រំកែប្រែ នៅភ្នំពេញ ហើយបានលួចកង់គេ ១គ្រឿង ជិះពីភ្នំពេញ ទៅដល់ខេត្តកំពង់ធំ ក៏លួចម៉ូតូគេតែម្តង។​

ករណីយុវជនជិះកង់ពីភ្នំពេញ ទៅលួចម៉ូតូ នៅខេត្តកំពង់ធំ បានកើតឡើង កាលពីម៉ោង ៤ និង ៤៥នាទីល្ងាច ថ្ងៃទី២០ ខែមីនា ឆ្នាំ២០២៣ នៅចំណុចមុខផ្ទះប្រជាពលរដ្ឋ ក្នុង​ភូមិជាយស្បៃ ឃុំកកោះ ស្រុកសន្ទុក ខេត្ត​កំពង់ធំ។ ម៉ូតូ ដែលចោរលួច មិនសម្រេចនេះ ម៉ាកហុងដា ស៊េរីC125ពណ៌​ខ្មៅ ផលិតនៅឆ្នាំ២០១៨ ពាក់ស្លាកលេខ កំពង់ធំ 1K 6661។

ម្ចាស់ម៉ូតូ ឈ្មោះ ហឿន ហុក ភេទប្រុស អាយុ ៤១ឆ្នាំ នៅភូមិកើតហេតុ។ រីឯជនសង្ស័យ ឈ្មោះ ម៉ាប់ សំអូន ភេទប្រុស អាយុ ២៦ឆ្នាំ រស់នៅភូមិលាវ ឃុំស្តៅ ស្រុកពាមរ ខេត្តព្រៃងវែង។

សមត្ថកិច្ច បានឲ្យដឹងថា បើយោងតាមចម្លើយសារភាពរបស់ជនសង្ស័យ​ រូបគេ ទើបតែចេញពីមណ្ឌលកែប្រែ ដែលមានឈ្មោះថា «ឱកាសខ្ញុំ» ស្ថិតនៅក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ បានរយៈពេល ៥ថ្ងៃ។ កាលពីថ្ងៃ១៨ ខែមីនា ឆ្នាំ២០២៣ រូបគេបានលួចកង់របស់ប្រជាពលរដ្ឋ ១គ្រឿង នៅទីក្រុងភ្នំពេញ មានបំណងជិះ​ទៅប៉ោយប៉ែត ដើម្បីរកការងារធ្វើ។ នៅពេលជិះមកតាមផ្លូវ គេបានឈប់សុំបាយតាមវត្តហូប ជាហូរហែរ​ដល់ពេលយប់ ក៏ទៅរកកន្លែងដេកនៅតាមរោងគេលក់ដូរ។ លុះដល់ថ្ងៃទី២០ ខែមីនា នៅវេលាម៉ោងប្រហែល ១១.០០នាទីថ្ងៃ រូបគេ ក៏បានសុំបាយ នៅវត្តប្រាសាទ ឃុំប្រាសាទ ស្រុកសន្ទុក​ហូប ហើយក៏បានលួចទូរស័ព្ទរបស់គេ ក្នុងវត្តបាន ១គ្រឿង ម៉ាក Oppo ពណ៌ខ្មៅ រួចហើយក៏ជិះ​កង់បន្ត មកដល់ភូមិជាយស្បៃ ឃុំកកោះ ស្រុកសន្ទុកដដែល ក៏បានឃើញម៉ូតូ ១គ្រឿង ដែលម្ចាស់បានទុកបញ្ឈរចោល នៅខាងមុខផ្ទះ ហើយថែមទាំងមានកូនសោរទៀត​ផងនោះ ឃើញឱកាសល្អ រូបគេ ក៏បានទុកកង់ចោល ហើយលួចម៉ូតូគេ ឡើងជិះ​លើម៉ូតូបញ្ឆេះហើយ តែចៃដន្យម្ចាស់ឃើញទាន់ ស្រែកថា «ចោរៗ» រូបគេភ័យពេក ក៏រត់ចោលម៉ូតូ។ តែត្រូវបានប្រជាពលរដ្ឋ និងសមត្ថកិច្ច អន្តរាគមន៍ តាមចាប់បាន យកមកអធិការដ្ឋាននគរបាល ស្រុកសន្ទុក។ សមត្ថកិច្ច បានកសាងសំណុំរឿង ចាត់ការ​តាមនីតិវិធីច្បាប់៕ ថុក សុខា