ប្លន់សម្លា.ប់ស្ត្រីលក់ជី រហូតមកដល់ពេលនេះ…
ខេត្តបាត់ដំបង ៖ លោកឧត្តមសេនីយត្រី ជេត វណ្ណនី ស្នងការរងខេត្ត បានមានប្រសាសន៍ថា
ខេត្តបាត់ដំបង ៖ លោកឧត្តមសេនីយត្រី ជេត វណ្ណនី ស្នងការរងខេត្ត បានមានប្រសាសន៍ថា ជុំវិញករណីសម្លាប់ស្ត្រីលក់ជីកសិកម្មម្នាក់ប្លន់យកទ្រព្យសម្បត្តិទាំងព្រឹក នៅស្រុកសង្កែ រហូតមកដល់ព្រឹកថ្ងៃទី០១ ខែតុលានេះ សមត្ថកិច្ចនូវមិនទាន់មានតម្រុយអំពីមុខសញ្ញាក្រុមជនដៃដល់នៅឡើយទេ សូម្បីវត្ថុតាងក៏កំពុងស្ថិតក្នុងភាពងងឹតឈឹងដែរ។
លោកបានថ្លែងទៀតថា នៅកន្លែងកើតហេតុហាក់គ្មានវត្ថុតាងណាមួយដែលក្រុមជនដៃដល់បានបន្សល់ទុកឡើយ ក្រៅតែពីស្លាកស្នាមប្រវាយប្រតប់ ស្នាមរើកកាយក្នុងបន្ទប់ដេក និងសពដេកស្លាប់ក្នុងថ្លុកឈាម ខណៈកាបូបលុយក្រវ៉ាត់ជាប់ចង្កេះត្រូវបាត់។ ហើយបើតាមការពិនិត្យជនរងគ្រោះមានស្នាមរបួសច្រើនកន្លែងត្រង់ក្បាលផ្នែកខាងក្រោយ ដែលត្រូវនឹងវត្ថុរឹង តែយើងមិនទាន់អាចសន្និដ្ឋានថា វត្ថុរឹងដែលជនដៃដល់វាយទៅលើជនរងគ្រោះនោះជាវត្ថុអ្វីនោះទេ ព្រោះនៅកន្លែងកើតហេតុគ្មានបន្សល់ទុកវត្ថុតាងទេ ហើយតែមិនទាន់ដឹងថា ទ្រព្យសម្បត្តិអ្វីខ្លះដែលត្រូវបាតបង់ និងនៅក្នុងកាបូបនោះមានលុយប៉ុន្មានដែរ។ ហើយតាមការពិនិត្យលើសកម្មភាពនេះ ជនដៃដល់អាចមានបក្សពួកលើសពី២នាក់ និងអាចជាមនុស្សធ្លាប់ចេញចូលផ្ទះជនរងគ្រោះ ទើបដឹងថា ជនរងគ្រោះនៅផ្ទះម្នាក់ឯងដែលជាឱកាសងាយស្រួលធ្វើសកម្មភាព។ ខណៈពេលនេះយើងមិនទាន់មានតម្រុយអំពីមុខសញ្ញានៅឡើយទេ ប៉ុន្តែលោកកំពុងបន្តដឹកនាំកម្លាំងជំនាញចុះសួរនាំប្រភពនានានៅក្នុងមូលដ្ឋាន និងកន្លែងកើតហេតុ ដើម្បីស្រាវជ្រាវស្វែងរកវត្ថុតាង និងមុខសញ្ញាជនសង្ស័យ ។
សូមរំលឹកថា ស្ត្រីរងគ្រោះឈ្មោះឡា មួយ អាយុ៦៥ឆ្នាំ ជាស្ត្រីមេម៉ាយ មុខរបលក់ជីកសិកម្មនៅនឹងផ្ទះ ស្ថិតក្នុងភូមិអូសទូក ឃុំកំពង់ព្រៀង ស្រុកសង្កែ ត្រូវអ្នកភូមិប្រទះឃើញដេកស្លាប់ក្នុងថ្លុកឈាមក្បែរឃ្លាំងស្ដុកជីរបស់គាត់នៅម៉ោង១២ថ្ងៃត្រង់ ថ្ងៃទី៣០ កញ្ញា ដែលមានស្នាមរបួសផុងលលាដ៍ក្បាលជិត១០កន្លែង ហើយស្ត្រីរងគ្រោះមានកូនៗជាសិស្ស និងមន្ត្រីរាជការ។ បើតាមសាក្សីនិយាយថា នៅម៉ោងប្រហែល៨ព្រឹកថ្ងៃកើតហេតុ អ្នកភូមិម្នាក់បានជិះម៉ូតូទៅរកទិញជីបាចស្រូវ តែមិនទាន់ឲ្យលុយទេ លុះម៉ោងប្រមាណ១២ថ្ងៃត្រង់ ពេលអ្នកភូមិនោះជិះម៉ូតូយកលុយទៅសង ស្រាប់តែឃើញស្ត្រីរងគ្រោះដេកស្លាប់ក្នុងថ្លុកឈាមក្បែរឃ្លាំងស្ដុកជី ទើបមានការភ្ញាក់ផ្អើលតែម្ដង។
ចែករំលែកព័តមាននេះ