ខេត្តឧត្តរមានជ័យ ៖ គេបានសង្កេតឃើញថា រាល់សកម្មភាពបទល្មើសកា.ប់បំផ្លិចបំផ្លាញនៅតំបន់ធនធានធម្មជាតិព្រៃឈើ ដែលជាប្រភេទឈើអាធំៗ ដោយយកទៅពុះច្រៀក ហើយក៏យកទៅលក់។ ចំណែកប្រភេទឈើតូចៗវិញ ត្រូវបានគេយកទៅចូលក្នុងឡដុតធ្វើជាធ្យូងលក់ទៅឲ្យក្រុមឈ្មួញ ដែលជាអ្នកប្រមូលទិញ រួចដឹកជញ្ជូនតាមគោយន្តកន្ត្រៃ និងប្រភេទគោយន្តកែច្នៃ ដើម្បីយកទៅលក់តាមដងផ្លូវយុទ្ធសាស្ត្រ និងផ្លូវជាតិលេខ៥៨ ឆ្ពោះទៅច្រកណងចាន់ ក្នុងស្រុកអូរជ្រៅ និងឆ្ពោះទៅក្រុងប៉ោយប៉ែត ខេត្តន្ទាយមានជ័យ ជារៀងរាល់ថ្ងៃរាល់យប់ដោយរលូនគ្មានវិធានការទប់ស្កាត់។
យោងតាមបទសម្ភាសន៍ជាមួយក្រុមអ្នកដឹកធ្យូងយកទៅលក់ បានរៀបរាប់ឱ្យដឹងថា ពួកគាត់ស្វែងរកការងារធ្វើមិនបានទេ ទើបសំរេចចិត្តប្រកបមុខរបរនេះ ដើរប្រមូលទិញធ្យូងពីប្រជាពលរដ្ឋអ្នកភូមិ ដែលរស់នៅក្នុងស្រុកជាំក្សាន្ត ខេត្តព្រះវិហារ និងស្រុកត្រពាំងប្រាសាទ ខេត្តឧត្តរមានជ័យ ដើម្បីដឹកជញ្ជូនយកទៅលក់ឲ្យចៅកែ ដែលចាំទទួលទិញនៅក្នុងតំបន់ច្រកណងចាន់ ស្ថិតក្នុងស្រុកអូរជ្រៅ និងក្នុងតំបន់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យផងដែរ។
ពួកគាត់បានបញ្ជាក់ឱ្យដឹងថា ក្នុងការដើរប្រមូលទិញពីប្រជាពលរដ្ឋនោះ ក្នុងតម្លៃមួយបេ ឬមួយការ៉ុង តម្លៃ៨ពាន់រៀលទៅ៩ពាន់រៀល ហើយយកទៅលក់ឲ្យចៅកែដែលចាំទទួលទិញនោះ ក្នុងតម្លៃ១ម៉ឺន៣ពាន់រៀល បើគិតពីតម្លៃបង់ឲ្យអ្នកមានសមត្ថកិច្ចតាមដងផ្លូវជាច្រើនស្ថាប័នមួយកន្លែង១ម៉ឺនរៀលទៅ២ម៉ឺនរៀល នៅសេសសល់កម្រៃតែបន្តិបន្ទួចតែប៉ុណ្ណោះ គ្រាន់បានចិញ្ចឹមជីវិត។
ទាក់ទិនហេតុការណ៍ខាងលើនេះដែរ អ្នកយកព័តមានបានទូរស័ព្ទជួបលោក អ៊ឹម សៅរិទ្ធ នាយខណ្ឌរដ្ឋបាលព្រៃឈើ ខេត្តឧត្តរមានជ័យ នៅរសៀលថ្ងៃទី១៩ ខែមីនា ឆ្នាំ២០២៣នេះ លោកបានឆ្លើយតបតាមរយៈទូរស័ទ្ធបានឱ្យដឹងថា ការដឹកជញ្ជូនតាមគោយន្តកន្ត្រៃ ឬតាមរថយន្តកន្លងទៅ លោកតែងតែដាក់កម្លាំងជំនាញធ្វើការបង្ក្រាបបានជាញឹកញាប់ផងដែរ តែនៅមិនរាងចាល ខណៈពេលនេះ បើនៅតែកើតមាន លោកនឹងដាក់បទបញ្ជាដល់សង្កាត់រដ្ឋបាលព្រៃឈើ នៅតាមបណ្តាស្រុក ឱ្យយកចិត្តទុកដាក់ធ្វើការបង្ក្រាបបន្តទៀត និងទប់ស្កាត់ឲ្យខានតែបាន។
គួររំលឹកផងដែរថា យោងទៅតាមមតិប្រជាពលរដ្ឋជាច្រើននាក់ ដែលរស់នៅក្នុងខេត្តឧត្តរមានជ័យ តែងតែមានពាក្យត្អូញត្អែរថា នៅតាមតំបន់ជាយដែនកម្ពុជា-ថៃនេះ ក្នុងឆ្នាំ២០១០ និងឆ្នាំ២០១៥ ជាតំបន់សម្បូរទៅដោយព្រៃស្រោង មើលមេឃមិនឃើញ និងសម្បូរទៅដោយសត្វព្រៃរស់នៅជ្រកកោន។ ធម្មជាតិនេះហើយ ដែលជាតម្រូវការរបស់មនុស្សសត្វសម្រាប់រស់នៅជាមួយនឹងធម្មជាតិ ។
ប្រភពដដែលបានបញ្ជាក់ថា គេបានសង្កេតឃើញនៅអំឡុងឆ្នាំ២០១៥ រហូតមកទល់ក្នុងឆ្នាំ២០២៣នេះ រាល់សកម្មភាពកា.ប់បំផ្លិចបំផ្លាញព្រៃឈើបានកើតមានយ៉ាងអនាធិបតេយ្យនៅតាមតំបន់ជាយដែនកម្ពុជា-ថៃ។ ហើយវាបានក្លាយទៅជារហោឋានទៅហើយ ខណៈពេលនេះឈើដែលសេសសល់បន្តិចបន្តួច គេបានសង្កេតឃើញថា ឈើណារធំៗ ពួកគេយកទៅពុះច្រៀក រួចដឹកយកទៅលក់ ដោយឡែកចំណែកឈើដែលនៅតូចៗវិញ ក៏ត្រូវពួកគេកា.ប់បង្ហើយ រួចដឹកចូលទៅក្នុងឡដុតធ្វើជាធ្យូង ហើយដឹកជញ្ជូនតាមគោយន្ត ឬតាមរថយន្ត ដើម្បីដឹកទៅលក់នៅតាមតំបន់នានា ឬក៏ដឹកចេញយកទៅលក់នៅប្រទេសថៃក៏អាចថាបានដែរ៕
ចែករំលែកព័តមាននេះ