ស៊េរីទំនើបច្រើនគ្រឿងបញ្ឆេះម៉ាស៊ីនរោទិ៍សាកសំឡេងស៊ីម៉ាំងបង្អួតគ្នាលាន់ឮខ្លាំងៗ ផ្អើលសង្កាត់ស្វាយប៉ាក
- ភ្នំពេញ
រាជធានីភ្នំពេញ ៖ កាលពីវេលាម៉ោង៩និង១០នាទីយប់ ថ្ងៃទី១៦ខែមីនាឆ្នាំ២០២៣ ត្រង់ចំណុចជាប់
រាជធានីភ្នំពេញ ៖ កាលពីវេលាម៉ោង៩និង១០នាទីយប់ ថ្ងៃទី១៦ខែមីនាឆ្នាំ២០២៣ ត្រង់ចំណុចជាប់ស្ថានីយប្រេងតូតាល់ តាមបណ្ដោយផ្លូវ១០០៣ ក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ នគរបាលខណ្ឌឬស្សីកែវសហការជាមួយកម្លាំងការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះធ្វើការឃាត់និងដកហូតរថយន្តចំនួន១៦គ្រឿង ដែលបំពាក់ស៊ីម៉ាំងបំពងសម្លេងឮខ្លាំងខុសបច្ចេកទេស ។
តាមប្រភពព័ត៌មានពីកម្លាំងសមត្ថកិច្ចអធិការដ្ឋាននគរបាលខណ្ឌឬស្សីកែវបានអោយដឹងថា នៅមុនពេលដែលកម្លាំងសមត្ថកិច្ចចុះធ្វើប្រតិបត្តិការណ៍ចាប់ឃាត់រថយន្តទាំងនោះ គឺមានប្រជាពលរដ្ឋបានរាយការណ៍ជូនមកកម្លាំងសមត្ថកិច្ចថា មានរថយន្ដជាច្រើនគ្រឿងដែលកែច្នៃខុសលក្ខណៈដើម និងបំពាក់ស៊ីម៉ាំងបំពងសម្លេងរំខាន(លាន់ឮខ្លាំងពេក) បានធ្វើការដែលប្រមូលម្ដុំគ្នានៅត្រង់ចំណុចកើតហេតុ។ ក្រុមរថយន្តទាំងនោះបានបញ្ឆេះម៉ាស៊ីនរថយន្តរោទិ៍សាក សំឡេងស៊ីម៉ាំងបង្អួតគ្នាទៅវិញទៅមកលាន់ឮខ្លាំងៗយ៉ាងអនាធិបតេយ្យដែលធ្វើឲ្យរំខានដល់ប្រជាពលរដ្ឋដែលរស់នៅក្បែរនោះ។
តាមប្រភពដដែលបន្តថា បន្ទាប់ពីទទួលបានការរាយការណ៍ពីប្រជាពលរដ្ឋ និងដោយមានការបញ្ជារបស់ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ កម្លាំងសមត្ថកិច្ចអធិការដ្ឋាននគរបាលខណ្ឌឬស្សីកែវសហការជាមួយកម្លាំងការិយាល័យចរាចរណ៍ផ្លូវគោកនៃស្នងការដ្ឋាននរគបាលរាជធានីភ្នំពេញបានចុះធ្វើការបង្ក្រាបជាក់ស្ដែងឃាត់បានរថយន្តដែលកែច្នៃខុសលក្ខណៈដើម និងបំពាក់ស៊ីម៉ាំងបំពងសំឡេងខុសបច្ចេកទេសចំនួន១៦គ្រឿង។
បច្ចុប្បន្ន រថយន្តទាំង១៦គ្រឿងត្រូវបានកម្លាំងសមត្ថកិច្ចជំនាញយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននរគបាលរាជធានីភ្នំពេញដើម្បីរង់ចាំចាត់ការទៅតាមនិតិវិធីច្បាប់ជាបន្តទៀត ៕
ចែករំលែកព័តមាននេះ