ផ្សារភាគហ៊ុននៅអាស៊ីធ្លាក់ចុះ ចំពេលការព្រួយបារម្ភកាន់តែខ្លាំងឡើងអំពីវិបត្តិធនាគារសកល
អន្តរជាតិ ៖ ទីផ្សារភាគហ៊ុននៅទូទាំងអាស៊ី បានធ្លាក់ចុះកាលពីថ្ងៃទី១៥ ខែមីនា ឆ្នាំ២០២៣ ខណៈ
អន្តរជាតិ ៖ ទីផ្សារភាគហ៊ុននៅទូទាំងអាស៊ី បានធ្លាក់ចុះកាលពីថ្ងៃទី១៥ ខែមីនា ឆ្នាំ២០២៣ ខណៈបញ្ហានៅធនាគារអន្តរជាតិដ៏ធំ «Credit Suisse» ដែលមានមូលដ្ឋានក្នុងប្រទេសស្វីស បានបង្កើនការភ័យខ្លាចកាន់តែខ្លាំងឡើងអំពីវិបត្តិធនាគារសកល។ នេះបើយោងតាមប្រភពពីសារព័ត៌មាន BBC បានចេញផ្សាយ។
សន្ទស្សន៍ហ៊ុនសំខាន់ៗនៅក្នុងប្រទេសជប៉ុន ហុងកុង និងអូស្ត្រាលី បានធ្លាក់ចុះជាង ១% ចំពេលមានការខាតបង់កាន់តែច្រើននៅក្នុងភាគហ៊ុនធនាគារ ដែលនេះកើតឡើងនៅពេលដែលក្រុមហ៊ុន Credit Suisse ដែលជាធនាគារវិនិយោគសកល និងស្ថាប័នសេវាកម្មហិរញ្ញវត្ថុអន្តរជាតិដ៏ធំបានប្រកាសថា ខ្លួននឹងខ្ចីប្រាក់រហូតដល់ ៥៤ពាន់លានដុល្លារ ដើម្បីបង្កើនហិរញ្ញវត្ថុរបស់ខ្លួន ខណៈភាគហ៊ុនក្នុងធនាគារបានធ្លាក់ចុះបន្ទាប់ពីរកឃើញភាពទន់ខ្សោយ នៅក្នុងរបាយការណ៍ហិរញ្ញវត្ថុ។
ជាមួយនឹងវិបត្តិនេះ ធនាគារអង់គ្លេសបានទាក់ទងជាមួយក្រុមហ៊ុន Credit Suisse និងអាជ្ញាធរស្វីស ដើម្បីតាមដានស្ថានការណ៍ដ៏រសើបនេះ។
បញ្ហានៅក្នុងវិស័យធនាគារបានលេចឡើងនៅសហរដ្ឋអាមេរិក កាលពីសប្តាហ៍មុន ជាមួយនឹងការដួលរលំនៃធនាគារ Silicon Valley ដែលជាធនាគារធំលំដាប់ទី១៦ របស់ប្រទេសមហាអំណាចសេដ្ឋកិច្ចធំបំផុតរបស់ពិភពលោកមួយនេះ ហើយ២ថ្ងៃក្រោយមក ក៏មានការប្រកាសអំពីការដួលរលំនៃធនាគារ Signature ផងដែរ។
លោកស្រី Sayuri Shirai សាស្ត្រាចារ្យផ្នែកសេដ្ឋកិច្ចនៃសាកលវិទ្យាល័យ Keio ក្នុងទីក្រុងតូក្យូ បានថ្លែងប្រាប់សារព័ត៌មាន BBC ថា ការអភិវឌ្ឍន៍នៅ Credit Suisse ត្រូវបានពង្រីកដោយបញ្ហាក្នុងធនាគារតូចៗ ខណៈដែលវិនិយោគិន និងម្ចាស់បំណុលកំពុងមានការព្រួយបារម្ភអំពីហានិភ័យ។ ធនាគារអាចទទួលរងពីការរៃអង្គាសប្រាក់ ដែលនឹងប៉ះពាល់ដល់ថ្លៃដើមនៃមូលនិធិសម្រាប់សហគ្រាសធុនតូច មធ្យម និងការចាប់ផ្តើមអាជីវកម្មជាសកល។
ការដួលរលំនៃធនាគារ Silicon Valley ក៏បានជំរុញឱ្យមានការព្រួយបារម្ភអំពីតម្លៃនៃមូលបត្របំណុលដែលកាន់កាប់ដោយធនាគារផងដែរ ដោយសារតែការកើនឡើងនៃអត្រាការប្រាក់បានធ្វើឱ្យមូលបត្របំណុលទាំងនោះមានតម្លៃទាប។ ធនាគារកណ្តាលជុំវិញពិភពលោក រួមទាំងធនាគារកណ្តាលអាមេរិក និងធនាគារកណ្តាលអង់គ្លេស បានបង្កើនអត្រាការប្រាក់យ៉ាងខ្លាំង ដើម្បីព្យាយាមទប់ស្កាត់អតិផរណា។
គួររំលឹកថា ធនាគារ Silicon Valley ដែលជាធនាគារឯកទេសក្នុងការផ្តល់ប្រាក់កម្ចីដល់ក្រុមហ៊ុនបច្ចេកវិទ្យា ត្រូវបានប្រកាសបិទទ្វារជាផ្លូវការ កាលពីថ្ងៃទី១០ ខែមីនា ឆ្នាំ២០២៣ ដោយនិយតករសហរដ្ឋអាមេរិក នៅក្នុងអ្វីដែលត្រូវបានហៅថា ការបរាជ័យដ៏ធំបំផុតរបស់ធនាគារអាមេរិកចាប់តាំងពីឆ្នាំ២០០៨៕
ចែករំលែកព័តមាននេះ