មានឧកញ៉ាខ្លះកំពុងរកស៊ីឈើឡើងវិញ
ខេត្តមណ្ឌលគិរី ៖ សេចក្តីរាយការណ៍ពីស្រុកកោះញែកបានឲ្យដឹងថា ក្រុមហ៊ុន ម៉ាស្ទ័រខេសាន់
ខេត្តមណ្ឌលគិរី ៖ សេចក្តីរាយការណ៍ពីស្រុកកោះញែកបានឲ្យដឹងថា ក្រុមហ៊ុន ម៉ាស្ទ័រខេសាន់ ដែលមានទីតាំងនៅក្នុងភូមិសាស្ត្រស្រុកកោះញែកដែលកន្លងមកធ្លាប់មានរឿងអាស្រូវពាក់ព័ន្ធនឹងការរកស៊ីឈើខុសច្បាប់ ហើយត្រូវបានគណៈកម្មការថ្នាក់ជាតិរកឃើញមានឈើខុសច្បាប់ជិត១ម៉ឺនម៉ែត្រគូបនោះ កំពុងបន្តសកម្មភាពដឹកជញ្ជូនឈើយ៉ាងកក្រើកឡើងវិញអស់រយៈពេលប្រមាណជា២ខែមកនេះ ។ ក្រុមហ៊ុនម៉ាស្ទ័រខេសាន់នេះ ត្រូវបានជំនាញផ្នែករដ្ឋបាលព្រៃឈើស្រុកកោះញែក និងអភិបាលខេត្តមណ្ឌលគិរីអះអាងថា ជាក្រុមហ៊ុនស្របច្បាប់ដោយបានទទួលសិទ្ធវិនិយោគលើទំហំដីសម្បទានសេដ្ឋកិច្ចចំនួនជាង៦ពាន់ហិកតា ក្នុងការឈូសឆាយដីព្រៃ និងដឹកឈើសម្រាប់ផ្គត់ផ្គង់ទីផ្សារក្នុងស្រុក ព្រមទាំងដាំដុះដំណាំនានាដូចជាស្វាយចន្ទីរនោះផងដែរ ។
ក្រុមហ៊ុនម៉ាស្ទ័រខេសាន់ក៏ត្រូវបានគេដឹងថា មានប្រធានក្រុមហ៊ុនឈ្មោះ សឹង្ហ សំអុល ហៅឧកញ៉ា អុល ដែលមានងារជាឧកញ៉ា និងកន្លងមកឧកញ៉ារូបនោះត្រូវបានគេស្គាល់ថា ជាអ្នករកស៊ីឈើដ៏ល្បីឈ្មោះក្នុងក្រុមហ៊ុន ប៊ិញ ហ្វឿក១ កាលពីឆ្នាំ២០១៦ ។
មន្ត្រីតូចតាចមួយចំនួនបានបង្ហើបថា ក្រោយពេលដែលគណៈកម្មការថ្នាក់ជាតិបង្ក្រាបបានឈើក្នុងក្រុមហ៊ុនម៉ាស្ទ័រខេសាន់នោះឈើខុសច្បាប់ដែលមានចំនួនជិត១ម៉ឺនម៉ែត្រគូបបានដេញថ្លៃលក់ចេញដើម្បីយកថវិការដាក់ចូលកញ្ចប់ថវិការរដ្ឋ ហើយត្រូវបានឧកញ៉ាអ៊ឹង ស៊ីតាតវីរះ ដេញថ្លៃបានរួចក៏ប្រមូលឈើទាំងនោះចេញពីទីតាំងក្រុមហ៊ុនអស់មួយរយៈធំទៅហើយ ។ ប៉ុន្តែសព្វថ្ងៃក៏គេនៅតែឃើញមានវត្តមានរថយន្តកែច្នៃដឹកឈើចូលក្រុមហ៊ុន និងមានរថយន្តយីឌុបចាំដឹកញ្ជូនចេញទាំងយប់ទាំងថ្ងៃទៅលក់នៅខេត្តត្បូងឃ្មុំ ។ ជុំវិញព័ត៌មាននៃការដឹកឈើចូលក្នុងទីតាំងក្រុមហ៊ុនម៉ាស្ទ័រខេសាន់នោះនាយកដែនជម្រកសត្វព្រៃភ្នំព្រេចលោក ហាន សាខន បានថ្លែងបដិសេធថា ពុំមានករណីដូច្នេះនោះទេ ។
ទាក់ទិនករណីខាងលើនេះដែរប្រធានមន្ទីរបរិស្ថានខេត្តមណ្ឌលគិរីលោក កែវ សុភគ៌ មិនអាចសុំការបំភ្លឺបាននោះទេ ។ ដោយឡែកលោក គង់ វីរៈ នាយផ្នែករដ្ឋបាលព្រៃឈើកោះញែកបានឲ្យដឹងថា ក្រុមហ៊ុនម៉ាស្ទ័រខេសាន់ ជាក្រុមហ៊ុនមានច្បាប់វិនិយោគពីរដ្ឋាភិបាលត្រឹមត្រូវហើយមុន និងដឹកឈើចេញតាមរយៈរថយន្តយីឌុបគឺមានការចេញប័ណ្ណដឹកជញ្ជូនត្រឹមត្រូវ ពុំមានដឹកឈើខុស ច្បាប់នោះទេ ។ ដោយម្ចាស់ក្រុមហ៊ុនជាឧកញ៉ា សឹង្ហ សំអុល ។ លោក ចឹង សុចន្ថា អភិបាលរងខេត្តមណ្ឌលគិរីទទួលបន្ទុកបង្ក្រាបបទល្មើសព្រៃឈើបានថ្លែងមិនស្វាគមន៍ចំពោះការទំនាក់ទំនងរបស់អ្នកកាសែតនោះឡើយ ។ ដ្បិតលោកមានប្រសាសន៍ថា ចង់សួរអ្វីចាំជួបលោក នៅហាងកាហ្វេ ។
លោក ស្វាយ សំអ៊ាង អភិបាលខេត្តមណ្ឌលគិរីបានឲ្យដឹងថា ក្រុមហ៊ុនម៉ាស្ទ័រខេសាន់ ជាក្រុមហ៊ុនមួយដែលទទួលបានសិទ្ធវិនិយោគដីសម្បទានសេដ្ឋកិច្ចពីរដ្ឋាភិបាលលើទំហំផ្ទៃដីជាង៦ពាន់ហិកតាក្នុងការដាំដុះដំណាំស្វាយចន្ទីរ និងមានសិទ្ធពីក្រសួងកសិកម្មលើការកាប់ និងឈូសឆាយដីព្រៃក្នុងតំបន់ដែលក្រុមហ៊ុនកាន់កាប់ដើម្បីដឹកចេញបង់ពន្ធជូនរដ្ឋ ។ លោកបន្តថា ចំពោះការដឹកឈើពីមុននោះជាឈើដែលឧកញ៉ា អ៊ឹង ស៊ីតាតវិរះ ហៅឧកញ៉ា ល័ក្ខ ដេញថ្លៃពីគណៈកម្មការបានទាំងក្រុមហ៊ុនម៉ាស្ទ័រ ខេសាន់ និងក្រុមហ៊ុនដទៃជិត៧ម៉ឺនម៉ែត្រគូប ពោលគឺទូទាំងខេត្តមណ្ឌលគិរីនេះ តែឈើទាំងនោះគឺចប់១វគ្គហើយ ។លោកអភិបាលខេត្តបញ្ជាក់ថា នៅករណីក្រុមហ៊ុនខាងលើសូមបន្តសាកសួរទៅមន្ទីរកសិកម្មរុក្ខា ប្រម៉ាញ់និងនេសាទខេត្ត ព្រោះមន្ទីរមានកាតព្វកិច្ចរឿងនេះ ។
មហាជនរស់នៅខេត្តមណ្ឌលគិរីដែលបានដឹងពីព្រឹត្តការណ៏នៃយុទ្ឋនាការបង្ក្រាបឈើរបស់គណៈកម្មធិការថ្នាក់ជាតិបង្ការបង្ក្រាប និងទប់ស្តាត់បទល្មើសព្រៃឈើដែលដឹកនាំដោយនាយឧត្តមសេនីយ៏ សៅ សុខា កាលពីអំឡុងឆ្នាំ២០១៦ និងបានរកឃើញឈើខុសច្បាប់រាប់ម៉ឺនម៉ែត្រគូបនាពេលនោះបានលើកឡើងថា ករណីនៅឆ្នាំ២០១៦គេនៅមិនទាន់ឃើញមានក្រុមថៅកែ ឬមន្ត្រីពាក់ព័ន្ធណាម្នាក់ត្រូវបានបង្ហាញឈ្មោះពីសកម្មភាពឃុបឃិតកាប់បំផ្លាញឈើយ៉ាងរង្គាលផង ឥឡូវស្រាប់តែមានសកម្មភាពថ្មីគឺសកម្មភាពដឹកឈើកាប់ឈើពេញព្រៃនៃខេត្តមណ្ឌលគិរីឡើងវិញ ។
សូមរំឮកថា កាលពីដើមឆ្នាំ២០១៦ ក្រុមហ៊ុនចំនួន៥ ត្រូវបានគណៈកម្មធិការថ្នាក់ជាតិរកឃើញថា មានផ្ទុកឈើខុសច្បាប់ដែលក្នុងនោះមានក្រុមហ៊ុន ប៊ិញភ្វឿក១ ក្រុមហ៊ុនកសិកម្មខ្មែរអង្គរ ក្រុមហ៊ុនដាយថាន់ ក្រុមហ៊ុនម៉ាស្ទ័រខេសាន់ ក្រុមហ៊ុនយូនីហ្គ្រីន ។ របាយការណ៍នៃចំនួនឈើខុសច្បាប់នៅក្នុងខេត្តមណ្ឌលគិរីបានបញ្ជាក់ថា ក្រុមហ៊ុនឈ្មោះ ប៊ិញ ហ្វឿក១ មានឈើខុសច្បាប់ចំនួន ៤ ៣៨៤,៧១៤ម៉ែត្រគូប, ឈើក្នុងក្រុមហ៊ុនកសិកម្មខ្មែរអង្គរជាង១ម៉ឺនម៉ែត្រគូប, ក្រុមហ៊ុនដាយថាន់ ឈើខុសច្បាប់ជាង១ម៉ឺនម៉ែត្រគូប, ក្រុមហ៊ុន យូនីគ្រីនជាង១ពាន់ម៉ែត្រគូប និងក្រុមហ៊ុនម៉ាស្ទើរខេសាន់ ជិត១ម៉ឺនម៉ែត្រគូប ។ ហើយថ្មីៗនេះក៏លេចមុខឧកញ៉ាដែលមានជាប់ពាក់ព័ន្ធនឹងឧក្រិដ្ឋកម្មព្រៃឈើនាឆ្នាំ២០១៦ ចេញមករកស៊ី និងទំនាក់ទំនងជាមួយអាជ្ញាធរជាពិសេសមន្ត្រីជំនាញព្រៃឈើដើម្បីបន្តសកម្មភាពចាស់របស់ខ្លួនឡើងវិញ ព្រោះបានខាតបង់ធ្ងន់ធ្ងរខ្លាំងពេកកាលពីឆ្នាំ២០១៦កន្លងទៅម្យ៉ាងដើម្បីបានស្រង់ដើមដាក់ខោប៉ៅវិញខ្លះ ៕
ចែករំលែកព័តមាននេះ