ទិន្នផលចិនកើនឡើងធ្វើឱ្យទុរេន និងស្រកានាគវៀតណាមប្រឈមនឹងការផ្គត់ផ្គង់លើសកម្រិត
វៀតណាម ៖ ផ្លែស្រកានាគរបស់វៀតណាម កំពុងប្រឈមនឹងហានិភ័យនៃការផ្គត់ផ្គង់លើសតម្រូវការ
វៀតណាម ៖ ផ្លែស្រកានាគរបស់វៀតណាម កំពុងប្រឈមនឹងហានិភ័យនៃការផ្គត់ផ្គង់លើសតម្រូវការ
វៀតណាម ៖ ផ្លែស្រកានាគរបស់វៀតណាម កំពុងប្រឈមនឹងហានិភ័យនៃការផ្គត់ផ្គង់លើសតម្រូវការ ស្របពេលដែលតម្លៃផ្លៃទុរេនទំនងជានឹងធ្លាក់ចុះ ខណៈប្រទេសចិន ដែលជាប្រទេសនាំចូលផ្លែឈើច្រើនជាងគេក្នុងតំបន់ បន្តកើនឡើងនូវចំនួនទិន្នផលនៃដំណាំផ្លែឈើ២ប្រភេទនេះ។
កាលពីចុងខែកុម្ភៈកន្លងទៅ ប្រទេសចិនបានប្រកាសថា ទិន្នផលផ្លែស្រកានាគរបស់ខ្លួនបានកើនឡើងរហូតដល់ ១,៦លានតោនក្នុងមួយឆ្នាំ ពោលគឺខ្ពស់ជាងទិន្នផលរបស់វៀតណាម ដែលមានត្រឹមតែ ២០ម៉ឺនតោនប៉ុណ្ណោះ។
យោងតាមស្ថិតិគយចិនបង្ហាញថា តម្រូវការផ្លែស្រកានាគរបស់ចិនមានចំនួន២លានតោនក្នុងមួយឆ្នាំ ចំណែកទាក់ទិននឹងផ្លែទុរេន ចិនបាននាំចូលជាង៨០ម៉ឺនតោន ដែលមានតម្លៃប្រមាណ៤ពាន់លានដុល្លារ កាលពីឆ្នាំមុន។ ប៉ុន្តែប្រទេសសេដ្ឋកិច្ចធំលំដាប់ទី២ពិភពលោកមួយនេះ ទំនងជានឹងនាំចូលតិចជាងនៅឆ្នាំនេះ ដោយសារតែបន្ទាប់ពីការពិសោធន៍បរាជ័យជាច្រើនឆ្នាំកន្លងមកនោះ ទីបំផុតកសិករចិនបានដាំដុះផ្លែឈើទាំងនេះដោយជោគជ័យ នៅក្នុងតំបន់ភាគខាងត្បូងរបស់ខ្លួន។
បណ្ឌិត្យសភាវិទ្យាសាស្ត្រកសិកម្មត្រូពិចចិន ដែលស្ថិតនៅក្នុងខេត្តហៃណានបានរាយការណ៍ថា ខេត្តភាគខាងត្បូងប្រទេសចិន កំពុងដាំដុះទុរេនជាង ២ពាន់ហិកតាដែលស្មើនឹង ៤៥,០០០-៧៥,០០០តោននៃផ្លែឈើដែលបានរំពឹងថា នឹងលក់នៅឆ្នាំ២០២៤។ ខណៈដែលតាមគម្រោង ការដាំដុះផ្លៃទុរេនក៏នឹងត្រូវពង្រីកទៅកាន់ភាគខាងជើងផងដែរ។
ប្រហែលជា ៩០% នៃផលិតផលកសិកម្មសំខាន់ៗរបស់ប្រទេសវៀតណាម ត្រូវបាននាំចេញទៅកាន់ប្រទេសចិន។ ដូច្នេះដោយសារផែនការនៃការធានាការផ្គត់ផ្គង់កសិផលក្នុងស្រុករបស់ចិន កំពុងធ្វើឱ្យមុខទំនិញកសិកម្មសំខាន់ៗរបស់វៀតណាម ដែលនាំចេញទៅទីផ្សារចិន ប្រឈមមុខនឹងហានិភ័យនៃការផ្គត់ផ្គង់លើសតម្រូវការ។
យោងតាមស្ថិតិរបស់អគ្គនាយកដ្ឋានគយវៀតណាមបានបង្ហាញថា ៩០% នៃផ្លែស្រកានាគវៀតណាម ត្រូវបាននាំចេញទៅប្រទេសចិន។ ជាមួយគ្នានោះផងដែរ លោក Tran Ngoc Hiep នាយកក្រុមហ៊ុនដាំដុះផ្លៃស្រកានាគ Hoang Hau Dragon Fruit ស្ថិតក្នុងខេត្ត Binh Thuan បានថ្លែងប្រាប់សារព័ត៌មាន VnExpress ថា ការនាំចេញស្រកានាគរបស់វៀតណាមទៅប្រទេសចិនក្នុងខែដំបូងនៃឆ្នាំនេះ បានធ្លាក់ចុះរួចទៅហើយ ក្រោមទម្ងន់នៃការកើនឡើងការផ្គត់ផ្គង់ទៅភាគខាងជើង។
លោកបានបន្ថែមទៀតថា កាលពីឆ្នាំមុន ប្រទេសចិនបាននាំចូលផ្លែស្រកានាគរបស់វៀតណាមជាង ៣០០កុងតឺន័រជារៀងរាល់ថ្ងៃ តាមច្រកព្រំដែនភាគខាងជើង។ ប៉ុន្តែតួលេខឥឡូវនេះ គឺមានមិនដល់១០០កុងតឺន័រនោះទេ។
បច្ចុប្បន្នតម្លៃផ្លែស្រកានាគរបស់វៀតណាម នៅតែខ្ពស់ដោយសារកសិករក្នុងស្រុកអាចដាំដំណាំហូបផ្លែប្រភេទនេះ នៅក្រៅរដូវបាន។ ប៉ុន្តែនៅពេលដែលផ្លែស្រកានាគរបស់ចិនដាំក្នុងរដូវចាប់ពីខែមីនាដល់ខែកញ្ញានោះ ស្រកានាគវៀតណាមនឹងប្រឈមមុខនឹងហានិភ័យនៃការផ្គត់ផ្គង់លើសតម្រូវការ និងការធ្លាក់ចុះតម្លៃ។
ជាមួយគ្នានោះ ប្រសិនបើគុណភាពផ្លែឈើវៀតណាមមិនល្អប្រសើរឡើងនោះទេ ពួកគេនឹងបាត់បង់ទីផ្សារប្រទេសចិន ខណៈដែលទុរេនវៀតណាម ក៏ត្រូវប្រកួតប្រជែងជាមួយទុរេនថៃ និងម៉ាឡេស៊ីផងដែរ នៅក្នុងទីផ្សារចិន៕
ចែករំលែកព័តមាននេះ