រាជធានីភ្នំពេញ ៖ អគ្គិភ័យបានឆាបឆេះយានដ្ឋានជួសជុលរថយន្ត និងដូរប្រេងម៉ាស៊ីនយីហោ «ហ្គោលធិច» យ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់រថយន្តពន្លត់អគ្គិភ័យចេញជួយបាញ់ពន្លត់កាលពីវេលាម៉ោង២និង៤០នាទីរំលងអធ្រាត្រឈានចូលថ្ងៃទី១៤ ខែមីនា ឆ្នាំ២០២៣ នៅតាមបណ្តោយផ្លូវ៦០៨ ស្ថិតក្នុងភូមិ០៩ ក្រុម៤២ សង្កាត់បឹងកក់២ ខណ្ឌទួលគោក។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ នៅត្រង់កន្លែងដេករបស់កូនជាង ស្រាប់តែមានភ្លើងឆាបឆេះទំហំតូច ហើយក៏បានបង្កការភ្ញាក់ផ្អើលដល់ក្រុមជាង ដែលនៅក្នុងទីតាំងខាងលើ រួចនាំគ្នាយកបំពង់ឧស្ម័នពន្លត់អគ្គិភ័យ ធ្វើការបាញ់ពន្លត់ដែរ ប៉ុន្តែមិនរលត់សោះ ទើបក្រុមជាងនាំគ្នាយករថយន្តជាច្រើនគ្រឿង ដែលជារថយន្តភ្ញៀវយកមកជួសជុលក្នុងទីតាំងខាងលើ ចេញម្តងមួយៗ និងបានរាយការណ៍ទៅកាន់សមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គិភ័យតែម្តង។
ក្រោយពីទទួលដំណឹងភ្លាម ខាងការិយាល័យនគរបាលបង្ការពន្លត់អគ្គិភ័យ និងសង្គ្រោះ បានចេញរថយន្តចំនួន២គ្រឿងក្នុងមូលដ្ឋានខណ្ឌទួលគោក ទៅបាញ់ទឹកពន្លត់ភ្លាមៗផងដែរ។ ប៉ុន្តែដោយសារស្ថានភាពភ្លើងកាន់តែឆេះខ្លាំងទៅៗ និងដោយសារតែក្នុងទីតាំងខាងលើ ពោរពេញទៅដោយសារធាតុចំហេះ ដែលមានដូចជា ប្រេងម៉ាស៊ីន សាំង និងចំហាយឧស្ម័នផ្សេងទៀតនោះ ជាហេតុធ្វើឲ្យអគ្គិភ័យមួយនេះ មិនងាយគ្រប់គ្រងស្ថានការណ៍បានឡើយ។ ទើបការិយាល័យអគ្គិភ័យ ចេញរថយន្តបន្ថែមជាច្រើនគ្រឿងទៀត ដើម្បីមកធ្វើការអន្តរាគមន៍បាញ់ទេកពន្លត់ និងគ្រប់គ្រងស្ថានការណ៍បាន១០០ភាគរយផងដែរ។
ចំពោះករណីអគ្គិភ័យខាងលើនេះ បានឆាបឆេះដល់ការដ្ឋានសំណង់មួយកន្លែង រួមទាំងហាងកាហ្វេមួយកន្លែងទៀត ដែលនៅសងខាងទីតាំងកើតហេតុខាងលើ ទើបមន្ត្រីជំនាញ ធ្វើការបាញ់ទឹកទប់ស្កាត់ ដើម្បីមិនអោយរាលដាលឆេះបន្តទៀត។
លោកវរសេនីយ៍ឯក ព្រហ្ម យន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានឲ្យដឹងថា មូលហេតុដែលបណ្តាលឲ្យមានអគ្គិភ័យខាងលើនេះ គឺបណ្តាលមកពីឆ្លងចរន្តអគ្គិសនីធ្វើឱ្យឆេះរាលដាលដល់សាំង និងប្រេងម៉ាស៊ីន ទើបមន្ត្រីជំនាញ លោកត្រូវការចំណាយពេលបន្តិច រួមទាំងបច្ចេកទេសទប់ស្កាត់ក្នុងការបាញ់ពន្លត់ភ្លើង ដែលកំពុងឆេះនេះឲ្យរលត់ទៅវិញទាំងស្រុង។
គួរបញ្ជាក់ផងដែរថា ចំពោះករណីអគ្គិភ័យខាងលើនេះដែរ បានបង្កឱ្យមានការខូចខាតដល់រថយន្តចំនួន២គ្រឿង និងម៉ូតូមួយគ្រឿង រួមទាំងសម្ភារៈដែលមាននៅក្នុងទីតាំងខាងលើ ក៏ត្រូវបានឆាបឆេះខ្ទេចស្ទើរទាំងស្រុងផងដែរ៕
ចែករំលែកព័តមាននេះ