ទោះគ្មានជំនួយពីបរទេស ការបោះឆ្នោតឆ្នាំ2018នៅតែដំណើរការ
រាជធានីភ្នំពេញ ៖ ទោះបីស្ថានការណ៍នយោបាយជាតិមួយចំនួនបានកើតឡើង ដូចជាការចាប់ខ្លួនប្រធានគណបក្សមួយចំនួន
រាជធានីភ្នំពេញ ៖ ទោះបីស្ថានការណ៍នយោបាយជាតិមួយចំនួនបានកើតឡើង ដូចជាការចាប់ខ្លួនប្រធានគណបក្សមួយចំនួន
រាជធានីភ្នំពេញ ៖ ទោះបីស្ថានការណ៍នយោបាយជាតិមួយចំនួនបានកើតឡើង ដូចជាការចាប់ខ្លួនប្រធានគណបក្សមួយចំនួន និងបញ្ហាមួយចំនួនទាក់ទិននឹងបរទេស ក៏អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប)លោក ហង្ស ពុទ្ធា អះអាងថា មិនបានប៉ះពាល់ដល់ដំណើរការបោះឆ្នោតនៅកម្ពុជាទេ ។
ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន នាព្រឹកថ្ងៃទី១៤ ខែកញ្ញា លោក ហង្ស ពុទ្ធា ថ្លែងថា បើគ្មានជំនួយពីបរទេសតួ យ៉ាងដូចជំនួយពីអាមេរិក ក៏មិនប៉ះពាល់ដល់ដំណើរការបោះឆ្នោតនៅកម្ពុជាឡើយ ពីព្រោះថវិការដ្ឋបានត្រៀមគ្រប់គ្រាន់រួចស្រេចហើយក្នុងការប្រើប្រាស់សម្រាប់ដំណើរការបោះឆ្នោត ។
លោក ហង្ស ពុទ្ធា បានថ្លែងបែបនេះ ក្រោយពីបញ្ចប់កិច្ចប្រជុំផ្សព្វផ្សាយស្ដីពីដំណើរការប្រព្រឹត្តទៅនៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះឆ្នោតនៅតាមឃុំ-សង្កាត់ លទ្ធផលបណ្ដោះអាសន្ននៃការចុះឈ្មោះបោះឆ្នោត និងការផ្សព្វផ្សាយស្ដីពីការដាក់ ការទទួល និងការដោះស្រាយពាក្យបណ្ដឹងទាក់ទងនឹងការចុះឈ្មោះបោះឆ្នោត ។
លោកបញ្ជាក់ថា «ខ្ញុំសូមជម្រាបថា ប្រទេសកម្ពុជាជាប្រទេសមានអធិបតេយ្យភាពរបស់ខ្លួន ជារៀងរាល់ឆ្នាំពិសេសឆ្នាំបោះឆ្នោតតែម្ដង សភាបានសម្រេចផ្ដល់ថវិកាសម្រាប់ការបោះឆ្នោត ទោះបីជាអត់មានជំនួយពីណាមក ក៏លុយរបស់រាជរដ្ឋាភិបាលគ្រោងទុកស្រេចហើយ ។ប៉ុន្តែបើមានជំនួយវិញបានន័យថា ថវិកាជំនួយនោះនឹងត្រូវកាត់ចេញពីថវិការបស់រដ្ឋ តែបើថាអត់លុយបោះឆ្នោតគឺអត់មានទេ គ.ជ.ប នៅតែដំណើរការបោះឆ្នោតតាមការគ្រោងទុកដដែល» ។
លោក ហង្ស ពុទ្ធា បន្តថា កន្លងមក អង្គការ USAID បានឧបត្ថម្ភរថយន្តចំនួន៦គ្រឿងដល់ គ.ជ.ប ចំណែកអង្គការរបស់សហរដ្ឋអាមេរិកឈ្មោះ អាយហ្វេស ក៏បានដាក់ការិយាល័យនៅ គ.ជ.ប ជួយធ្វើការ គ.ជ.ប ដែរ ។ប៉ុន្តែបើគ្មានជំនួយពីបរទេសទាំងនោះ ក៏មិនប៉ះពាល់ដល់ដំណើរការបោះឆ្នោតនៅកម្ពុជា និងមិនប៉ះពាល់ដល់ការងាររបស់ គ.ជ.ប ដែរ ។
អ្នកនាំពាក្យ គ.ជ.ប បានបញ្ជាក់ថា គ.ជ.បអាចគ្រប់គ្រងស្ថានការណ៍បានទាំងស្រុងដោយខ្លួនឯងបាន ទាំងផ្នែកធនធានមនុស្ស និងប្រតិបត្តិការដំណើរការបោះឆ្នោត ហើយ គ.ជ.ប ជាអង្គភាពស្នូលដ៏សំខាន់ក្នុងការទទួលខុសត្រូវ លើប្រជាពលរដ្ឋរាប់លាននាក់នៅប្រទេសកម្ពុជា ។ ដូច្នេះ បើអវត្តមានដៃគូណាមួយ មិនមែនជាបញ្ហាសម្រាប់ គ.ជ.ប នោះទេ ។
ការលើកឡើងរបស់អ្នកនាំពាក្យ គ.ជ.ប នេះ គឺបន្ទាប់ពីថ្មីៗនេះ ភាពល្អក់កករនៃទំនាក់ទំនងរវាងរាជរដ្ឋាភិបាលកម្ពុជា និងស្ថានទូតអាមេរិកប្រចាំនៅកម្ពុជា បង្ហាញពីភាពក្ដៅគគុកនៅលើបណ្ដាញសារព័ត៌មាន និងបណ្ដាញសង្គមហ្វេសប៊ុក ដែលជា ហេតុធ្វើឱ្យមានការព្រួយបារម្ភពីសំណាក់មហាជនទូទៅ ពីការកាត់ផ្ដាច់ជំនួយដល់កម្ពុជា រួមទាំងជំនួយដល់ គ.ជ.ប ផងដែរ ។
ទាក់ទងនឹងការបិទវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ(NDI)វិញ លោកហង្ស ពុទ្ធា បានលើកឡើងថា មិនអាចប៉ះពាល់ដល់ដំណើរការបោះឆ្នោតនៅកម្ពុជាក្នុងឆ្នាំ២០១៨ខាងមុខនេះទេ ព្រោះថា គ.ជ.បបានគ្រប់គ្រងស្ថានការណ៍ទាំងស្រុងដូចជា អប់រំដល់អ្នកបោះឆ្នោតសាធារណៈ និងកិច្ចការអ្នកបោះឆ្នោត ។
លោកថ្លែងថា ៖ «គ.ជ.ប គឺជាស្ថាប័នស្នូលសម្រាប់ប្រជាពលរដ្ឋរាប់លាននាក់ អុីចឹង អវត្តមានរបស់អង្គការណាមួយ គ្រាន់តែជាផ្នែកមួយ និយាយដោយខ្លីទៅ គ.ជ.ប នៅតែគ្រប់គ្រងសភាពការណ៍បានដដែល» ។ជាមួយគ្នានេះ លោកក៏បានលើកឡើងថា
ករណីលោក កឹម សុខា ប្រធានគណបក្សសង្គ្រោះជាតិដែលកំពុងស្ថិតនៅក្នុងពន្ធនាគារនោះ គ.ជ.ប មិនទាន់សម្រេចយ៉ាងណានោះទេ ។លោក ហង្ស ពុទ្ធា បានអះអាងថា ករណីលោក កឹម សុខា គ.ជ.ប មិនទាន់ទទួលបានលិខិតអ្វីនោះទេ ។ ការលើកឡើងនេះ គឺបន្ទាប់ពីលោក ទេព នីថា អគ្គលេខាធិការ គ.ជ.បបានលើកឡើងថា ការសម្រេចលុបឈ្មោះអ្នកជាប់ពន្ធនាគារស្ថិតនៅក្នុងដៃរបស់អាជ្ញាធរឃុំ សង្កាត់នីមួយៗ ក្នុងការធ្វើរបាយការណ៍ជូនមកគ.ជ.ប ។
លោក ហង្ស ពុទ្ធា បញ្ជាក់ថា «យើងមិនទាន់ទទួលបានព័ត៌មានលុបឈ្មោះអ្នកជាប់ពន្ធនាគារនោះទេ ប៉ុន្តែអាជ្ញាធរឃុំ-សង្កាត់ គាត់ជាអ្នកក្តាប់បាន ។ អីុចឹង គាត់ជាអ្នកស្រង់ចំនួនអ្នកដែលត្រូវលុបចេញនោះ ហើយការស្រង់នឹងត្រូវរាយការណ៍ស្នើមក គ.ជ.ប ។ នៅពេល គ.ជប ពិនិត្យឃើញថាមានលិខិតរបស់ពន្ធនាគារនិងតុលាការសព្វបែបសព្វយ៉ាងហើយ បាន គ.ជ.បសម្រេចឱ្យឬព្យូរឈ្មោះគាត់» ។ ចំពោះករណីលោក កឹម សុខា ប្រធានគណបក្សសង្គ្រោះជាតិវិញ លោក ហង្ស ពុទ្ធា ថ្លែងថា គ.ជ.ប មិនទាន់ ទទួលបានព័ត៌មានណាមួយទេ ប៉ុន្តែប្រសិនបើតុលាការសម្រេច គ.ជ.ប នឹងអនុវត្តច្បាប់ដែលមានជាធរមាន ។
ចំពោះសំណួររបស់អ្នកសារព័ត៌មានថា តើរង់ចាំទាល់តែគាត់(កឹម សុខា) ត្រូវបានតុលាការសម្រេចសិនឬយ៉ាងណានោះ ? លោកគូសបញ្ជាក់ថា «ចង់មិនចង់ គាត់ស្ថិតនៅក្នុងពន្ធនាគារ ទោះបីជាមិនទាន់ស្ថាពរគឺគាត់នៅក្នុងពន្ធនាគារ» ។សូមជម្រាបថា គ.ជ.ប សម្រេចឱ្យមន្ត្រីចុះឈ្មោះបោះឆ្នោតឈប់សម្រាក៣ថ្ងៃ នាឱកាសបុណ្យភ្ជុំបិណ្ឌនេះ ៕
ចែករំលែកព័តមាននេះ