រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងស្នើឲ្យកម្មករ កម្មការិនីត្រូវចូលរួមជាមួយរាជរដ្ឋាភិបាលដើម្បី
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងស្នើឲ្យកម្មករ កម្មការិនីត្រូវចូលរួមជាមួយរាជរដ្ឋាភិបាលដើម្បីរក្សាសុខសន្តិភាពដែលមានក្នុងដៃ ជៀសវាងបង្កចលាចលនៅរោងចក្រដែលអាចឈានដល់ការបាត់បង់ការងារ ។
នៅក្នុងឱកាសជួបសំណេះសំណាលជាមួយកម្មករ និយោជិតជាង១ម៉ឺននាក់នៅសួនឧស្សាហកម្មវឌ្ឍៈ១ តាមបណ្តោយផ្លូវ រាជធានីភ្នំពេញ ថ្ងៃទី ១៥ ខែកញ្ញា ឆ្នាំ២០១៧ នេះ សម្តេចបានរម្លឹកទៅដល់ចលាចលនៅចុងឆ្នាំ២០១៣ និងដើមឆ្នាំ២០១៤ ដែលមានបាតុកម្មក្លាយទៅជាកុបកម្មហឹង្សានោះ គឺសម្តេចបានចោទជាសំនួរថា តើមានកម្មកររោងចក្រកាត់ដេរពិតប្រាកដចំនួនប៉ុន្មានចេញមកធ្វើបាតុកម្មនោះ ជាពិសេសគឺវាមិនអាចទៅរួចទេ ដែលកម្មករ កម្មការិនីនាំគ្នាតវ៉ាទាមទារលក្ខខណ្ឌ និងប្រាក់ឈ្នួលអប្បបរមានៅម៉ោង ២ ភ្លឺនោះ ។
សម្តេចបានបញ្ជាក់ថា៖ «ក្មួយមិនត្រូវទុកឲ្យចលាចល ណាមួយកើតឡើងនៅក្នុងតំបន់រោងចក្ររបស់ខ្លួនទេ […] ។ ចុងឆ្នាំ២០១៣ និងដើម ២០១៤ ផ្លូវវេងស្រេងជាចំណុចក្តៅ»។
សម្តេចបានឲ្យដឹងផងដែរថា អ្នកតំណាងរាស្ត្របក្សប្រឆាំងមួយរូបដែលបានចែកនំបុ័ងដល់កុបករ និងបានគេចទៅដល់អាមេរិកហើយ ។ អ្នកតំណាងរាស្ត្រម្នាក់នោះ បានគេចខ្លួនពីកម្ពុជា តាមច្រកកំរៀង ខេត្តបាត់ដំបងកន្លងមក បានគេចទៅដល់អាមេរិកហើយ បន្ទាប់ពីបរាជ័យចូលប្រទេសកាណាដាកាលពីថ្ងៃទី ១៤ ខែកញ្ញា។
សម្តេចបានដាក់ផ្លែថា៖ «ចេះភ័យខ្លួនដែរ» ។ សម្តេចនាយករដ្ឋមន្ត្រីបានថ្លែងថា ហឹង្សាពិតប្រាកដនៅទីនេះ (តាមបណ្តោយផ្លូវវេងស្រេង) គឺមិនមែនចេញពីកម្មករនោះទេ តែមានមេដឹកនាំកម្មករ ដែលបានទៅទម្លាយទ្វាររោងចក្រមួយចំនួននៅភ្នំពេញ និងស្វាយរៀង នៅពេលកម្មករពិតប្រាកដនៅបន្តការងារធ្វើមិនចូលរួមបាតុកម្មរបស់គេ ។
នៅព្រឹត្តិការដែលកើតមាននៅចុងឆ្នាំ២០១៣ និងដើមឆ្នាំ ២០១៤ ក៏មានបក្សប្រឆាំង និងសង្គមស៊ីវិលមួយចំនួនថា មានបាត់ខ្លួនមនុស្សម្នាក់ផងដែរ។ សម្តេចក៏បានបញ្ជាក់ថា មេខ្លោងក្បត់ជាតិ (សំដៅលើលោក កឹម សុខា មេបក្សសង្គ្រោះជាតិ) ត្រូវបានចាប់ខ្លួនហើយ ។
សម្តេចបានបញ្ជាក់ថា៖ «អញ្ចឹងដើម្បីរក មនុស្សដែលបាត់ខ្លួន ទាល់តែនាំអាមេបាតុកម្ម យកមកសួរចម្លើយ ។ យកប្រមូលមេបាតុកម្ម ទាំងឡាយមកសួរចម្លើយ ទើបដឹងថាមនុស្សបាត់ខ្លួនទៅណា?» ។ សម្តេចបានបញ្ជាក់ថ្មីថា កម្មករទាំងអស់មិនត្រូវឲ្យមានចលាចលកើតឡើង ដែលនាំឲ្យមានបាត់បង់ការងារ និងខ្វះសុវត្តិភាពការងាររបស់យើងទេ ហើយមិនត្រូវទុកឲ្យរោងចក្ររបស់យើងពោរពេញទៅដោយបងតូចបងធំ និងក្មេងគ្រឿងញៀនមកបំផ្លាញការងារទេ ៕
ចែករំលែកព័តមាននេះ