គុកសមណាស់… ក្រោយលេងល្បែងស្នេហ៍ស៊ីទាំងខ្លួន ស៊ីទាំងទ្រព្យ
ខេត្តព្រៃវែង ៖ បុរសម្នាក់ត្រូវបាននគរបាលស្រុកកញ្ជ្រៀចតាមស្វែងរករហូតឃាត់ខ្លួនបាននៅរាជធានីភ្នំពេញ
ខេត្តព្រៃវែង ៖ បុរសម្នាក់ត្រូវបាននគរបាលស្រុកកញ្ជ្រៀចតាមស្វែងរករហូតឃាត់ខ្លួនបាននៅរាជធានីភ្នំពេញ ដោយយោងតាមពាក្យបណ្តឹងរបស់នារីជាសង្សារចោទប្រកាន់ថា បានលួងនាងដេកជាមួយ រួចក៏លួចដោះយកទ្រព្យសម្បត្តិអស់គ្មានសល់ រួចយកទៅលក់នៅរាជធានីភ្នំពេញ ។
ប្រភពឱ្យដឹងថា ជនសង្ស័យខាងលើឈ្មោះហុង គឹមឡេង អាយុ២៣ឆ្នាំ មានទីលំនៅភូមិត្រពាំងឈូក ឃុំម៉េសរជ្រៃ ស្រុកស្ទឹងត្រង់ ខេត្តកំពង់ចាម ត្រូវសមត្ថកិច្ចឃាត់ខ្លួនបានកាលពីល្ងាចថ្ងៃទី១០ កញ្ញា ស្ថិតនៅចំណុចមុខហាងម៉ាស្សាបឹងត្របែក ក្នុងខណ្ឌចំការមន រាជធានីភ្នំពេញ ក្នុងពេលឃាត់ខ្លួន សមត្ថកិច្ចរកឃើញវត្ថុតាងមួយចំនួននៅជាប់ខ្លួនជនសង្ស័យផងដែរ ។
លោក ពៅ ជីវី ស្នងការរងខេត្តព្រៃវែងបានឲ្យដឹងថា ក្រោយពីការទទួលបណ្តឹងនារីសង្សារមានអាយុ២៧ឆ្នាំ ថា ជនសង្ស័យដែលត្រូវជាសង្សារបានលួចយកទ្រព្យសម្បត្តិពីខ្លួន កាលពីយប់ថ្ងៃទី០៩ កញ្ញា ។ លោកបន្តទៀតថា តាមពាក្យបណ្តឹងទ្រព្យសម្បត្តិដែលបានបាត់បង់រួមមានចិញ្ចៀនពេជ្រ២វង់ (តំលៃ២៣៥ដុល្លារ,) ខ្សែជើងប្លាកទីន២ខ្សែ, នាឡិកាដាំពេជ្រ១គ្រឿងតម្លៃ២៨០០ដុល្លារ, ទូរសព្ទ័១គ្រឿងតម្លៃ១០៥០ដុល្លារ, លុយដុល្លារ២៥០ដុល្លារ សរុបស្មើ៧៧៤២ដុល្លារ ។
ប្រភពដដែលបញ្ជាក់ថា នារីរងគ្រោះធ្លាប់មានទំនាក់ទំនងស្នេហាជាមួយជនសង្ស័យជាយូរហើយ ទើបក្រោយពេលកើតហេតុ នារីរងគ្រោះស្គាល់ទីតាំងដែលជនសង្ស័យយកគ្រឿងអលង្កាទៅលក់ ដែលផ្អែកលើវិក្កយបត្រ ។
ចែករំលែកព័តមាននេះ