អ្នកបើកបររថយន្តឡិចស៊ីសម្នាក់បានស្លា.ប់កៀបជាប់ក្នុងរថយន្តរបស់ខ្លួន នៅពេលបើកទៅបុកគូថរថយន្តធុនធ្ងន់មួយគ្រឿងពីក្រោយពេញទំហឹង ដែលចតស្ងៀមក្បែរចិញ្ចើមថ្នល់ បង្កឱ្យមានការភ្ញាក់ផ្អើលកាលពីវេលា
ខេត្តបាត់ដំបង ៖ អ្នកបើកបររថយន្តឡិចស៊ីសម្នាក់បានស្លា.ប់កៀបជាប់ក្នុងរថយន្តរបស់ខ្លួន នៅពេលបើកទៅបុកគូថរថយន្តធុនធ្ងន់មួយគ្រឿងពីក្រោយពេញទំហឹង ដែលចតស្ងៀមក្បែរចិញ្ចើមថ្នល់ បង្កឱ្យមានការភ្ញាក់ផ្អើលកាលពីវេលាម៉ោង១០និង២០នាទីយប់ ថ្ងៃទី០៣ ខែមីនា ឆ្នាំ២០២៣ នៅលើកំណាត់ផ្លូវហាយវេ ត្រង់ចំណុចភូមិច្រាបក្រសាំង សង្កាត់វត្តគរ ក្រុងបាត់ដំបង។
បើតាមប្រភពពីសមត្ថកិច្ចបានឲ្យដឹងថា ជនរងគ្រោះខាងលើមានឈ្មោះ ទូច ចាន់ឌឿន ភេទប្រុស អាយុ៤៥ឆ្នាំ រស់នៅស្រុកភ្នំព្រឹក បានជិះរថយន្តម៉ាកឡិចស៊ីស RX.300 ពាក់ស្លាកលេខ ភ្នំពេញ2AP.1530។ រីឯរថយន្តម្ខាងទៀតប្រភេទសណ្ដោង ម៉ាក HYUNDAI ពាក់ស្លាកលេខ ពោធិ៍សាត់ 3A.1067 តែភ្លាមៗគេមិនទាន់ស្គាល់អត្តសញ្ញាណអ្នកបើកបររថយន្តយក្សនេះនៅឡើយទេ។
សមត្ថកិច្ចបានប្រាប់បន្តថា បើតាមការពិនិត្យជាក់ស្តែងនៅកន្លែងកើតហេតុ រថយន្តទាំង០២គ្រឿងធ្វើដំណើរក្នុងគោលដៅស្របទិសគ្នាពីត្បូងទៅជើង ប៉ុន្តែពេលកើតហេតុ គឺរថយន្តធុនធ្ងន់ចតស្ងៀមលើចិញ្ចើមថ្នល់ ហើយរថយន្តឡិចស៊ីសបានបើកទៅបុកគូថរថយន្តយក្សនេះពីក្រោយពេញទំហឹងតែម្តង។ គេមិនដឹងថា តើរថយន្តសណ្ដោងដែលចតលើចិញ្ចើមថ្នល់ខាងលើនេះខូចឬយ៉ាងណានោះទេ? ហើយគេមិនឃើញមានដាក់ស្លាកសញ្ញាបង្ហាញនៅលើដងផ្លូវសម្គាល់ទេ តែគេឃើញរថយន្តនេះ មានបើកភ្លើងជាសញ្ញា ដើម្បីឲ្យអ្នកដំណើមើលឃើញដែរ។ ដោយឡែកភាគីរថយន្តឡិចស៊ីសវិញ គេសង្ស័យបើកបរលឿនគួរសម ទើបបុកគូថរថយន្តធំពីក្រោយពេញទំហឹងរហូតកៀបជាប់មនុស្សក្នុងរថយន្តបែបនេះ។
ទោះបីជាយ៉ាងណា មន្ត្រីចរាចរណ៍បានចុះទៅពិនិត្យកន្លែងកើតហេតុភ្លាមៗដែរ ក្រោយពីទទួលបានព័ត៌មានខាងលើនេះ។
ក្រោយធ្វើការត្រួតពិនិត្យ សមត្ថកិច្ចក៏បានទំនាក់ទំនងទៅក្រុមគ្រួសារជនរងគ្រោះ ដើម្បីមកទទួលយកសាកស.ពជនរងគ្រោះទៅកាន់លំនៅឋាន ដើម្បីធ្វើបុណ្យតាមប្រពៃណី រីឯមធ្យោបាយនៃភាគីទាំង០២ ត្រូវបានមន្ត្រីចរាចរណ៍យកទៅរក្សាទុក ដើម្បីដោះស្រាយតាមផ្លូវច្បាប់៕
ចែករំលែកព័តមាននេះ