ទីក្រុងបាងកក, ប្រទេសថៃ៖ គ្រូពេទ្យនៅប្រទេសថៃកំពុងដាក់វេនគ្នា ដើម្បីមើលថែទាំអាការៈជំងឺរបស់នាយករដ្ឋមន្ត្រីថៃ លោកប្រាយុទ្ធចាន់អូចា ដែលលោកកំពុងតែសម្រាកនៅក្នុងមន្ទីរពេទ្យមួយកន្លែងតាំងពីយប់ថ្ងៃសុក្រមកម៉្លេះ។ គ្រូពេទ្យត្រូវការពិនិត្យតាមដានសុខភាពរបស់លោកជាប់ជាប្រចាំ។ គ្រូពេទ្យរកឃើញភាពមិនប្រក្រតីមួយ នៅពេលពិនិត្យមើលដៃស្ដាំរបស់លោកប្រាយុទ្ធចាន់អូចាដែលចាប់ផ្ដើមហើមយ៉ាងខ្លាំងនៅថ្ងៃសៅរ៍នេះ។
លោកប្រាយុទ្ធចាន់អូចាថតបង្ហាញរូបដៃស្ដាំរបស់លោកកំពុងតែហើមខ្លាំង (រូបផ្សព្វផ្សាយដោយវិមានរដ្ឋាភិបាលថៃ)លោកប្រាយុទ្ធប្រញាប់ចាត់មនុស្សឱ្យដឹកលោកទៅមន្ទីរពេទ្យ «ព្រះមង្ឃុតក្លាវ -Phramongkutklao» នៃទីក្រុងបាងកកជាបន្ទាន់ បន្ទាប់ពីលោកវិលត្រឡប់ពីធ្វើដំណើរផ្លូវឆ្ងាយទៅកាន់ខេត្តអាយុធ្យា។ មកដល់បាងកកវិញ ស្រាប់តែដៃរបស់លោកចាប់ផ្ដើមហើមខ្លាំងតែម្ដង។ រហូតមកដល់ពេលនេះ គេពុំទាន់ឃើញសេចក្ដីប្រកាសជាផ្លូវការចេញពីខុទ្ទកាល័យរបស់លោកប្រាយុទ្ធចាន់អូចា ឬពីមន្ទីរពេទ្យដែលលោកកំពុងសម្រាកព្យាបាលជំងឺនៅឡើយទេ។
លោកប្រាយុទ្ធចាន់អូចាឆ្លៀតនិយាយជាមួយអ្នកកាសែត ពេលលោកកំពុងជិះនៅក្នុងរថយន្ត (នៅក្នុងរូបនេះ គេអាចមើលឃើញដៃរបស់លោកមានសភាពហើមយ៉ាងខ្លាំង)ព័ត៌មានបឋមបង្ហាញថាដៃស្ដាំរបស់លោកប្រាយុទ្ធចាន់អូចាកំពុងហើមខ្លាំងមែនទែន ហាក់ដូចជាមានអាការៈរលាកដោយសារជំងឺនៅខាងក្នុងខ្លួន។ គ្រូពេទ្យបានផ្ដល់ថ្នាំប្រឆាំងបាក់តេរី ឬអង់ទីប៊ីយ៉ូទិច ដើម្បីឱ្យលោកលេប ព្រោះគ្រូពេទ្យរកឃើញភាពមិនប្រក្រតីមួយកើតឡើងចំពោះរូបលោក។ ប៉ុន្តែគ្រូពេទ្យមិនទាន់សន្និដ្ឋានថាជាអ្វីឱ្យពិតប្រាកដនៅឡើយទេ។ គេឃើញជំនួយការរបស់លោកប្រាយុទ្ធចាន់អូចាដឹកជញ្ជូនសំលៀកបំពាក់ និងរបស់របរប្រើប្រាស់ផ្ទាល់ខ្លួនពីផ្ទះរបស់លោកទៅកាន់មន្ទីរពេទ្យកាលពីល្ងាចថ្ងៃសៅរ៍។ ចំណែករថយន្តរបស់ភរិយាលោកប្រាយុទ្ធចាន់អូចា ត្រូវគេប្រទះឃើញចតទុកចោលនៅក្នុងបរិវេណមន្ទីរពេទ្យ។ ចាប់តាំងពីពេលលោកចូលសម្រាកនៅទីនោះជាលើកដំបូងរហូតមកដល់ពេលនេះ រថយន្តនោះមិនទាន់ចាកចេញទៅវិញនៅឡើយទេ។
មន្ទីរពេទ្យ ព្រះមង្ឃុតក្លាវ ដែលលោកប្រាយុទ្ធចាន់អូចាកំពុងសម្រាកព្យាបាលជំងឺប្រភពខ្លះអះអាងថាបើគេពិនិត្យទៅលើភិនភាគខាងក្រៅនៃការហើមដៃរបស់លោកប្រាយុទ្ធចាន់អូចា មានអាការៈស្រដៀងនឹងជំងឺមួយប្រភេទដែលបណ្ដាលមកការឡើងជាតិកាល់ស្យូមខ្ពស់នៅក្នុងឈាម ដែលហៅតាមភាសាពេទ្យថា pseudogout។ ជំងឺនេះបណ្ដាលឱ្យរលាកសន្លាក់។ ប៉ុន្តែមិនពាក់ព័ន្ធនឹងករណីឡើងជាតិអាស៊ីដអ៊ុយរិចខ្ពស់នៅក្នុងឈាមទេ។ ជំងឺ psudogout បណ្ដាលឱ្យឈឺចុកចាប់ រឹងដៃជើង ស្បែកប្រែទៅជាពណ៌ក្រហម ក្ដៅខ្លួន និងឈឺសន្លាក់។ ជាពិសេស កន្លែងដែលឈឺចុកចាប់ខ្លាំងជាងគេគឺក្បាលជង្គង់ និងកដៃ៕
ដកស្រង់ពីកាសែតបាងកកប៉ុស្តិ៍អនឡាញ
https://www.bangkokpost.com/thailand/general/2520341/prayut-to-spend-night-in-hospital-with-possible-pseudogout
ចែករំលែកព័តមាននេះ