ភ្នំពេញ៖ ក្រោយពីមានការកស្ទះចរាចរណ៍ជាច្រើនម៉ោង នៅការដ្ឋានសាងសង់ស្ពានអាកាស​ព្រះមុនីវង្ស កាលពីថ្ងៃ១មីនា កន្លងមកនះ អាជ្ញាធររាជធានីភ្នំពេញ បានកោះហៅមន្ត្រីជំនាញ ,ក្រុមហ៊ុនសាងសង់ និងប៉ូលិសចរាចរណ៍ មកប្រជុំ ដើម្បីរិះមកគ្រប់មធ្យោបាយ ដោះស្រាយ​បញ្ហាកកស្ទះចរាចរណ៍ នៅចំណុចការដ្ឋាននេះ អោយបានល្អប្រសើរជាងមុន។

កិច្ចប្រជុំនេះ បានធ្វើឡើង នាល្ងាចថ្ងៃទី០៣ ខែមីនា ឆ្នាំ២០២៣នេះ ក្រោមអធិបតីភាពលោក កើត ឆែ អភិបាលរងរាជធានីភ្នំពេញ នៅសាលារាជធានីភ្នំពេញ។

លោក កើត ឆែ បានមានប្រសាសន៍ថា ​កិច្ចប្រជុំខាងលើនេះ ដើម្បីអោយមន្ត្រីជំនាញ ​ក្រុមហ៊ុនសាងសង់ និងប៉ូលិសចរាចរណ៍ រួមគ្នាគំនិតគ្នា រកគ្រប់មធ្យោបាយដោះស្រាយ ដោយសារកន្លងមកនេះ មានការកកស្ទះចរាចរណ៍ខ្លាំង ពិសេសកាលពីថ្ងៃ១មីនាកន្លងមកនះ នៅតំបន់ការដ្ឋាននេះ បានកកស្ទះចរាចរណ៍ រហូតដល់ទៅ ៥ ទៅ ៦ម៉ោងឯណោះ។

លោក កើត ឆែ បានជំរុញអោយធ្វើការកែសម្រួល ដោយបង្រួមរបងការដ្ឋាន អោយតូចជាងមុន កែសម្រួលផ្លូវមួយចំនួន ជាមួយនឹងការដោះស្រាយជាមួយអ្នកលក់ដូរលើចិញ្ចឹមផ្លូវ នៅតំបន់នេះ អោយបានល្អប្រសើរ​សំដៅអោយមានលំហូរចរាចរណ៍បានល្អ។

បន្ថែមពីនេះ លោក កើត ឆែ ក៏បានជំរុញអោយមន្ត្រីរដ្ឋបាលរាជធានីភ្នំពេញ រៀបចំជាផែនការអោយបានជាក់លាក់មួយ ដើម្បីចេញសេចក្តីជូនដំណឹងមួយ ក្នុងការបង្វែរទិសចរាចរណ៍ ចេញនិងចូលក្រុងភ្នំពេញ ដោយមិនអោយឆ្លងកាត់តំបន់ការដ្ឋានសាងសង់ស្ពានអាកាសព្រះមុនីវង្សនេះ។

គួរបញ្ជាក់ថា​ ស្ពានអាកាសព្រះមុនីវង្ស មាន​ទីតាំងប្រសព្វរវាងមហាវិថី​សម្តេចអគ្គមហាសេនាបតីតេជោ ហ៊ុន សែន ឬផ្លូវ ៦០ម៉ែត្រ មហាវិថីព្រះមុនី្នវង្ស និងវិថី​កងយោធពលខេមរភូមិន្ទ (ផ្លូវលេខ ២៧១) ជាស្ពានអាកាសដំបូងគេ ដែលមានរង្វង់មូលលើអាកាស​។ស្ពា នអាកាសថ្មីនេះត្រូវបាន​​សម្តេច​តេជោ ហ៊ុន សែន ​អញ្ជើញជាអធិបតីភាពដ៏ខ្ពង់ខ្ពស់ បើកការដ្ឋានស្ថាបនា នៅព្រឹកថ្ងៃទី៣១ សីហា ឆ្នាំ២០២២។

គម្រោងសាងសង់ស្ពានអាកាសថ្មីនេះ ជាគម្រោងរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC ដោយគ្រោងចំណាយថវិកាចំនួន ៣៦.៧៧៥.០០០ ដុល្លាអាមេរិក ប្រើប្រាស់រយៈពេលសាងសង់ ៣៦ខែ៕