៨ម៉ោងក្រោយ… ទើបដឹងថា គឺប្តីនិងប្អូនប្រុសសោះ
សមត្ថកិច្ចវែកមុខភ្លាមៗប្រើពេលតែ៨ម៉ោងប៉ុណ្ណោះ
ខេត្តស្វាយរៀង ៖ ទីបំផុត បុរសជាប្តីកំណាចនិងប្អូនប្រុសរបស់ខ្លួន គឺជាអ្នកសម្លាប់ប្រពន្ធប្លន់យកទ្រព្យសម្បត្តិ ហើយត្រូវបានសមត្ថកិច្ចវែកមុខភ្លាមៗប្រើពេលតែ៨ម៉ោងប៉ុណ្ណោះ បន្ទាប់ពីបុរសជាប្តីប្តឹងសមត្ថកិច្ចថា ពេលខ្លួនមិននៅផ្ទះចោរប្លន់សម្លាប់ប្រពន្ធយកទ្រព្យសម្បត្តិ តែតាមពិតខ្លួនឯងគឺជាចោរបាញ់សម្លាប់ប្រពន្ធប្លន់យកទ្រព្យសម្បត្តិ ទៅផ្គាប់ចិត្តស្រីថ្មីសោះ ។ ហេតុតែឈាមស្រែកស្បែកហៅទើបសមត្ថកិច្ចមានការសង្ស័យបានធ្វើការស៊ើបអង្កេតស្រាវជ្រាវរហូតបំបែកសំណុំរឿងនេះ ។
តាមលោក កែវ សុថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានឱ្យដឹងថា សមត្ថកិច្ចជំនាញនៃស្នងការដ្ឋាននគរបាលខេត្តស្វាយរៀង បានធ្វើការស្រាវជ្រាវ ហើយបានកំណត់មុខសញ្ញាឈានទៅដល់ការបំបែកសំណុំរឿងនេះបានទាំងស្រុង ក្នុងរយៈពេល៨ម៉ោងក្រោយពីសាកសួរបុរសជាប្តីស្ត្រីរងគ្រោះរួច ដោយបានឃាត់ខ្លួនបានជនសង្សយ័ចំនួន២នាក់ គឺបុរសជាប្តីនិងប្អូនប្រុសដែលត្រូវជាប្អូនថ្លៃស្ត្រីរងគ្រោះ និងរឹបអូសវត្ថុតាងអាវុធAK៤៧កាត់ស្វាយ១ដើម នៅលំនៅឋានរបស់ជនសង្ស័យផ្ទាល់ ។ ជនសង្ស័យគឺជាប្តីក្រោយរបស់ស្ត្រីរងគ្រោះ ។
គួររំលឹកថា ស្ត្រីមានផ្ទៃពោះបីខែម្នាក់ត្រូវបានបាញ់សម្លាប់ដោយអាវុធAK៤៧ប្លន់យកទ្រព្យសម្បត្តិដោយក្រុមចោរបានបាញ់ចំនួន២គ្រាប់ ១គ្រាប់ត្រូវចំសៀតផ្កាធ្លាយទៅម្ខាងដេកស្លាប់ថ្លុកឈាមក្រោមផ្ទះជិតជណ្តើរ ហើយចោរប្លន់បានយកទ្រព្យសម្បត្តិអស់ខ្សែកមាស១តម្លឹង ខ្សែដៃមាស១តម្លឹង៥ជី ប្រាក់១៧០០ដុល្លារ និងប្រាក់រៀល២.៧០០.០០០រៀល ខណៈប្តីនិងកូនៗមិននៅផ្ទះ ព្រោះទៅធ្វើការនៅភ្នំពេញ ។
ករណីប្រឌិតជាចោរប្លន់ប្រដាប់អាវុធនេះបានកើតឡើងនៅម៉ោងប្រមាណជា៨យប់ថ្ងៃទី២៥ សីហា និងធ្វើឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចនៅវេលាម៉ោង៨និង៣៥ព្រឹកថ្ងៃទី២៦ សីហា ស្ថិតក្នុងភូមិតាប៉ ឃុំតាសួស ស្រុកស្វាយជ្រំ ។ បុរសជាប្តីឈ្មោះ សូរ ឈន អាយុ ៥៤ឆ្នាំ មុខរបរអ្នកម៉ៅការសំណង់បានប្រាប់ប៉ូលិសឱ្យដឹងថា ស្ត្រីរងគ្រោះឈ្មោះ វ៉ា សំអូន អាយុ៤០ឆ្នាំ ត្រូវជាប្រពន្ធធ្វើការនៅរោងចក្រក្នុងក្រុងបាវិត។ នៅល្ងាចថ្ងៃទី២៥ សីហា ម៉ោងប្រមាណជាង៤រសៀល ខ្លួនបានទូរស័ព្ទពីភ្នំពេញមកសួរប្រពន្ធថា មានធ្វើការថែមម៉ោងអត់?
ស្ត្រីរងគ្រោះ(ប្រពន្ធ)បានឆ្លើយថាធ្វើ ។ លុះដល់ម៉ោងជាង៨យប់ ក៏ទូរស័ព្ទសួរទៀត តែគ្មានអ្នកលើកនោះទេ ។ ប្រភពខាងលើបានបន្តថា ដោយសង្ស័យប្រហែលជាមានរឿងអី្វហើយ ក៏ហៅក្មួយប្រុសជិះម៉ូតូឌុបទៅខេត្តស្វាយរៀងនៅម៉ោង៣និង៣០នាទីទៀបភ្លឺថ្ងៃទី២៦ សីហា រហូតមកដល់ម៉ោង៨និង៣៥នាទីព្រឹក ក៏មកដល់ផ្ទះស្រាប់តែឃើញប្រពន្ធដេកស្លាប់នៅក្រោមផ្ទះជិតកាំជណ្តើរគួរឱ្យសង្វេគក៏ឆោឡោបង្កឱ្យមានការភ្ញាក់ផ្អើលដល់អ្នកភូមិនិងរាយការណ៍ទៅសមត្ថកិច្ចដើម្បីមកពិនិត្យសព ។
បើតាមអ្នកភូមិដែលមានផ្ទះនៅជិតកន្លែងកើតហេតុបានឱ្យដឹងថា នៅយប់ថ្ងៃកើតហេតុនោះគឺនៅក្នុងភូមិមានពិធីបូជាសពនិងមានការបាញ់កាំជ្រួចផង បន្ទាប់មកក៏បានឮស្នូរផ្ទុះអាវុធចំនួន២គ្រាប់ ។ ពេលនោះអ្នកភូមិស្មានថា ជាស្នូរបាញ់កាំជ្រួច និងអ្នកខ្លះគិតថា ផ្ទុះកំប៉ុងហ្គាសគ្មាននរណាចាប់អារម្មណ៍ឡើយ លុះព្រឹកឡើងទើបដឹងថាជាករណីប្លន់សម្លាប់ទើបបង្កឱ្យភ្ញាក់ផ្អើលពេញភូមិមកចោមរោមមើល ។
បើតាមលោកវរសេនីយ៍ទោ កែវ ស៊ីថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀង បានប្រាប់តាមទូរស័ព្ទនៅរសៀលថ្ងៃទី២៦ សីហា ឱ្យដឹងថា ក្រោយពីទទួលបានព័ត៌មានករណីបាញ់សម្លាប់ស្ត្រីរងគ្រោះខាងលើ សមត្ថកិច្ចចុះទៅដល់កន្លែងកើតហេតុធ្វើការពិនិត្យសពរួច គឺសន្និដ្ឋានថាជាករណីបាញ់សម្លាប់យកទ្រព្យសម្បត្តិពិតប្រាកដមែន ។ ដោយប្តីស្ត្រីរងគ្រោះប្រាប់ថា ទ្រព្យសម្បត្តិដែលបាត់បង់នោះរួមមានខ្សែ.កមាស១តម្លឹង ខ្សែដៃ២ខ្សែ ស្មើ១តម្លឹងកន្លះ លុយដុល្លារ១៧០០ ប្រាក់រៀល២.៧០០.០០០រៀល និងរកឃើញសំបកគ្រាប់AK៤៧ចំនួន២គ្រាប់ នៅជិតកន្លែងកើតហេតុ ។ ទោះបីជាបែបណាសមត្ថកិច្ចកំពុងដុតដៃដុតជើងស្រាវជ្រាវលើសំណុំរឿងនេះ ៕
ចែករំលែកព័តមាននេះ