ខេត្តបាត់ដំបង ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលយ៉ាងខ្លាំងមួយ ក្រោយមានករណីចោរកាច់សោ.កម៉ូតូយកទៅដោយសុវត្ថិភាពអស់ចំនួន២គ្រឿងក្នុងពេលតែមួយ និងកន្លែងតែមួយដូចគ្នា កើតឡើងកាលពីវេលាម៉ោង០៨ព្រឹកថ្ងៃទី១៥ សីហា នេះ ស្ថិតត្រង់ចំណុចមុខវត្តបាណន់ ក្នុងភូមិបាណន់ ឃុំកន្ទឺ២ ស្រុកបាណន់ ខេត្តបាត់ដំបង ។
សេចក្តីរាយការណ៍បន្តថា ម្ចាស់ម៉ូតូទាំង២គ្រឿង ត្រូវបានស្គាល់ម្នាក់ឈ្មោះកៀត ចាន់ឌី អាយុ២៤ឆ្នាំ ជាអ្នកធ្វើស្រែ មានទីលំនៅភូមិទួលច្រនៀង ឃុំបាយដំរាំ ស្រុកបាណន់ បានបាត់ម៉ូតូហុងដាឌ្រីម ស៊េរី២០១៦ ពណ៌ខ្មៅ ពាក់ស្លាកលេខ1V-3774 និងលេខតួម៉ាស៊ីន 9449255 ។ ដោយឡែកជនរងគ្រោះម្នាក់ទៀតឈ្មោះឡាំ អ៊ា អាយុ១៦ឆ្នាំ ធ្វើស្រែ មានទីលំនៅក្នុងភូមិឆាយរំពាត់ ឃុំកន្ទឺ២ ស្រុកបាណន់ បាត់ម៉ូតូម៉ាកហុងដាឌ្រីម២០១៧ មានពាក់ស្លាកលេខបាត់ដំបង1X5957 មានលេខតួម៉ាស៊ីន 9678205 ។
ទោះបីជាយ៉ាងណា ហេតុការណ៍ខាងលើមិនដឹងថា តើចោរមានបក្សពួកប៉ុន្មាននាក់នោះទេដោយបានលួចម៉ូតូអស់២គ្រឿងទៅបានយ៉ាងងាយបែបនេះ ។ នៅមុនពេលកើតហេតុនោះ ម្ចាស់ម៉ូតូទាំង២បានចតនៅមុខវត្តបាណន់ ដើម្បីដើរចូលទៅទិញគ្រឿងសម្ភារសម្រាប់សែនថ្ងៃសីល លុះពេលដើរត្រឡប់មកវិញ ស្រាប់តែភ្ញាក់ផ្អើលបាត់ម៉ូតូតែម្តង ។
ករណីនេះ មហាជនសង្ឃឹមថា អាជ្ញាធរមានសមត្ថកិច្ចនឹងធ្វើការស្រាវជ្រាវរកឱ្យឃើញវិញ ព្រោះទីតាំងកើតហេតុ គឺនៅមិនឆ្ងាយពីអធិការប៉ូលិសទេ ហើយជាពិសេសកន្លែងប៉េអឹមនៅកៀបបំផុតដែរ ។
ចែករំលែកព័តមាននេះ