មន្ត្រីនគរបាលខ្មែរម្នាក់ ត្រូវសមត្ថកិច្ចវៀតណាមឃាត់ខ្លួន
ខេត្តតាកែវ ៖ មន្ត្រីនគរបាលប៉ុស្ដិ៍រដ្ឋបាលព្រះបាទជាន់ជុំ នៃស្រុកគិរីវង់ ខេត្តតាកែវ ម្នាក់ត្រូវបានសមត្ថកិច្ចប្រទេសវៀតណាម ឃាត់ខ្លួនកាលពីថ្ងៃទី៧ ខែសីហា ឆ្នាំ២០១៧
ខេត្តតាកែវ ៖ មន្ត្រីនគរបាលប៉ុស្ដិ៍រដ្ឋបាលព្រះបាទជាន់ជុំ នៃស្រុកគិរីវង់ ខេត្តតាកែវ ម្នាក់ត្រូវបានសមត្ថកិច្ចប្រទេសវៀតណាម ឃាត់ខ្លួនកាលពីថ្ងៃទី៧ ខែសីហា ឆ្នាំ២០១៧ នៅចំណុចច្រករបៀង យិនយ៉ា ខេត្តគៀនយ៉ាង ខ្មែរហៅថា ច្រករបៀងកំណប់កែវ ស្ថិតក្នុងឃុំតាអូ ស្រុកគីរីវង់ ខេត្តតាកែវ ពាក់ព័ន្ធរឿងជួញដូរគ្រឿងញៀនទម្ងន់១គីឡូក្រាម។ មន្រី្តនគរបាលស្រុកគីរីវង់ បានឲ្យដឹងថា មន្ត្រីនគរបាលដែលសមត្ថកិច្ចប្រទេសវៀតណាមឃាត់ខ្លួននោះ ឈ្មោះ កូវ វុទ្ធី ភេទប្រុស អាយុ៤៩ឆ្នាំ រស់នៅភូមិពោធិ៍ខ្វិត ឃុំព្រះបាទជាន់ជុំ ស្រុកគីរីវង់ ខេត្តតាកែវ ដែលបម្រើការជាមន្ត្រីនគរបាលប៉ុស្ដិ៍រដ្ឋបាល ព្រះបាទជាន់ជុំ។
ប្រភពដដែលបានឲ្យដឹងថា មុនពេលឃាត់ខ្លួនជនសង្ស័យ បានជិះម៉ូតូចូលទៅប្រទេសវៀតណាមតាមច្រកខាងលើដូចសព្វមួយដង ហើយក៏ត្រូវបានសមត្ថកិច្ចវៀតណាមឃាត់ខ្លួន ដោយឆែករកឃើញថ្នាំញៀនប្រភេទម៉ាទឹកកក ចំនួន១គីឡូក្រាម។ បើតាមប្រពន្ធជនសង្ស័យឈ្មោះ ណា រ៉ែន អាយុ៤៦ឆ្នាំ ឲ្យដឹងថា ប្ដីរបស់ខ្លួនជាមន្ត្រីនគរបាលប៉ុស្ដិ៍ព្រះបាទជាន់ជុំ មានកូនចំនួន២នាក់ ស្រី១ប្រុស១។ អ្នកស្រីថា ប្ដីរបស់របស់អ្នកស្រីបានលក់ប្រាក់ខែចំនួន៤ឆ្នាំ ដើម្បីយកលុយមកធ្វើផ្ទះ ដោយមិនបានដឹងថា ប្ដីអ្នកស្រី ជួញដូរគ្រឿងញៀននោះទេ។ តែក្រោយពេលដឹងថា សមត្ថកិច្ចវៀតណាមចាប់រឿងគ្រឿងញៀន ទើបអ្នកស្រីភ្ញាក់ព្រើតតែម្ដង។
ករណីខាងលើលោក សុខ សំណាង ស្នងការនគរបាលខេត្តតកែវ បានឲ្យដឹងថា លោកទទួលបានដំណឹងនេះរួចហើយ ប៉ុន្តែមន្ត្រីនគរបាល ដែលជាជនសង្ស័យត្រូវបានកាត់ឈ្មោះចេញពីក្របខណ្ឌនគរបាលរួចហើយ ដោយគ្រាន់តែមិនទាន់មានសេចក្ដីសម្រេចជាលាយលក្ខណ៍អក្សរប៉ុណ្ណោះ។ បច្ចុប្បន្នជនសង្ស័យ ដែលជាអតីតមន្ត្រីនគរបាលប៉ុស្ដិ៍នគរបាល ព្រះបាទជាន់ជុំខាងលើ កំពុងត្រូវបានសមត្ថកិច្ចខេត្តគៀនយ៉ាង ប្រទេសវៀតណាមបន្ដនីតិវិធី ហើយតាមច្បាប់ជនសង្ស័យ អាចប្រឈមមុខ នឹងទោសប្រហារជីវិតព្រោះនៅប្រទេសវៀតណាមច្បាប់មានការតឹងរ៉ឹងបំផុតទៅលើជនល្មើសដែលបានរកស៊ីជួញដូរគ្រឿងញៀនចាប់ពី១គីឡូក្រាមឡើងទៅនឹងត្រូវកាត់ទោសប្រហាជីវិត៕
ចែករំលែកព័តមាននេះ