កិច្ចការជំនួញ » រថយន្ត-បច្ចេកវិទ្យា

របៀប​ប្រើប្រាស់ Google ដើម្បី​រក្សា​ឯកសារ​សំខាន់​ៗ​ក្នុង​កុំព្យូទ័រ

ដោយ ៖ ណៃ ដាលីន   

ថ្ងៃព្រហស្បតិ៍ ទី១០ ខែសីហា ឆ្នាំ២០១៧ ម៉ោង ១២:៤៥   (10-08-2017 12:45)

Google បាន​ផ្តល់​ភាព​ងាយស្រួល​ដល់​អ្នក​ក្នុង​ការ​រក្សា​ឯកសារ​ទាំងអស់​នៅ​លើ​កុំព្យូទ័រ តាម​រយៈ​ឧបករណ៍ Backup and Sync សម្រាប់​កុំព្យូទ័រ​ធម្មតា និង Mac ។

ការ​រក្សា​ឯកសារ​ទុក​ដោយឡែក​គឺ​សំខាន់​ណាស់ ប៉ុន្តែ​ដំណោះស្រាយ​ថ្មី​របស់ Google បាន​ធ្វើ​ឲ្យ​វា​កាន់តែ​ងាយស្រួល​រក​ឯកសារ​ពេល​ប្រញាប់ ឬ​ពេល​អ្នក​កំពុង​តែ​ប្រើប្រាស់​កុំព្យូទ័រ​ក្រុមហ៊ុន ឬ​របស់​អ្នក​ដទៃ​ជាដើម ។ វា​ពឹងផ្អែក​លើ​អុ​ី​ន​ធើ​រ​ណេ​ត ។ ដូច្នេះ អ្នក​មិន​ចាំបាច់​ព្រួយបារម្ភ​ពី​ការ​ទិញ Hard Drive ដើម្បី​ដាក់​ជាប់​ខ្លួន​ទេ ។

ជាដំបូង សូម​ទាញ​យក Google Backup and Sync ពី​គេហទំព័រ​របស់ Google ។ បន្ទាប់​មក​ចុច​ចូល​ក្នុង​កម្មវិធី​នេះ រួច​ចុច Get Started​។ សូម​ចុច Sign in និង​វាយ​គណនី Google របស់​អ្នក ឬ​បង្កើត​គណនី​មួយ​ប្រសិនបើ​អ្នក​មិន​ទាន់​មាន ។ រួច​ជ្រើសរើស Folder ដែល​អ្នក​ចង់​រក្សា​វា​ក្នុង Google Drive ។ យើង​ក៏​អាច​ជ្រើសរើស​គុណភាព​រូបភាព​ដែល​ចង់​បង្ហោះ​ទៅ Google Drive ផង​ដែរ ។ ពេល​រួចរាល់​ហើយ​សូម​ចុច Next ។

ប្រាកដ​ណាស់ អ្នក​ប្រហែលជា​មិន​ចង់​រក្សា​គ្រប់​ឯកសារ​ដែល​មាន​លើ​កុំព្យូទ័រ​របស់​អ្នក​ទេ ព្រោះ​មនុស្ស​ម្នាក់​ៗ​មាន​ឯកសារ​លើ​កុំព្យូទ័រ​ច្រើន​ណាស់ ។

ដូច្នេះ សូម​ជ្រើសរើស​តែ​ឯកសារ​ណា​សំខាន់​ៗ ដែល​អ្នក​ចង់​ជៀសវាង​ការ​បាត់បង់​បាន​ហើយ ប៉ុន្តែ​ប្រសិនបើ​ត្រូវការ​រក្សា​ទុក​ឯកសារ​ច្រើន​លើ Google Drive នោះ គឺ​អាច​ចុច​លើ​ពាក្យ​ថា Upgrade អ្នក​នឹង​អាច​ផ្ទុក​ឯកសារ​បាន​កាន់តែ​ច្រើន ។

ប្រសិនបើ​ចង់​ផ្ទុក​ឯកសារ​បាន 100GB  អ្នក​នឹង​ត្រូវ​បង់ប្រាក់​១,៩៩​ដុល្លារ​ក្នុង​១​ខែ ឬ​១៩,៩៩​ដុល្លារ​ក្នុង​១​ឆ្នាំ ។ បើ​អ្នក​ត្រូវការ​ផ្ទុក​ឯកសារ 1TB គឺ​ត្រូវ​បង់​៩,៩៩​ដុល្លារ​ក្នុង​១​ខែ ឬ​៩៩,៩៩​ដុល្លារ​ក្នុង​១​ឆ្នាំ​ផង​ដែរ ៕