រាជធានីភ្នំពេញ ៖ ករណីគ្រោះថ្នាក់ចរាចរណ៍មួយ បង្កឡើងដោយរថយន្តធន់ធ្ងន់មួយគ្រឿង បើកបរក្នុងល្បឿនលឿន និងរេចង្កូត មកបុកពីក្រោយម៉ូតូកង់បីមួយគ្រឿង ដែលកំពុងចតនៅចិញ្ចើមផ្លូវ បណ្តាលឪពុករបួសធ្ងន់ និងកូនស្រី…
រាជធានីភ្នំពេញ ៖ ករណីគ្រោះថ្នាក់ចរាចរណ៍មួយ បង្កឡើងដោយរថយន្តធន់ធ្ងន់មួយគ្រឿង បើកបរក្នុងល្បឿនលឿន និងរេចង្កូត មកបុកពីក្រោយម៉ូតូកង់បីមួយគ្រឿង ដែលកំពុងចតនៅចិញ្ចើមផ្លូវ បណ្តាលឪពុករបួសធ្ងន់ និងកូនស្រី អាយុ២ខួប បានបា.ត់បង់ជីវិត នៅនឹងកន្លែងកើតហេតុភ្លាមៗ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០៨និង០៣នាទីព្រឹកថ្ងៃទី១៣ ខែកុម្ភៈ ឆ្នាំ២០២៣ នៅទល់មុខសាលាភាសាបរទេសក្តីសង្ឃឹម ផ្លូវ៤០ម៉ែត្រ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
រថយន្តបង្កម៉ាក ហ៊ីយិនដាយ ពណ៌សពាក់ស្លាកលេខ ត្បូងឃ្មុំ 3A -2379 មានបិទស្លាកក្រុមហ៊ុន ពិភពដឹកជញ្ជូន V.C c.៣៣ បើកបរដោយបុរសម្នាក់ មិនទាន់ស្គាល់អត្តសញ្ញាណ ។ ក្រោយកើតហេតុ បានរត់គេចខ្លួនបាត់ស្រមោល ។
ប្រភពព័ត៌មានពីប្រជាពលរដ្ឋ នៅកន្លែងកើតហេតុ បាននិយាយថា មុនពេលកើតហេតុ គេឃើញបុរសម្នាក់ បានឈប់ម៉ូតូកង់បី ចតនៅចិញ្ចើមផ្លូវ ។ បន្ទាប់មក ឪពុកបានយកបាយមកបញ្ចុកកូនស្រីតូច អាយុប្រហែល២ខួប ដោយអង្គុយនៅកៅអីផ្នែកខាងក្រោយ ទាំងពីរនាក់ ។ ភ្លាមៗនោះ ស្រាប់តែមានរថយន្ត មួយគ្រឿង ដែលធ្វើដំណើរតាមបណ្ដោយផ្លូវ៤០ម៉ែត្រ ក្នុងទិសដៅពីលិចទៅកើត ក្នុងល្បឿនលឿន ក៏បានរេ ចង្កូតមកបុកផ្ទប់នឹងម៉ូតូកង់បី កៀបជាប់ក្រោមរថយន្ត បណ្តាលឲ្យឪពុករងរបួសធ្ងន់ ចំណែកកូនស្រី របួសធ្ងន់ត្រង់ក្បាលដាច់ខ្យល់ស្លាប់ យ៉ាងអាណោចអធ័ម នៅទីតាំងកន្លែងកើតហេតុ ។ ក្រោយកើតហេតុភ្លាមៗ អ្នកបើករថយន្តបង្ក បានចុះរត់គេចខ្លួនបាត់ស្រមោល ។
ជនរងគ្រោះជាឪពុក ត្រូវបានរថយន្តសង្គ្រោះ មកដឹកទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ចិន សែនសុខ ។
វត្ថុតាងមានរថយន្ត និងម៉ូតូកង់បី ត្រូវបានសមត្ថកិច្ចជំនាញវាស់វែង នាំយកទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការនគរបាលរាជធានីភ្នំពេញ ដើម្បីចាត់ការតាមនីតិវិធី ៕
ចែករំលែកព័តមាននេះ