រាជធានីភ្នំពេញ៖ លោក នី ផល្លី រដ្ឋលេខាធិការក្រសួងទេសចរណ៍ បានបញ្ជាក់ថា ខេត្តកោះកុង មានឆ្នេរខ្សាច់ និងឆ្នេរកោងកាងស្អាតៗ រួមទាំងព្រែកធម្មជាតិជាច្រើន ដែលមានសក្តានុពលខ្ពស់ អាចរៀបចំកែលម្អ ដើម្បីចូលរួមក្នុងការប្រឡងប្រណាំងឆ្នេរខ្សាច់កម្សាន្តស្អាតលើកទី៤ និងព្រែកកម្សាន្តស្អាត លើកទី១ ឆ្នាំ២០២៣​។

ការលើកឡើងនេះ បានធ្វើឡើង កាលពីថ្ងៃទី១០ ខែកុម្ភៈ ឆ្នាំ២០២៣ ខណៈដែល​គណៈកម្មាធិការ​ជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានរៀបចំសិក្ខាសាលាផ្សព្វផ្សាយ ស្តីពី “ការប្រឡងប្រណាំងឆ្នេរខ្សាច់កម្សាន្តស្អាត លើកទី៤ និងព្រែកកម្សាន្តស្អាត លើកទី១ ឆ្នាំ ២០២៣”។ កិច្ចប្រជុំនេះ បានធ្វើឡើង  នៅសាលាខេត្តកោះកុង ក្រោមអធិបតីភាពលោក​ នី ផល្លី រដ្ឋលេខាធិការក្រសួងទេសចរណ៍ អគ្គលេខាធិការរង គ.អ.ឆ.ក. និងជាប្រធានក្រុមការងារ​ទទួលបន្ទុកតាមដាន និងវាយតម្លៃឆ្នេរខ្សាច់កម្សាន្តស្អាត ដោយមានការចូលរួមពី​តំណាងរដ្ឋបាលខេត្តកោះកុង   ស្នងការដ្ឋាននគបាលខេត្ត មន្ទីរអង្គភាពជំនាញពាក់ព័ន្ធ តំណាងរដ្ឋបាលក្រុង-ស្រុក ដែលមានឆ្នេរ និងព្រែក ក្នុងភូមិសាស្រ្តខេត្តកោះកុង និងប្រតិបត្តិករទេសចរណ៍​។

ដោយមើលឃើញពីកាលានុវត្តភាពទាំងនេះ លោករដ្ឋលេខាធិការ នី ផល្លី បានស្នើ និងជំរុញដល់​រដ្ឋបាល​ខេត្តកោះកុង រៀបចំដាក់បញ្ចូលឆ្នេរ និងព្រែកបេក្ខភាពឲ្យបានច្រើន ក្នុងចលនាប្រឡងប្រណាំងឆ្នេរខ្សាច់កម្សាន្តស្អាត លើកទី៤ និងព្រែកកម្សាន្តស្អាត ឆ្នាំ២០២៣នេះ ដោយចាប់ផ្តើមរៀបចំ និងកែលម្អឆ្នេរ និងព្រែកទាំងនោះ អោយស្របតាមស្តង់ដាបច្ចេកទេស ពិសេសគោលការណ៍ណែនាំស្តីការគ្រប់ឆ្នេរខ្សាច់កម្សាន្ត ដើម្បីឆ្ពោះទៅទទួលបាន​ជ័យលាភីនាពេលខាងមុខ។

លើសពីនោះ លោក​រដ្ឋលេខាធិការ បានជម្រាបដល់អង្គសិក្ខាសាលាផងដែរថា តាមរយៈយន្តការ​ប្រឡង​ប្រណាំងខាងលើនេះ នឹងជួយជំរុញដល់ការរៀបចំកែលម្អឆ្នេរខ្សាច់ ឆ្នេរកោងកាង និង​ព្រែក​ទាំងអស់នោះ ជាគោលដៅទេសចរណ៍ដ៏ទាក់ទាញ ដើម្បីត្រៀមទទួលភ្ញៀវទេសចរជាតិ និងអន្តរជាតិ មកសម្រាកកម្សាន្ត លោក​បានបញ្ជាក់ផងដែរថា ខេត្តកោះកុង គឺជាគោលដៅ​អេកូ​ទេស​ចរណ៍ធម្មជាតិដ៏សម្បូរបែប ប្រកបដោយភាពទាក់ទាញ ដែលអាចបង្កើតជាផលិតផល​ទេសចរណ៍ចម្រុះ សម្រាប់ការត្រៀមខ្លួនរួចរាល់ ក្នុងការរៀបចំខ្សែទស្សនកិច្ចទេសចរណ៍​ភាគ​ខាងត្បូង​របស់អាស៊ាន ASEAN (Southern Tourism Corridor) ដែលតភ្ជាប់ពីប្រទេសថៃ ប្រទេស​កម្ពុជា និងប្រទេសវៀតណាម៕ សុខ សារ៉ាយ