ម្ចាស់ចម្ការកា.ប់ដើមស្វាយកែវរមៀតចោល ដោយគ្មានការសោកស្តាយសូម្បីបន្តិច
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី០៦ ខែកុម្ភ: ឆ្នាំ២០២៣ នេះ គេសង្កេតឃើញដំណាំស្វាយកែវ រមៀតជាង២០០ដើម ស្ថិតនៅក្នុងភូមិទឹកផុស សង្កាត់ប៉ៃលិន…
ខេត្តប៉ៃលិន ៖ រហូតមកដល់ថ្ងៃទី០៦ ខែកុម្ភ: ឆ្នាំ២០២៣ នេះ គេសង្កេតឃើញដំណាំស្វាយកែវ រមៀតជាង២០០ដើម ស្ថិតនៅក្នុងភូមិទឹកផុស សង្កាត់ប៉ៃលិន ក្រុងប៉ៃលិន ខេត្តប៉ៃលិន ត្រូវបានម្ចាស់កា.ប់ចោល ដោយគ្មានសោកស្តាយអ្វីសូម្បីតែបន្តិចឡើយ ខណ:ដែលខ្លួនដាំរួចទទួលបានផលផ្លែទៅហើយ ស្រាប់តែឃើញតម្លៃទីផ្សារធ្លាក់ចុះរហូត ចាប់តាំងពីតម្លៃ២០០០រៀល ក្នុង១គីឡូក្រាម រហូតដល់នៅសល់ត្រឹម៤០០ ទៅ៥០០រៀលក្នុង១គីឡូក្រាម លុះចុងក្រោយស្ទើរតែគ្មានម៉ូយចូលទិញ ទើបម្ចាស់តូចចិត្តក៏កា.ប់ចោល ដួលរេលពេញផ្ទៃចម្ការ ហើយណាមួយប្រញាប់យកដីដាំដំណាំដើមស្វាយចន្ទី និងដំឡូងមី ព្រោះមានតម្លៃទីផ្សារខ្ពស់ជាង។
បើតាមប្រភពព័ត៌មានពីស្ត្រីម្នាក់ ឈ្មោះ នី ជាអ្នករស់នៅជិតខាងនឹងម្ចាស់ចម្ការខាងលើបានរៀបរាប់ឱ្យដឹងថា ម្ចាស់ចម្ការមួយនេះ បានដាំដំណាំស្វាយកែវរមៀតរាប់រយដើម អស់រយ:ពេលជាច្រើនឆ្នាំមកហើយ លុះពេលដល់រដូវប្រមូលផល ស្រាប់តែតម្លៃទីផ្សារផ្លែស្វាយមានការធ្លាក់ចុះជារៀងរាល់ឆ្នាំ។ ពេលខ្លះ ម្ចាស់មិនអាចរកម៉ូយចូលទៅទិញផ្លែស្វាយក្នុងចំការរបស់ខ្លួនបាន ទើបពេលនេះ សម្រេចចិត្តកា.ប់ដើមស្វាយរបស់ខ្លួនជាបន្តបន្ទាប់ជាង២០០ដើម ខណ:ដែលដើមស្វាយកំពុងតែចេញផ្កា ក្តិបពេញដើមក្នុងចម្ការរបស់ខ្លួនទៅហើយ ។
ប្រភពបន្តទៀតថា ពួកគាត់មួយចំនួនលែងចង់ដាំស្វាយកែវរមៀត ឬដំណាំមៀនប៉ៃលិនបន្តទៀត ព្រោះបន្ទាប់ពីដាំរួច បែរជាតម្លៃទីផ្សារធ្លាក់ចុះ លុះក្រឡេកមើលទៅមើមដំឡូងមីនៅពេលនេះ ឡើងថ្លៃខ្ពស់ត្រដែតគួរឱ្យកត់សម្គាល់ ទើបពួកគាត់សម្រេចថា កា.ប់ដើមស្វាយកែវរមៀតចោល ដើម្បីដាំដំណាំដែលឆាប់ទទួលបានផលផ្លែ លក់យកថវិកាសងជំពាក់បំណុលគេ ។
ចំណែកឯកសិករខ្លះទៀត ពួកគាត់មានដីចម្ការច្រើន មិនសម្រេចចិត្តកាប់ដើមស្វាយដែលធំហើយនេះចោលទេ ដោយយកដីទំនេរផ្សេងទៀតដាក់ដាំដំឡូងមី ឬដំណាំពោតក្រហមវិញ ព្រោះបើសិនជាពេលខាងមុខតម្លៃទីផ្សារផ្លែស្វាយកែវរមៀតឡើងថ្លៃ នោះលំបាកដាំឡើងវិញ ហើយទោះបីជាដាំក៏មិនអាចទាន់ពេលទទួលផលផ្លែបេះលក់ដែរ ព្រោះត្រូវចំណាយពេល៣ទៅ៤ឆ្នាំ ទើបអាចទទួលបាននូវផលផ្លែ បើឃើញថោកកា.ប់ចោល លុះពេថ្លៃដាំឡើងវិញបែបនេះ ពិតជាមានការលំបាកខ្លាំងណាស់ ។
ពួកគាត់ខ្លះទៀត មានការសោកស្តាយ ពេលដែលឃើញកសិករមួយចំនួនកាប់ដើមស្វាយដែល ដាំបានធំទទួលបានផលផ្លែ បើសិនជាទុកដើមទាំងនោះ ហើយរកដីផ្សេងដាំដំណាំដែលត្រូវដាំវិញ នោះអាចជាជម្រើសដ៏ល្អម្យ៉ាងដែរ។ តែប្រហែលជាគាត់គ្មានដីផ្សេងសម្រាប់ដាំដំណាំ ដែលមានតម្លៃខ្ពស់ ទើបបានជានាំគ្នាកា.ប់ចោល ហើយបែរទៅដាំដំណាំស្វាយចន្ទី ឬដំឡូងមីដែលកំពុងតែឡើងថ្លៃវិញ ។
ចែករំលែកព័តមាននេះ