ខេត្តស្វាយរៀង ៖ មហាជនដាក់ចម្ងល់តើម៉ី សម្បត្តិ និងម៉ី រតនា ជាអ្នកណា? ទើបហ៊ានយកឡូហ្គោក្រសួងសាធារណៈការ និងដឹកជញ្ជូនមកបិទលើអេស្កាវទ័រ ធ្វើអាជីវកម្មជីករណ្តៅដីយកអាចម៍ដីលក់…
ខេត្តស្វាយរៀង ៖ មហាជនដាក់ចម្ងល់តើម៉ី សម្បត្តិ និងម៉ី រតនា ជាអ្នកណា? ទើបហ៊ានយកឡូហ្គោក្រសួងសាធារណៈការ និងដឹកជញ្ជូនមកបិទលើអេស្កាវទ័រ ធ្វើអាជីវកម្មជីករណ្តៅដីយកអាចម៍ដីលក់ ជីកជ្រៅ ជម្រៅជាង១០ម៉ែត្រ លើសច្បាប់កំណត់ ដោយលោកប្រធានមន្ទីរសាធារណៈការនិងដឹកជញ្ជូនខេត្ត ប្រដូចថា អ្នកខ្លះយកអាវ ន.ប ឬខ.ម មកពាក់ អ្នកខ្លះយកស្លាកលេខរថយន្ត ន.ប ឬខ.ម មកបំពាក់លើរថយន្តបំភាន់ភ្នែកសមត្ថកិច្ចដែលពាក្យចាស់លោកថា លើកស្នាជម្លរក្អែក ។
ដោយលិខិតអនុញ្ញាតរបស់លោកអភិបាលក្រុងអនុញ្ញាតិឲ្យជីកជម្រៅ០៣ម៉ែត្រ ហើយប្រើប្រាស់រថយន្តដឹកអាចម៍ដីធុនធំបានបំផ្លាញផ្លូវលំ០៣ខ្សែ ប្រវែង៦គីឡូម៉ែត្រស្រុតខូចក្លាយជារណ្តៅសំបុកមាន់ ធ្វើឲ្យប្រជាពលរដ្ឋចំនួន២ភូមិក្តៅក្រហាយក្រុមរថយន្តដឹកដីកំពុងបំផ្លាញផ្លូវលំ០៣ខ្សែប្រវែង៦,០០០ម៉ែត្រ បណ្តាលឲ្យបាក់ស្រុតខូចនិងហុយធូលីដីចូលលំនៅឋានរបស់ប្រជាពលរដ្ឋធ្វើឲ្យប៉ះពាល់ដល់សុខភាពប្រជាពលរដ្ឋយ៉ាងខ្លាំង។
ករណីប្រជាពលរដ្ឋតវ៉ានេះកើតឡើងចាប់តាំងពីព្រឹកថ្ងៃទី២ កុម្ភៈ ២០២៣ រហូតមកដល់ព្រឹកថ្ងៃទី៤ កុម្ភៈ២០២៣នេះ នៅភូមិទន្លៀង ឃុំរមាំងថ្កោល ស្រុកស្វាយទាប និងភូមិស្រម៉ជ្រំ សង្កាត់សង្ឃ័រក្រុងស្វាយរៀង។បើតាមប្រជាពលរដ្ឋភូមិស្រម៉ជ្រំ សង្កាត់សង្ឃរ័ ក្រុងស្វាយរៀង បានប្រាប់កោះសន្តិភាពថា មានក្រុមអាជីវកម្មជីករណ្តៅដីយកអាចម៍ដីលក់បានជីករណ្តៅដីជ្រៅ ជម្រៅប្រមាណជាង១០ម៉ែត្របង្កឲ្យប្រជាពលរដ្ឋព្រួយបារម្ភៈខ្លាចបាក់ដីស្រែរបស់ពួកគាត់នៅពេលរដូវវស្សា និងខ្លាចធ្លាក់គោក្របីចូលក្នុងរណ្តៅដីងាប់ ជាពិសេសបច្ចុប្បន្ននេះ រថយន្តធុនធំដឹកអាចម៍ដីជាច្រើនគ្រឿង បានកំពុងបំផ្លាញផ្លូវលំចំនួន២ខ្សែស្រុតខូចប្រវែងជាង៤,០០០ម៉ែត្រ និងបង្កហុយធូលីដីចូលផ្ទះរបស់ពួកគាត់ទៀត ។
ទាក់ទិនករណីនេះដែរ លោកស្រីសុក ណន ចៅសង្កាត់សង្ឃរ័ បានមានប្រសាសន៍ថា លោកស្រីបានហៅម្ចាស់អាជីវកម្ម មកធ្វើកិច្ចសន្យា និងឲ្យជួសជុលផ្លូវឲ្យប្រជាពលរដ្ឋវិញ ពេលចរាចរណ៍រថយន្តដឹកដីខូចផ្លូវធ្ងន់ធ្ងរប៉ះពាល់ការធ្វើដំណើររបស់ប្រជាពលរដ្ឋ ហើយម្ចាស់អាជីវកម្មសុំពេល២ថ្ងៃទៀតដើម្បីដឹកខ្សាច់ភ្នំមកជួសជុលក៏ប៉ុន្តែដល់ថ្ងៃសន្យាហើយនៅតែពុំឃើញមកជួសជុល។
ចំណែកប្រជាពលរដ្ឋភូមិទន្លៀងឃុំរមាំងថ្កោលស្រុកស្វាយទាបដែលនៅជាប់ព្រំប្រទល់ភូមិស្រម៉ជ្រំបានប្រាប់កោះសន្តិភាពថា មានរថយន្តធុនធំជាច្រើនគ្រឿងរបស់ក្រុមហ៊ុនម៉ី សម្បត្តិ បានចរាចរណ៍ដឹកអាចម៍ដី បានបំផ្លាញផ្លូវលំមួយខ្សែប្រវែង២,០០០ម៉ែត្រ ខ្លាយជារណ្តៅ ជង្ហុកសំបុកមាន់ ពិបាកក្នុងការធ្វើដំណើរនិងហុយធូលីដីចូលផ្ទះរបស់ពួកគាត់ ធ្វើឲ្យប៉ះពាល់ដល់សុខភាពយ៉ាងខ្លាំង។
ទាក់ទិនករណីនេះដែរ លោកមេឃុំរមាំងថ្កោល បានប្រាប់ឲ្យដឹងថា លោកបានហៅក្រុមហ៊ុនម៉ីសម្បត្តិ ដែលជាតំណាងសម្របសម្រួលឲ្យធ្វើកិច្ចសន្យាជួសជុលផ្លូវក្រាលខ្សាច់ភ្នំ និងដាក់លូកាត់ថ្នល់ដែលបែកខូចសងប្រជាពលរដ្ឋវិញ ក៏ប៉ុន្តែរហូតមកដល់ថ្ងៃទី២ កុម្ភៈ កន្លងទៅមិនទាន់ជួសជុលផ្លូវ និងដាក់លូសងប្រជាពលរដ្ឋវិញនៅឡើយ ដូច្នេះលោកបានចាត់ក្រុមប្រឹក្សាឃុំឲ្យចុះទៅពិនិត្យមើលនិងឃាត់ឲ្យក្រុមហ៊ុនផ្អាកសកម្មភាព មួយរយៈ ដើម្បីជួសជុលផ្លូវនិងដាក់លូសងប្រជាពលរដ្ឋ។
សូមរំលឹកកន្លងមក លោកប៉ុក តកប្រធានមន្ទីររ៉ែនិងឋាមពល ខេត្តស្វាយរៀង បានមានប្រសាសន៍ថា ចំពោះការផ្តល់អាជ្ញាបណ្ណ័ ការធ្វើអាជីវកម្មជីករណ្តៅដីយកអាចម៍ដីលក់នេះមិននៅក្រោមមន្ទីររ៉ែនិងឋាមពលខេត្រទៀតទេ ក្រសួងបានប្រតិភូកម្មឲ្យទៅរដ្ឋបាលក្រុងស្រុករាជធានីខេត្តជាអ្នកចេញអាជ្ញាបណ្ណ័ បើក្រុងស្រុក អនុញ្ញាតិជីជម្រៅ០៣ម៉ែត្រ បើរដ្ឋបាលខេត្ត ជីករណ្តៅ បានជម្រៅ០៥ម៉ែត្រ ហើយបើម្ចាស់អាជីវកម្មជីកជម្រៅដល់១០ម៉ែត្រគឺ ខុសច្បាប់ហើយ។បើតាមបុរសម្នាក់ជាមេការឲ្យម្ចាស់ដីឈ្មោះមីរតនា នៅភូមិថ្មីសង្កាត់សង្ឃរ័ ក្រុងស្វាយរៀងបានឲ្យដឹងថា រថយន្តដឹកអាចម៍ដី យកមកចាក់លើដីស្រែឲ្យឈ្មោះម៉ីរតនា នៅភូមិថ្មីសង្កាត់សង្ឃ័រ ធ្វើជាដីលំនៅឋាន (ដីឡូ)ទំហំជាង០៣ហិកតា កម្ពស់០,៦០ម៉ែត្រ។
បើតាមមន្ត្រីសុរិយោដីម្នាក់បានបង្ហើបឲ្យដឹងថា ការផ្លាស់ប្តូរដីកសិកម្មមកជាដីលំនៅឋាន ជាដីឡូលក់ ដែលមានទំហំធំ ជាង៣ហិកតា ត្រូវលើកគម្រោងសុំច្បាប់ដល់ក្រសួង ទើបអាចដំណើរការចាក់ដីបាន។លោកណុបចំរើន អភិបាលក្រុងស្វាយរៀង បានប្រាប់កោះសន្តិភាពថា ក្រុមអាជីវកម្មម៉ីសម្បត្តិ បានមកសុំច្បាប់ពីសាលាក្រុងស្វាយរៀងធ្វើអាជីវកម្មជីករណ្តៅដី ទំហំក្រោម១ហិកតា ដើម្បីយកអាចម៍ដីចាក់លើកដីលំនៅឋានឲ្យឈ្មោះម៉ីរតនា នីភូមិថ្មី ចំពោះច្បាប់ជីករណ្តៅដី លោកអភិបាលក្រុងស្វាយរៀងបានអនុញ្ញាតិក្រោម១ហិកតា ជីករណ្តៅជម្រៅ០៣ម៉ែត្រ។
ប្រសិនបើជីកជម្រៅដល់១០ម៉ែត្រលោកនិងឲ្យក្រុមការងារសាលាក្រុងនិងមន្ត្រីមន្ទីររ៉ែនិងឋាមពលចុះទៅពិនិត្យដោះស្រាយ។លទ្ធផលលោកអភិបាលក្រុងបានឲ្យក្រុមហ៊ុនអាជីវកម្មជីករណ្តៅដីផ្អាកសកម្មភាពដើម្បីដោះស្រាយ។ ក៏ប៉ុន្តែអ្វីដែលអាជ្ញាធរពិបាកធ្វើចំណាត់ការដោយពិនិត្យឃើញ អេស្កាវទ័រ ២គ្រឿង នៅភូមិសកម្មភាពជីករណ្តៅដី មានបិទឡូហ្គោ ក្រសួងសាធារណៈការនិងដឹកជញ្ជូន។
ទាក់ទិនករណីនេះដែរ លោកនួន លីហួន ប្រធានមន្ទីរសាធារណៈការនិងដឹកជញ្ជូនខេត្តស្វាយរៀងបានប្រាប់កោះសន្តិភាពថា អេស្កាវទ័រ២គ្រឿងរបស់ក្រុមហ៊ុនម៉ីសម្បត្តិ គឺមិនមែនរបស់មន្ទីរ ឬរបស់ក្រសួងសាធារណការទេ គឺលោកឧទាហរណ៍ថា ដូចជា អ្នកខ្លះ យកអាវ ន.ប ឬ អាវ ខ.ម មកពាក់អ្នកខ្លះយកស្លាកលេខរថយន្ត(ន.ប ឬខ.ម )ដើម្បីបំភាន់សមត្ថកិច្ចដូចពាក្យចាស់លោកថា លើស្នា ចម្លាក្អែក។
ទាក់ទិនករណីនេះដែរ មិនអាចរកការបំភ្លឺពីលោកម៉ី សម្បត្តិ ជាម្ចាស់អាជីវកម្មជីករណ្តៅដីបានទេ ដោយមេការប្រាប់ថា ថៅកែរទៅប្រទេសថៃ ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ