សកម្មភាពរថយន្តសម្រុកដឹកជញ្ជូនដីខ្សាច់ចាក់លុបបឹងសាធារណៈ ដែលជាបឹងធម្មជាតិសម្បត្តិរបស់រដ្ឋរាប់រយហិកតា ស្ថិតនៅក្នុងភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល យកធ្វើជាកម្មសិទ្ធិឯកជនអស់ស្ទើរមួយចំហៀងបឹង។ មិនតែប៉ុណ្ណោះ
ខេត្តកណ្តាល ៖ សកម្មភាពរថយន្តសម្រុកដឹកជញ្ជូនដីខ្សាច់ចាក់លុបបឹងសាធារណៈ ដែលជាបឹងធម្មជាតិសម្បត្តិរបស់រដ្ឋរាប់រយហិកតា ស្ថិតនៅក្នុងភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល យកធ្វើជាកម្មសិទ្ធិឯកជនអស់ស្ទើរមួយចំហៀងបឹង។ មិនតែប៉ុណ្ណោះ លុបរំលោ.ភចូលដល់ដីស្រែចម្ការដែលជាកម្មសិទ្ធិរបស់បងប្អូនប្រជាពលរដ្ឋអស់ចំនួន៥គ្រួសារទៀត ដោយអស់ដីម្នាក់ៗប្រហែល៤០ម៉ែត្រទៅជាង១០០ម៉ែត្រ ដោយគ្មានដំណោះស្រាយថែមទៀតផង។
បើតាមប្រជាពលរដ្ឋរស់នៅក្នុងភូមិរទាំង បានរៀបរាប់ប្រាប់អ្នកសារព័ត៌មានប្រហាក់ប្រហែលគ្នាអោយដឹងកាលពីរសៀលថ្ងៃទី០១ ខែមករា ឆ្នាំ២០២៣នេះថា បឹងរទាំងអស់នេះ គឺជាបឹងធម្មជាតិ កើតមានឡើងតាំងពីដូនតាមកម្ល៉េះ ដែលមានសារៈសំខាន់ខ្លាំងណាស់សម្រាប់បងប្អូនប្រជាពលរដ្ឋក្នុងស្រុកកៀនស្វាយ ខេត្តកណ្តាល និងប្រជាពលរដ្ឋក្នុងខណ្ឌច្បារអំពៅ រាជធានីភ្នំពេញ ប្រកបមុខរបរអាស្រ័យផលចិញ្ចឹមជីវិតដូចជា ៖ យកទឹកប្រើប្រាស់ស្រោចស្របផលដំណាំផ្សេងៗ រកនេសាទត្រីលក្ខណៈគ្រួសារជាប្រចាំ ជាពិសេសក៏ជាប្រព័ន្ធរំដោះទឹកដ៏មានសារៈសំខាន់ ដើម្បីបញ្ជៀសជំនន់ទឹកភ្លៀងនារដូវស្សា ហូរធ្លាក់ចូលទៅទន្លេបាសាក់ កុំអោយមានការជន់លិចផលដំណាំ និងផ្ទះសម្បែងរបស់បងប្អូនប្រជាជនរស់នៅអមសងខាងតាមមាត់បឹង នៃស្រុក-ខណ្ឌទាំង២ខាងលើ។
ពលរដ្ឋបន្តថា ពួកគាត់រស់នៅសុទ្ធតែទទួលបានរបបដីដែលរដ្ឋអំណាច ចែកអោយតិច ឬច្រើនទៅតាមសមាជិកគ្រួសារ ហើយខ្លះក៏បានសាងសង់លំនៅឋានស្នាក់នៅជាអចិន្ត្រៃយ៍ រីឯអ្នកខ្លះទៀតក៏បានលក់ដោះដូរដីបន្តទៅអោយអ្នកផ្សេង ដោយសារកក្តាជីវភាពខ្វះខាត។ ប៉ុន្តែអ្វីដែលសំខាន់ នៅពេលដីមានហាងឆេង ស្រាប់តែមានក្រុមឈ្មួញចុះមកទិញរៀបចំដីអោយក្រុមហ៊ុន បុរីប៉េងហួត រួចហើយធ្វើសកម្មភាពចាក់ដីខ្សាច់លុបយកបឹងអស់ស្ទើរមួយចំហៀងទៅហើយ និងរហូតចូលដល់ដីកម្មសិទ្ធិរបស់ពលរដ្ឋម្នាក់ៗអស់ប្រវែងចូល៤០ម៉ែត្រទៅជាង១០០ម៉ែត្រ ដោយគ្មានដំណោះស្រាយឡើយ។
ពលរដ្ឋម្ចាស់ដីបាននិយាយបន្តថា ពួកគាត់បាននាំគ្នាផ្តិតមេដៃដាក់ពាក្យប្តឹងទៅសាលាឃុំ និងសាលាស្រុកជាច្រើកលើកច្រើនសារហើយ តែដំណោះស្រាយមិនមានប្រសិទ្ធភាពសោះ ដោយសារអាជ្ញាធរដោះស្រាយហាក់បីដូចជាលំអៀងទៅខាងក្រុមឈ្មួញដី។ ហើយរឿងពាក្យបណ្តឹងរបស់ប្រជាពលរដ្ឋអាជ្ញាធរប្រងើយកន្តើយ តែបើឈ្មួញដីប្តឹងពលរដ្ឋវិញ គឺដឹងតែចុះមកអនុវត្តលឿនតែម្តង។
ប្រភពដដែលនិយាយាថា ដីនេះ គឺឈ្មួញដីឈ្មោះ អ៊ាប ទិត្យឆេង ជាអ្នកទិញរៀបចំអោយក្រុមហ៊ុន បុរីប៉េងហួត។
ជុំវិញបញ្ហាខាងលើនេះ លោក មាន ណាត មេឃុំភូមិធំ បានប្រាប់អោយដឹងតាមទូរស័ព្ទថា ដីនេះ ជាដីមានប្លង់កម្មសិទ្ធិរបស់ឈ្មោះ អ៊ាប ទិត្យឆេង បានទិញតាំងពីរូបលោកមិនទាន់ឡើងកាន់តំណែងជាមេឃុំឯណោះ មិនប៉ះពាល់ដីបឹងនោះទេ។ ចំពោះពាក់ព័ន្ធជាមួយប្រជាពលរដ្ឋ គឺអាជ្ញាធរដោះស្រាយយោងទៅតាមឯកសារជាច្រើនលើកច្រើនសារហើយ តែពលរដ្ឋគាត់មិនព្រមទទួលយកដំណោះស្រាយ។
ចំណែកលោក ឡូវ សុខសាន អភិបាលស្រុកកៀនស្វាយ បានប្រាប់តាមសម្លេងតេឡេក្រាមអោយដឹងដែរថា ពលរដ្ឋខ្លះគាត់ទិញដីគេបន្ត ក្នុងឯកសារមានក្បាលដីត្រឹមតែ១០ម៉ែត្របណ្តោយ១០០ម៉ែត្រប៉ុណ្ណោះ។ តែដល់ពេលគាត់ទាមទារយក រហូតដល់ទៅជាង១០០ម៉ែត្រលើសឯកសារ។ រីឯការចោទថា អាជ្ញាធរលំអៀងទៅខាងឈ្មួញនោះ ក្នុងនាមអាជ្ញាធរស្រុក រូបលោកសុំច្រានចោលមិនអាចទទួលយកបានទេ ព្រោះយន្តការដោះស្រាយ គឺឈរនៅខាងប្រជាពលរដ្ឋជានិច្ច។
រីឯឈ្មួញដីដែលមានឈ្មោះ អ៊ាប ទិត្យឆេងវិញ ភ្នាក់ងារយើងមិនអាចទំនាក់ទំនងសុំការបំភ្លឺបានទេ ដោយសារគ្មានលេខទូរស័ព្ទទាក់ទង។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ