រាជធានីភ្នំពេញ ៖ ជនសង្ស័យម្នាក់ត្រូវបានបងប្អូនប្រជាពលរដ្ឋនាំគ្នាឃាត់ខ្លួន រួចប្រគល់អោយនគរបាលប៉ុស្តិ៍ទំនប់ទឹក ដើម្បីធ្វើការសាកសួរ បន្ទាប់ពីជនសង្ស័យរូបនោះ បានធ្វើសកម្មភាពគាស់តូបលក់ដូរលក់នំ និងគ្រឿងម្ជូររបស់បងប្អូនប្រជាពលរដ្ឋ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៤ទៀបភ្លឺ ថ្ងៃទី១ ខែកុម្ភៈ ឆ្នាំ២០២៣ នៅចំណុចជាប់នឹងរបងសាលាពេទ្យ ផ្លូវ១៨៣ កែងផ្លូវ៤៣០ ស្ថិតក្នុងសង្កាត់ទំនប់ទឹក ខណ្ឌបឹងកេងកង ។
ជនសង្ស័យខាងលើមានឈ្មោះ ធឿន វុទ្ធី ភេទប្រុស អាយុជាង២០ឆ្នាំ មុខរបរមិនពិតប្រាកដ ស្នាក់សង្កាត់ផ្សារដើមថ្កូវ ខណ្ឌចំការមន ។
បើតាមប្រភពព័ត៌មានពីបងប្អូនប្រជាពលរដ្ឋ បានអោយដឹងថា មុនពេលកើតហេតុ ពលរដ្ឋដែលរស់នៅក្បែររបងសាលាពេទ្យ បានលឺសូរសំឡេងប្លែកៗ ហើយក៏បានមើលពីលើផ្ទះមកក្រោម ក៏ស្រាប់តែឃើញមានជនសង្ស័យចំនួន២នាក់បានចូលទៅពួនក្រោយតូបលក់ដូរ ម្ជូរនំ រួមទាំងភេសជ្ជៈគ្រប់មុខ ដែលម្ចាស់ចាក់សោទុកចោល។ លុះមួយសន្ទុះក្រោយមក ជនសង្ស័យទាំង២នាក់នោះបានចេញទៅវិញបាត់អស់ ដោយបានរើអីវ៉ាន់មួយចំនួនទុកនៅខាងក្រៅរួចជាស្រេចទៅហើយ។
ប្រភពដដែលបានបន្តទៀតថា បន្ទាប់ពីឃើញសកម្មភាពបែបនេះ ពួកគាត់ដែលជាប្រជាពលរដ្ឋបានហៅគ្នីគ្នាដែលស្នាក់នៅបន្ទប់ក្បែរៗគ្នាចេញមកជួយឃ្លាំមើល ក៏ស្រាប់តែឃើញជនសង្ស័យម្នាក់បានដើរចូលទៅក្រោយតូបលក់ដូរម្តងទៀត ហើយកំពុងតែរើកកាយយកនំ និងភេសជ្ជៈមួយចំនួនច្រកចូលថង់ ហើយបំរុងលួចយកទៅ តែក៏ត្រូវបានពួកគាត់នាំគ្នាស្ទាក់ចាប់ឃាត់ខ្លួនបានម្នាក់ និងនាំគ្នាស្វាគមន៍ម្នាក់មួយដៃមួយជើង ទើបប្រគល់អោយសមត្ថកិច្ចប៉ុស្តិ៍នគរបាលទំនប់ទឹក រួមទាំងវត្ថុតាំង ដើម្បីយកសាកសួរតែម្តងទៅ។
ពាក់ព័ន្ធក្នុងហេតុការណ៍ខាងលើនេះដែរ ជនសង្ស័យត្រូវបានសមត្ថកិច្ចធ្វើការសួនាំនៅឡើយ និងរង់ចាំម្ចាស់ចូលមកដាក់ពាក្យបណ្ដឹង ដើម្បីចាត់ការតាមនីតិវិធីផងដែរ៕
ចែករំលែកព័តមាននេះ