រាជធានីភ្នំពេញ ៖ ក្រោយពីរាជរដ្ឋាភិបាល សម្រេចយកដីបឹងតាមោក ២០ហិកតា ធ្វើជាផ្សារចែកចាយបន្លែ និងចំណតរថយន្តក្រុង និងជាពិសេសកន្លែងចែកចាយបន្លែនៅផ្សារដើមគរ នឹងរើទៅផ្សារថ្មីនេះ គិតមកត្រឹមថ្ងៃទី៣១…
រាជធានីភ្នំពេញ ៖ ក្រោយពីរាជរដ្ឋាភិបាល សម្រេចយកដីបឹងតាមោក ២០ហិកតា ធ្វើជាផ្សារចែកចាយបន្លែ និងចំណតរថយន្តក្រុង និងជាពិសេសកន្លែងចែកចាយបន្លែនៅផ្សារដើមគរ នឹងរើទៅផ្សារថ្មីនេះ គិតមកត្រឹមថ្ងៃទី៣១ ខែមករា ឆ្នាំ២០២៣ ផ្សារដើមគរថ្មីនេះ សាងសង់ជិតរួចរាល់ហើយ ។
«ផ្សារដើមគរថ្មី» ត្រូវបានគេដាក់ឈ្មោះថា «ផ្សារបោះដុំអាស៊ាន-អន្តរជាតិ» នៅជាប់មហាវិថីឈ្នះឈ្នះ អតីតបឹងតាមោក(កប់ស្រូវ) ស្ថិតក្នុងសង្កាត់ព្រែកព្នៅ ខណ្ឌសែនសុខ ។ ផ្សារដើមគរថ្មីនេះ ក៏ជាផ្សារបោះដុំធំជាងគេបង្អស់ក្នុងប្រទេសកម្ពុជា ផងដែរ ។
សូមរម្លឹកថា រាជរដ្ឋាភិបាល បានយល់ព្រមជាគោលការណ៍យកដីចំនួន ២០ហិកតា នៅបឹងតាមោក ដើម្បីសាងសង់ជាផ្សារផ្គត់ផ្គង់បន្លែ ផ្លែឈើ និងជាចំណតរថយន្ត និងអនុញ្ញាតរើផ្សារបន្លែពីផ្សារដើមគរ ទៅផ្សារថ្មីនៅបឹងតាមោកវិញ ។
ការសម្រេចបង្កើតផ្សារផ្គត់ផ្គង់បន្លែផ្លែឈើ និងចំណតរថយន្តនៅបឹងតាមោកនេះ ទទួលបានចំណារដ៏ខ្ពង់ខ្ពស់ពីសំណាក់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា កាលពីថ្ងៃទី០៨ ខែមិថុនា ឆ្នាំ២០១៨។ រហូតដល់ថ្ងៃទី០២ ខែសីហា ឆ្នាំ២០១៨ទីស្តីការគណៈរដ្ឋមន្ត្រី ក៏បានធ្វើសំណើមួយ ទៅកាន់ក្រសួងរៀបចំដែនដី នគរូបនីយកម្ម និងសំណង់ ស្នើសុំដីនៅបឹងតាមោកចំនួន ២០ហិកតា ដើម្បីសាងសង់ផ្សារផ្គត់ផ្គង់បន្លែ ផ្លែឈើ និងចំណតរថយន្ត ៕
ចែករំលែកព័តមាននេះ