ខេត្តព្រះសីហនុ ៖ ពិតជាមានសំណាងណាស់ ប្រជានេសាទចំនួន២នាក់ ដែលបានលិចទូក ត្រូវបានរកឃើញវិញហើយ នៅម៉ោង១៦និង៣០នាទីល្ងាចថ្ងៃទី៣០ ខែមករា ឆ្នាំ២០២៣នេះ ខណៈពួកគេនៅមានជីវិតនៅឡើយ…
ខេត្តព្រះសីហនុ ៖ ពិតជាមានសំណាងណាស់ ប្រជានេសាទចំនួន២នាក់ ដែលបានលិចទូក ត្រូវបានរកឃើញវិញហើយ នៅម៉ោង១៦និង៣០នាទីល្ងាចថ្ងៃទី៣០ ខែមករា ឆ្នាំ២០២៣នេះ ខណៈពួកគេនៅមានជីវិតនៅឡើយ ។
ហេតុការណ៍លិចទូកខាងលើនេះ កើតឡើងកាលពីវេលាម៉ោង០៣រំលងអធ្រាត្រឈានចូលនៅថ្ងៃទី៣០ ខែមករា ឆ្នាំ២០២៣ ។ ទូកនេសាទជាប្រភេទទូកប្រើម៉ាស៊ីនប្រភេទគោយន្ត បានលិចក្នុងសមុទ្រនៅចន្លោះកោះរ៉ុងសន្លឹម និងក្រុងព្រះសីហនុ ។
ជនរងគ្រោះទាំង២នាក់ រួមមាន ៖ ទី១. ឈ្មោះ នៅ គឹមយ៉េង ភេទប្រុស អាយុ៤៣ឆ្នាំ មុខរបរអ្នកបើកបរទូកនេសាទ មានស្រុកកំណើតនៅខេត្តព្រៃវែង និងទី២. ឈ្មោះ អេង អឿន ភេទប្រុស អាយុ៤៤ឆ្នាំ មុខរបរនេសាទ មានស្រុកកំណើតនៅខេត្តកែប ។ បច្ចុប្បន្ន ស្នាក់នៅទំនប់រលក សង្កាត់លេខ១ ក្រុងព្រះសីហនុ ។
ជនរងគ្រោះ បានប្រាប់ថា មូលហេតុដែលបណ្តាលឲ្យទូកលិចនេះ ដោយសារមានខ្យល់បក់ខ្លាំង ហើយទឹករលកធំៗ គួបផ្សំម៉ូទ័របូមទឹកក្នុងទូកខូចទៀត ទើបបណ្តាលឲ្យទូកលិចចូលសមុទ្រតែម្តង ។
បើតាមលោក នួន ប៊ុនថុល អភិបាលក្រុងកោះរ៉ុង បានឲ្យដឹងថា ក្រោយទូកលិច ជនរងគ្រោះទាំង២នាក់ បានប្រើកាដុងជ័រ រសាត់អណ្តែតខ្លួនលើលម្ហសមុទ្រអស់រយៈពេលជិត១៤ម៉ោង រហូតដល់ទូកនេសាទដូចគ្នា ប្រទះឃើញ និងជួយសង្គ្រោះឡើងពីសមុទ្រ នៅចំណុចជិតកោះតាង (ចំណុចលេខដាវ 27.22) ។
លោកអភិបាលក្រុងកោះរ៉ុង បានបញ្ជាក់ថា បច្ចុប្បន្ន ជនរងគ្រោះទាំង២នាក់ ត្រូវនាំមកកាន់ដីគោក ក្នុងក្រុងព្រះសីហនុ ដឹកទៅកាន់មន្ទីរពេទ្យ ដើម្បីសម្រាកព្យាបាលរបួសស្នាម ដោយសារតែខំប្រឹងឱបកាដុងជ័រ បណ្តែតខ្លួនលើសមុទ្រ អស់ជាច្រើនម៉ោង ៕
ចែករំលែកព័តមាននេះ