ភ្នំពេញ៖ ​គ្រោះថ្នាក់ចរាចរណ៍ផ្លូវគោក ក្នុង​ឆ្នាំ២០២២ នៅទូទាំងប្រទេស បានកើតឡើងចំនួន ២.៩៧៦លើក បណ្តាលឱ្យស្លា.ប់ ចំនួន ១.៧០៩នាក់ និងរបួសចំនួន ៤.០២៦នាក់ (របួសធ្ងន់ ២.៥៧៩នាក់)។

គណៈកម្មាធិកាជាតិ​​សុវត្ថិភាព​ចរាចរណ៍​ផ្លូវ​គោក បាន​ឱ្យ​ដឹង​​ថា ក្នុង​ឆ្នាំ២​០២២ ករណីគ្រោះថ្នាក់​ចរាចរណ៍ នៅទូទាំងប្រទេស បានកើនឡើង ១៤ភាគរយ បើធៀបនឹងឆ្នាំ២០២១។ ក្នុងនោះ ករណី​គ្រោះថ្នាក់​ចរាចរណ៍មានជិត ៣ពាន់ករណី និងបណ្តាលឱ្យមានមនុស្សស្លាប់មានជាង ១៧០០នាក់ ខណៈអ្នករងរបួសវិញ មានជាង ៤ពាន់នាក់។ បើតាមគណៈកម្មាធិការជាតិសុវត្ថិភាព​ចរាចរណ៍ផ្លូវគោក ក្នុងចំណោមបទល្មើសចរាចរណ៍ជិត ៣ពាន់ករណីខាងលើ ជនល្មើសចំនួន ៣១៦​នាក់ ត្រូវបាន​បញ្ជូនទៅកាន់តុលាការ។

រាយការណ៍ខាងលើនេះ ត្រូវបានប្រកាស កាលពី​ព្រឹកថ្ងៃចន្ទ ទី៣០ ខែមករា ឆ្នាំ២០២៣នេះ ក្នុងពិធីបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆ្នាំ២០២២ និងលើកទិសដៅការងារ​ ឆ្នាំ២០២៣ ក្រោមអធិបតីភាព​សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិ​សុវត្ថិភាពចរាចរណ៍ផ្លូវគោក (គ.ស.ច.គ)។

សម្ដេចក្រឡាហោម ស ខេង បានមានប្រសាសន៍ថា ទិន្នន័យគ្រោះថ្នាក់ចរាចរណ៍ផ្លូវគោក នៅឆ្នាំ២០២២ ខាងលើនេះ នៅតែមានហានិភ័យខ្ពស់ ជាងគ្រោះថ្នាក់សង្គមនានា ដែលបានសម្លា.ប់អាយុជីវិតប្រជាពលរដ្ឋរៀងរាល់ថ្ងៃ និងបានបន្សល់ទុកនូវសោកនាដកម្ម​ជាច្រើន​ដល់ប្រជាពលរដ្ឋ ដូច​ជា​៖ ការរងរបួស ពិការភាព និងការខាតបង់ទ្រព្យសម្បត្តិ ហើយក៏ជាឧបសគ្គ ធ្វើឱ្យរាំង​ស្ទះដល់ដំណើរការអនុវត្ត​គោលនយោបាយកាត់បន្ថយភាពក្រីក្រផងដែរ។

សម្ដេច​ក្រឡា​ហោម បន្ថែម​ថា គ្រោះថ្នាក់ទាំងនេះ បានបង្កដោយ​អ្នកប្រើប្រាស់ផ្លូវមួយចំនួន ដែលមិនគោរពប្រតិបត្តិច្បាប់ ខ្វះសីលធម៌ ខ្វះការយោគយល់ អធ្យាស្រ័យ ហាក់បីដូចជា មិនស្រឡាញ់ជីវិតខ្លួនឯង ឬជីវិតអ្នកដទៃ។

សម្ដេចក្រឡាហោម បញ្ជាក់ថា ស្ថានភាពគ្រោះថ្នាក់ចរាចរណ៍ផ្លូវគោក ក្នុងឆ្នាំ២០២២ បានតម្រូវឱ្យយើង ត្រូវធ្វើការត្រួតពិនិត្យឡើងវិញនូវចំណុចវិជ្ជមាន និងអវិជ្ជមាន ដើម្បីដកពិសោធន៍ និងដោះស្រាយបញ្ហាប្រឈមឱ្យបានទាន់ពេលវេលា សំដៅកែលម្អ និងបង្កើនប្រសិទ្ធផល ការងារសុវត្ថិភាពចរាចរណ៍ផ្លូវគោក ក្នុងឆ្នាំ២០២៣ នេះ​។

ក្នុងន័យនេះ ដើម្បីទទួលជោគជ័យ ក្នុងការរក្សាសុវត្ថិភាពចរាចរណ៍ផ្លូវគោក ឆ្នាំ២០២៣ សម្ដេចក្រឡាហោម ក៏បានណែនាំ​ដល់ថ្នាក់ដឹកនាំគ្រប់លំដាប់ថ្នាក់ ត្រូវបន្តជំរុញអនុវត្តឱ្យ​បានសម្រេចនូវទិសដៅ ដែលបានដាក់ចេញ និងប្ដេជ្ញាចិត្តដោះស្រាយបញ្ហាប្រឈមនានា សំដៅរួមគ្នាទប់ស្កាត់គ្រោះថ្នាក់ចរារចរណ៍ នៅ​ប្រទេសកម្ពុជាយើង។

​ចំពោះប្រ​តិបត្តិការត្រួតពិនិត្យ​នូវការ​អនុវត្តច្បាប់ចរាចរណ៍ផ្លូវគោក នៅឆ្នាំ២០២២ នៅទូទាំងប្រទេស សមត្ថកិច្ច​បាន​ត្រួត​ពិនិត្យយានយន្ត សរុបចំនួន ១.១២១.១៣៦គ្រឿង ក្នុងនោះ ម៉ូតូចំនួន ៧៤% ហើយរកឃើញយានយន្ដល្មើស និងពិន័យចំនួន ១៤២.៨១៧គ្រឿង​៕