កូនប្រុសលោកគង់ គាំថាឪពុកខ្លួនមិនទាន់បញ្ចប់ជីវិតនយោបាយទេ
រាជធានីភ្នំពេញ ៖ កូនប្រុសបង្កើតរបស់លោកគង់ គាំ ប្រធានគណបក្សសម រង្ស៊ី គឺលោកគង់ បូរ៉ា សមាជិកសភាគណបក្សសង្គ្រោះជាតិ បានអះអាងថាឪពុករបស់ខ្លួន
រាជធានីភ្នំពេញ ៖ កូនប្រុសបង្កើតរបស់លោកគង់ គាំ ប្រធានគណបក្សសម រង្ស៊ី គឺលោកគង់ បូរ៉ា សមាជិកសភាគណបក្សសង្គ្រោះជាតិ បានអះអាងថាឪពុករបស់ខ្លួនមិនទាន់បញ្ចប់ជីវិតនយោបាយនៅក្នុងប្រទេសកម្ពុជានោះទេ ទោះបីជាគាត់មានវ័យចាស់បន្តិចក្តី។
លោកគង់បូរ៉ា បានរៀបរាបលើបណ្តាញសង្គមហ្វេសប៊ុកបញ្ជាក់ថា៖ «លោក គង់ គាំ មិនទាន់បញ្ចប់ជីវិតនយោបាយរបស់លោកនៅក្នុងប្រទេសកម្ពុជានៅឡើយទេ គឺលោកនៅតែបន្តជីវភាពនយោបាយជាកម្លាំងឯកភាពតែមួយជាមួយថ្នាក់ដឹកនាំក្នុងគណបក្សសង្គ្រោះជាតិ» ។
យ៉ាងណាក្តីកូនប្រុសបង្កើតរូបនេះបានអះអាងថា កាលពីថ្មីៗនេះ លោក គង់ គាំ បានដាក់លិខិតលាលែងពីតំណែងប្រធានគណបក្សសម រង្ស៊ី ជាផ្លូវការ នៅព្រឹកថ្ងៃទី២៥ ខែកក្កដា ឆ្នាំ២០១៧ ដោយសារតែលោកមានវ័យកាន់តែចាស់ ។ ប៉ុន្តែទោះជាយ៉ាងណា លោក គង់ គាំ អះអាងថា លោកនៅតែរក្សាតំណែងរបស់លោក ជាទីប្រឹក្សាជាន់ខ្ពស់របស់គណបក្សសង្គ្រោះជាតិ ឱ្យនៅដដែល ។
ជុំវិញរឿងរ៉ាវខាងលើនេះលោកបានប្រាប់អ្នកសារព័ត៌មានកន្លងមកថា លោកមិនត្រឹមតែលាលែងពីតំណែងប្រធានគណបក្សទេ តែសូម្បីសមាជិកភាពគណបក្ស សម រង្ស៊ី ក៏លោកសុំលាលែងដែរ ។ អ្នកនយោបាយ ដែលមានវ័យ ៧៦ឆ្នាំ រូបនេះ បានថ្លែងដូច្នេះថា៖ «តំណែងជាប្រធាននិងសមាជិកភាព គឺខ្ញុំសុំលាលែងទាំងពីរតែម្តង ។ មូលហេតុ គឺដោយសារតែខ្ញុំមានវ័យចំណាស់ហើយ ហើយសុខភាព មិនសូវបរិបូរដូចពីមុនទេ» ។
លោកគង់ បូរ៉ាបានឲ្យដឹងថា បើតាមលោក គង់ គាំ គណបក្ស សម រង្ស៊ី នឹងធ្វើសមាជវិសាមញ្ញ ដើម្បីជ្រើសរើសប្រធានថ្មី ។ យ៉ាងណា លោក មិនបានដឹងនោះទេថា គណបក្សនឹងធ្វើសមាជវិសាមញ្ញនៅពេលណា ហើយលោក ក៏មិនអាចបញ្ជាក់បានដែរថា ឥស្សរជននយោបាយរូបណានឹងអាចក្លាយជាប្រធានគណបក្សជំនួសរូបលោកនោះ ៕
ចែករំលែកព័តមាននេះ