កំពុងសម្ងំកាត់ GPS ម៉ូតូ១គ្រឿង លុះសមត្ថកិច្ចបំរុងចូលសួរនាំ ស្រាប់តែស្ទុះងើបរត់
- ភ្នំពេញ
រាជធានីភ្នំពេញ ៖ សមត្ថកិច្ចល្បាតខណ្ឌទួលគោកបានធ្វើការដកហូតម៉ូតូមួយគ្រឿង ដែលជន
រាជធានីភ្នំពេញ ៖ សមត្ថកិច្ចល្បាតខណ្ឌទួលគោកបានធ្វើការដកហូតម៉ូតូមួយគ្រឿង ដែលជនសង្ស័យម្នាក់បានលួចកាច់សោ.កបានសម្រេច និងយកទៅអង្គុយសម្ងំកាត់GPSចេញពីម៉ូតូ តែត្រូវសមត្ថកិច្ចតាមទាន់ក៏រត់គេចខ្លួនបាត់ស្រមោល កាលពីវេលាម៉ោង២និង១០នាទីឈានចូលព្រឹកថ្ងៃទី៣០ ខែមករា ឆ្នាំ២០២៣ ត្រង់ចំណុចខ្លោងទ្វារវត្តនាគវ័ន្ត តាមបណ្ដោយផ្លូវ៦០៨ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកម្លាំងសមត្ថកិច្ចខណ្ឌទួលគោកបានរៀបរាប់ប្រាប់ឲ្យដឹងថា នៅមុនពេលកើតហេតុ កម្លាំងសមត្ថកិច្ចបានធ្វើការជិះល្បាតក្នុងភូមិសាស្ត្រ ដើម្បីកាត់បន្ថយ និងទប់ស្កាត់បទល្មើសផ្សេងៗដែលកើតឡើងដោយប្រការណាមួយ។ លុះពេលជិះដល់ចំណុចកើតហេតុ កម្លាំងល្បាតក៏បានប្រទះឃើញជនសង្ស័យម្នាក់កំពុងធ្វើសកម្មភាពអង្គុយសម្ងំឆ្កឹះឆ្កៀលម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ 2JA-9426 ស្ថិតក្នុងលក្ខណៈសង្ស័យ។
តាមប្រភពដដែលបានបន្តថា កម្លាំងសមត្ថកិច្ចក៏បានជិះចូលទៅបំរុងធ្វើការសួរនាំ តែជនសង្ស័យគ្រាន់តែឃើញកម្លាំងសមត្ថកិច្ចក៏បានស្ទុះងើបរត់គេចខ្លួនចោលម៉ូតូបាត់ស្រមោលភ្លាមៗតែម្ដង។ បន្ទាប់មកសមត្ថកិច្ចក៏បានត្រួតពិនិត្យទៅលើម៉ូតូក៏ឃើញសោម៉ូតូបានបែកគ្រាប់សោ និងឃើញមានGPSដែលជនសង្ស័យនោះបានដោះចេញពីម៉ូតូ ដោយសង្ស័យថា ម៉ូតូនោះត្រូវជនសង្ស័យទើបលួចយកមក។
ក្រោយពេលកើតហេតុ សមត្ថកិច្ចក៏បានប្រមូលវត្ថុតាងរួមជាមួយម៉ូតូដែលជនសង្ស័យបន្សល់ទុកយកទៅកាន់អធិការដ្ឋាននគរបាលខណ្ឌទួលគោកដើម្បីរង់ចាំស្រាវជ្រាវរកម្ចាស់ម៉ូតូ និងតាមរកជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត៕
ចែករំលែកព័តមាននេះ