រាជធានីភ្នំពេញ៖ លោកស្រីឯកអគ្គរដ្ឋទូតថ្មីរបស់បារាំង អ៉ីវ៉ា ង្វៀង ប៊ិញ (Eva Nguyen Binh) បានវាយតំលៃខ្ពស់ចំពោះកងកម្លាំងរក្សាសន្តិភាពកម្ពុជាដែលកំពុងតែបំរើការក្រោមឆ័ត្រអង្គការសហប្រជាជាតិ សម្រាប់ការបំពេញការងារយ៉ាងសកម្ម ហើយមានគុណភាពនិងទទួលបានការគោរពយ៉ាងខ្លាំងលើឆាកអន្តរជាតិ។
លោកស្រី Eva Nguyen Binh បានជម្រាបជូនសម្តេចតេជោ ហ៊ុន សែន នៅព្រឹកថ្ងៃទី ២៦ ខែកក្កដា ឆ្នាំ ២០១៧ នៅក្នុងជួបពិភាក្សាការងារនៅវិមានសន្តិភាព ថាក្នុងបេសកកម្មរបស់លោកស្រីមកកាន់ព្រះរាជាណាចក្រកម្ពុជានៅពេលនេះ លោកស្រីនឹងប្រឹងប្រែងឲ្យអស់ពីសមត្រភាពដើម្បីធ្វើយ៉ាងណាពង្រីកនិងពង្រឹងទំនាក់ទំនងរវាងប្រទេសទាំងពីរឲ្យខ្លាំងក្លាបន្ថែមទៀត ទាំងទ្វេភាគី ទាំងពហុភាគីឲ្យបានកាន់តែរឹងមាំថែមទៀត។
លោកស្រីឯកអគ្គរដ្ឋទូតក៏បានមានប្រសាសន៍ថារយៈពេល៣ឆ្នាំកន្លងមកនេះទំនាក់ទំនងពាណិជ្ជកម្ម និងសេដ្ឋកិច្ចរវាងកម្ពុជានិងបារាំង មានការកើនឡើងទ្វេរដង។
សម្តេចតេជោបានស្នើសុំឲ្យមានការជម្រុញកិច្ចសហប្រតិបត្តិការ ជាពិសេសចំពោះការងារក្រោមឆ័ត្រអង្គការសហប្រជាជាតិក្នុងការផ្លាស់ប្តូរពត៌មានរវាងគ្នាទៅវិញទៅមក ហើយក៏បានស្នើលោកស្រីផងដែរឲ្យយកចិត្តទុកដាក់អភរិក្សប្រាង្គប្រាសាទកម្ពុជា ជាពិសេសប្រាសាទសំបូរព្រៃគុក ដែលទើបត្រូវបានបញ្ចូលក្នុងបញ្ជីជាបេតិកភណ្ឌពិភពលោករបស់អង្គការយូណេស្កូ៕
ចែករំលែកព័តមាននេះ