រាជធានីភ្នំពេញ៖ ដើម្បីគោរពតាមច្បាប់វិសោធនកម្មច្បាប់ គណបក្សនយោបាយដែលនឹងត្រូវដាក់ឲ្យអនុវត្តក្នុងរយៈពេលឆាប់ៗខាងមុខនេះ គណបក្សសង្គ្រោះជាតិបានចាប់ផ្តើមផ្លាស់ប្តូរ
រាជធានីភ្នំពេញ៖ ដើម្បីគោរពតាមច្បាប់វិសោធនកម្មច្បាប់ គណបក្សនយោបាយដែលនឹងត្រូវដាក់ឲ្យអនុវត្តក្នុងរយៈពេលឆាប់ៗខាងមុខនេះ គណបក្សសង្គ្រោះជាតិបានចាប់ផ្តើមផ្លាស់ប្តូរស្លាកសញ្ញាគណបក្សចាស់ដែលមានរូបលោក សម រង្ស៊ី ចាប់ដៃជាមួយលោក កឹម សុខា ហើយ។ នេះបើតាមការឲ្យដឹងពីមន្ត្រីជាន់ខ្ពស់គណបក្សសង្គ្រោះជាតិ។
លោក ម៉ៅ មុនីវណ្ណ សមាជិកសភាគណបក្សសង្គ្រោះជាតិមណ្ឌលកំពង់ចាមបានឲ្យកោះសន្តិភាពដឹងតាមទូរស័ព្ទនៅព្រឹកថ្ងៃទី២០ ខែកក្កដាថា ដើម្បីគោរពច្បាប់គណបក្សស្តីពីគណបក្សនយោបាយ បក្សប្រឆាំងបានចាប់ផ្តើមដករូបសញ្ញាគណបក្សដែលមានរូប លោក សម រង្ស៊ី ចាប់ដៃជាមួយលោក កឹម សុខា បណ្តើរៗហើយនៅតាមបណ្តាខេត្តមួយចំនួន។ លោកបានបញ្ជាក់ថា៖ «ធម្មតាច្បាប់ដែលគេអនុម័តហើយ នៅក្នុងនឹងយើងត្រូវតែអនុវត្តច្បាប់ដែលរដ្ឋសភាអនុម័ត។ អីុចឹងយើងត្រូវធ្វើយ៉ាងណាឲ្យស្របទៅច្បាប់នេះហើយ។ យើងបានត្រៀមនិងដកបណ្តើរៗហើយនូវស្លាកសញ្ញាដែលមានរូបរបស់លោក សម រង្ស៊ី ចាប់ដៃជាមួយលោកកឹម សុខា ហើយ»។
សម្រាប់ស្លាកសញ្ញាគណបក្សដែលរូបលោក សម រង្ស៊ី មន្ត្រីជាន់ខ្ពស់គណបក្សប្រឆាំងរូបនេះអះអាងថា គណបក្សនឹងធ្វើការផ្លាស់ប្តូរនៅទូទាំងប្រទេស។ លោកថា៖ «យើងបានចាប់ផ្តើមកដករូបសញ្ញារបស់លោកសម រង្ស៊ី ហើយ! យើងមានរយៈពេល៣ខែសម្រាប់ផ្លាស់ប្តូរ។ យើងផ្តល់អាទិភាពដល់ថ្នាក់ខេត្តនីមួយៗសម្រាប់ធ្វើហើយចាប់ផ្តើមបណ្តើរៗហើយ!»។ សម្រាប់ដកស្លាកសញ្ញាគណបក្ស ដើម្បីគោរពតាមច្បាប់នេះដែរ លោក ម៉ៅ មុនីវណ្ណ បានឲ្យដឹងគណបក្សសង្គ្រោះជាតិនឹងជួបហានិភ័យហិរញ្ញវត្ថុផងដែរ។ ដោយលោកបានបញ្ជាក់ថា៖ «ជាធម្មតាទេ យើងនឹងជួបបញ្ហាថវិការ យើងនឹងចំណាយថវិការក្នុងការធ្វើស្លាកសញ្ញាថ្មី ដើម្បីជំនួសស្លាកសញ្ញាចាស់។ ថវិការនោះនឹងបានមកពីការរៃអង្គាសគ្នា ព្រោះថា បក្សសង្គ្រោះជាតិមានការគាំទ្រពីពលរដ្ឋ»។
លោកគូសបញ្ជាក់ថា៖ «យើងយករូបសញ្ញាថ្មីមានព្រះអាទិត្យរះ ចំណែកអក្សរវិញយើងអាចដាក់ជាសារនយោបាយរំលេចដោយពាក្យស្លោកវិញ ប៉ុន្តែមិនទាន់សម្រេចទេ គឺនៅថ្ងៃទី២៤ កក្កដាខាងមុខនេះ គណៈកម្មការនាយក និងបើកកិច្ចប្រជុំសម្រេច»៕
ចែករំលែកព័តមាននេះ